Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 47: Mpangalatse Raike Tamin’​Israely Teo

Tantara 47: Mpangalatse Raike Tamin’​Israely Teo
Akana mandevy raha nangalarine reny

HENTEO moa raha alevy lahilahy io an-dainy ao io! Siky lava soasoa, noho tapa-bolamena raike, voho volafoty. Ta-Jeriko tao ro nangalàne raha reo. Fe tokone ho natao ino iaby raha niazo baka a-Jeriko ane reny? Tiaronao va?

Tokone hopotehy iaby ty raha tao; fa ty volamena noho ty volafoty avao ro tokone hatao rakitsy ho ahi’​ty tranolain’​i Jehovah. Ka olo hitanao amy sary eo reo, le tsy nanorike ty safà-Ndranahare. Nangalatse ty raha tokone ho an’​Andranahare roze. Akana ty anara lahilahy io, voho fianakaviane aze miarake amine eo reo. Ndao ho henteantsika ty raha niseho.

Nanirake lahilahy maromaro hanafike tanà raike atao hoe Ay zay Josoa tafara’​ty nangalàran’​i Akana raha reo. Fe niresy roze. Nimaty ty sasane, voho nilay ty sasane. Nalahelo bibike Josoa. Niankohoke tamy tany Josoa sady nivavake tamin’​i Jehovah hoe: ‘Nanino lahy Jehovah ro nengànao ho avy aminay ty raha manahake zao?’

Namaly Jehovah hoe: ‘Mitsangàna! Nanota ty Israely. Nangalake raha tokone hopotehy na tokone hatao rakitsy ho ahi’​ty tranolain’​i Jehovah Israelita reo. Nisy tamin-droze nangalatse siky lava soasoa raike zay, ka namòny aze. Tsy hitahy anareo aho laha tsy potehinareo raha zay, ka vonònareo ty olo nangalatse raha io.’ Nivòla Jehovah fa hatorone an’​i Josoa olo raty fanahy io.

Navorin’​i Josoa iaby ty olo, ka navàhan’​i Jehovah Akana, lahilahy raty fanahy iny. Hoy Akana: ‘Nanota aho. Nahita siky lava soasoa zay aho, noho tapa-bolamena noho volafoty. Nirìko maré raha reny ka nalàko ho ahy. Ho hitanareo milevy an-daiko ao raha reo.’

Laha fa nihita raha reny, ka nandesy tamin’​i Josoa teo, le nivòla tamin’​i Akana Josoa hoe: ‘Nanino zahay nameanao fahasahiràna io? Hahita fahasahiràna baka amin’​i Jehovah kea iha henany zao!’ Nitora-bato an’​i Akana noho ty fianakaviane iaby ty olo, ka maty roze. Hita amy tantara io fa tsy tokone hangalake raha tsy anahintsika tsika.

Nandeha nanafike tanà Ay io ndraike ty Israely laha fa tafara atoy. Nanampy ty vahoakine Jehovah, ka nandresy roze.

Josoa 7:​1-26; 8:​1-29.



Fanontanea

  • Ia va lahilahy amy sary mamòny ty raha nangalàrine baka Jeriko ane io? Ia koa lahilahy manampy aze eo reo?
  • Ino ty naha raty biby ty raha nataon’​i Akana noho ty fianakaviane?
  • Ino va ty safà navalin’​i Jehovah an’​i Josoa laha fa nanontany aze ty antone naharesy an-droze ta-Ay tany Josoa?
  • Ino ty raha niseho laha fa nandesy tamy Josoa teo, Akana noho ty fianakaviane?
  • Ino ty fianara azontsika baka ami’​ty loza nahazo an’​i Akana?

Fanontanea Fanampine

  • Vakio Josoa 7:​1-26.

    Nanao akore ty fifankahazoa nisy tamin’​i Josoa noho ty Mpamoro aze, laha vavake nataone io ro hentea? (Josoa 7:​7-9; Sal. 119:145; 1 Jaona 5:​14)

    Mampiseho ino ohatsin’​i Akana io? Nanino raha io ro fananàra maré ho antsika? (Josoa 7:​11, 14, 15; Ohab. 15:​3; 1 Tim. 5:24; Heb. 4:​13)

  • Vakio Josoa 8:​1-29.

    Ino ty raha tokone hatao’​ty Kristiana kiraidraike laha fa mahatratsy olo nanota amy fiangona ao? (Josoa 7:13; Lev. 5:​1; Ohab. 28:​13)