Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 46: Rindrin’​i Jeriko

Tantara 46: Rindrin’​i Jeriko

INO ty antone nampilàvo rindry io? Atao ho nisy bomba bevata io, nampidaràboky rindry reo. Fe mbo tsy nisy bomba zao tamy fotoa io; ndre ty basy aza le tsy mbo nanana’​ty olo. Fahagagà hafa baka amin’​i Jehovah koa io! Ndao hianarantsika ty raha niseho.

Rindrin’ny Jeriko lavo

Janjìno soa ty raha novolànin’​i Jehovah tamin’​i Josoa hoe: ‘Hiodidy tanà toy iha, noho ty miaramilanao. Hodidìno indraike isan’​andro ie, anaty enin’​andro. Andeso miarake aminareo fiara’​ty fanekea iny. Tokone hisy mpisoro fito handeha alohane eo, ka samby hitsòky ty anjomarane iaby roze.

‘Amy andro fahafito nareo le tokone hanodidy tanà io impito. Ampanenò ela ty anjomaranareo. Volàno kea ty olo iaby mba hanao feo mikorakoràky, mila aly. Hidaràboky ami’​zay rindry io, laha fa bakeo!’

Nanatanterake ze raha novolànin’​i Jehovah tamin-droze iaby Josoa noho ty vahoakine. Laha fa nandeha roze, le nantsintsìny iaby ty olo. Laha fa nanomboke nihodidy tanà io roze, le tsy nisy olo nivòla ndre raike aza. Ty feo moziky iny noho lian’​olo mandeha reny avao ro mba niré tami’​zay. Navàka biby ty fahavalo vahoaki-Ndranahare ta-Jeriko tao. Hitanao va taly mena mihanto amy lafonety io? Lafonetin’​ia io? Nataon’​i Rahaba raha novolàny mpisafo tany roe reny tamine. Tan-trano tao iaby ty fianakaviane; miarake mandìny ty raha hiseho roze.

Josoa

Tamy farane, laha fa nihodidy impito an’​i Jeriko Israelita reo, le naneno ty anjomara sady nikorakoràky iaby ty lahilahy mpanafike. Nilàvo ami’​zay rindry reny. Hoy ty asan’​i Josoa laha fa bakeo hoe: ‘Vonò iaby ty olo hitanareo, dorò kea tanà io, noho ty raha iaby ao. Ty volafoty, noho ty volamena, miarake ami’​ty saba voho ty vy avao ro avorio, soa hataontsika rakitsy ho ahi’​ty tranolain’​i Jehovah.’

Nivòla tamy mpisafo tany roe reny kea Josoa hoe: ‘Ndahàna nareo ho amy tranon’​i Rahaba ane, ka andeso bakao ie noho ty fianakaviane.’ Avotse Rahaba noho ty fianakaviane, arake ty safà fa nampitamàny mpisafo tany reny aze.

Josoa 6:​1-25.



Fanontanea

  • Ino ty raha nampanaòvin’​i Jehovah miaramila reo noho ty mpisoro tanaty enin’​andro?
  • Ino ty raha tokone hatao lahilahy reo tamy andro fahafito?
  • Nanao akore rindrin’​i Jeriko io, laha sary io ro hentea?
  • Nanino lafonety io ro misy taly mena mihanto?
  • Tean’​i Jehovah hatao akore tanà io noho olo nipetrake tao reny? Fe natao akore ty volafoty noho ty volamena, ty saba noho ty vy tao?
  • Ino ty raha nampanaòvy mpisafo tany roe lahy reny?

Fanontanea Fanampine

  • Vakio Josoa 6:​1-25.

    Ino ty antone ivolàna fa mitovy amy fitoria atao’​ty Vavolombelon’​i Jehovah amy andro henany zao, ty fandehanan’​Israelita reo nanodidy an’​i Jeriko tamy andro fahafito? (Josoa 6:​15, 16; Isaia 60:22; Matio 24:14; 1 Kor. 9:​16)

    Tamy fomba manao akore ro nahatanterake faminania amy Josoa 6:26 ao laha fa afake 500 tao tafara atoy? Ino koa ty fianara azontsika baka amy raha zay mikasike ty safàn’​i Jehovah? (1 Mpanj. 16:34; Isaia 55:​11)