Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 39: Folera Nitìry Tamy Tehin’​i Arona

Tantara 39: Folera Nitìry Tamy Tehin’​i Arona

HENTEO folera noho voankazo masake mitìry amy hazo na tehy io. An’​i Arona tehy io. Nitìry tanaty ndraike hale avao tamy tehin’​i Arona teo folera noho voankazo masake reo! Ino ty antone?

Mosesy manome an’i Arona tehy misy folera mitiry

Fa niriorio tan’​efitsy tany tanaty fotoa elaela Israelita reo henany zao. Nisy olo sasane nieritseritse fa tsy tokone ho mpitarike an-droze sasy Mosesy, voho tsy tokone ho mpisoronabe sasy Arona. Tanaty olo mpanohitse reo Kora, Datana, Abirama noho mpitarike ty vahoake nisy 250. Niavy tamin’​i Mosesy teo roze iaby reo ndraike andro, ka nivòla hoe: ‘Ino va ty antone hieritseretanareo ty vatanareo ho anabo mihoatse anay io?’ 

Hoy Mosesy tamin’​i Kora noho ty mpanarake aze: ‘Rambeso ty fandaìsa afonareo hamaray maraindray ka, asio ditin-kazo manitse anatine ao. Le miavia amy tabernakelin’​i Jehovah ao nareo. Ho hitantsika hoe ia ty hofilìn’​i Jehovah.’

Niavy tamy tabernakely tao Kora noho ty mpanarake aze 250 reny, laha fa hamarain’​iny. Nisy olo maro hafa koa nanarake an-droze. Nimeloke maré Jehovah. Nivòla Mosesy hoe: ‘Mialà amy lain’​olo raty fanahy reo nareo. Ka mitolotolo ty rahan-droze mihitsy.’ Nanorike ty safàn’​i Mosesy ty olo, ka niala lavitse ty lain’​i Kora noho Datana, voho Abirama.

Hoy ty asan’​i Mosesy hoe: ‘Ho’​zao ty hahaìzanareo hoe ia ro nofilìn’​i Jehovah. Hisokatse ty tany ka hateline iaby ze lahilahy raty fanahy.’

Laha vo baka nivòla raha zay Mosesy, le nisarake ty tany. Nilentike tambany tany tao ty lain’​i Kora miarake ami’​ty hananane. Maty tao kea Datana noho Abirama, noho ty olo hafa nanarake an-droze. Voahìly tao roze iaby. Laha fa naharé ty korakorakin’​olo nilatsake tanaty tany tao reny ty vahoake, le nikiakiake hoe: ‘Ndao tsika hilay, tsy no hately tany toy kea!’

Mbo tanila tabernakely teo avao Kora noho olo 250 mpanarake aze reny. Nandatsake afo Jehovah, ka nimay iaby roze iaby. Bakeo nivòla tamin’​i Eleazara, anake lahin’​i Arona, Jehovah, mba hangalake ty ­fandaìsan’​afo lahilahy nimaty reo. Nalà raha reo soa hanamboara saron-draha halimboke alitara iny. Ka raha nasàro alitara io, le natao mba hahatiarova’​ty Israelita, fa tsy misy olo hafa afake manao ty asa’​ty mpisoro ho an’​i Jehovah laha tsy Arona noho ty anake lahine avao.

Fe tean’​i Jehovah haseho mazava soa fa Arona noho ty anane lahy avao ro nofilìne ho mpisoro. Ka hoy ty asane tamin’​i Mosesy: ‘Ampandeso ty tehine iaby ty filoha kiraidraike baka amy foko isan-karazane amy Israely eo. Ka Arona ro handay ty tehi’​ty fokon’​i Levy. Bakeo apetràho amy tabernakely aloha fiara’​ty fanekea eo ty tehin-droze kiraidraike. Hisy folera hitìry amy tehi’​ty lahilahy nofilìko ho mpisoro.’

Laha fa hamarain’​iny, nihitan’​i Mosesy fa nisy folera noho voankazo masake nitìry tamy tehin’​i Arona teo! Hainao va henany zao hoe ino ty antone nanisian’​i Jehovah folera nitìry tamy tehin’​i Arona teo?

Nomery 16:​1-35-17:14; 17:​16-26; 26:10.



Fanontanea

  • Nisy olo tsy naneky an’​i Mosesy noho Arona hitarike an-droze sasy. Ia iaby olo reo? Ino ty raha novolànin-droze tamin’​i Mosesy?
  • Ino ty raha nampanaòvin’​i Mosesy an’​i Kora noho lahilahy mpanarake aze 250 reny?
  • Ino ty raha novolànin’​i Mosesy tamy vahoake reny? Ino koa ty raha niseho laha vo tampitse safàn’​i Mosesy io?
  • Ino ty raha nahazo an’​i Kora noho lahilahy 250 niarake tamine reny?
  • Nataon’​i Eleazara anake lahin’​i Arona io akore ty fandaìsan’​afo lahilahy nimaty teo reny? Ino ty antone?
  • Nasian’​i Jehovah folera nitìry tamy tehin’​i Arona teo. Ino ty antone? (Henteo sary io.)

Fanontanea Fanampine

  • Vakio Nomery 16:1-49.

    Ino ty raha nataon’​i Kora noho lahilahy mpanarake aze reny? Ino ty antone ivolàna fa tsy fanekea ty fahefàn’​i Jehovah raha nataon-droze zay? (Nom. 16:​9, 10, 18; Lev. 10:​1, 2; Ohab. 11:​2)

    Ino ty hevitse diso nanànan’​i Kora noho lahilahy 250 “loha’​ty fiangona” namane reny? (Nom. 16:​1-3; Ohab. 15:33; Isaia 49:​7)

  • Vakio Nomery 17:​1-11 noho 26:​10.

    Ino ty dika folera nitìry tamy tehin’​i Arona teo iny? Nanino raha io ro nampanajarìn’​i Jehovah tamy fiara’​ty fanekea tao? (Nom. 17:​5, 8, 10)

    Misy fianara bevata azontsika tamy folera nitìry tamy tehin’​i Arona iny. Ino fianara io? (Nom. 17:10; Asa. 20:28; Fil. 2:14; Heb. 13:​17)