Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 36: Anak’​aomby Volamena

Tantara 36: Anak’​aomby Volamena

INO va raha ataon’​olo reto io? Mivavake amy anak’​aomby volamena io roze! Ino ty antone anaòvan-droze raha io?

Laha fa nijàno ela tamy vohitse iny tany Mosesy, le nivòla ty olo hoe: ‘Tsy haintsika ty raha nahazo an’​i Mosesy ane, ka ndao tsika hanamboatse andranahare hitarike antsika hiala amy tany toy eto.’

Mosesy manatonta vato roe reny

‘Eka’, hoy ty asan’​i Arona rahalahin’​i Mosesy. ‘Apotàho iaby ty ­kivìronareo volamena, ka andeso amiko atoy.’ Samby nanday ty aze iaby ty olo. Navorin’​i Arona raha reny sady notranàhine, ka nanamboarane anak’​aomby volamena. Nivòla ty olo hoe: ‘Io ty Andranaharentsika aze nitarike antsika hiboake baka Ejipta ao iny!’ Nanao fety be ty Israelita laha fa bakeo, sady nivavake tamy anak’​aomby volamena io.

Neloke biby Jehovah laha fa nahita raha zay. Nivòla tamin’​i Mosesy ie hoe: ‘Mijotsòa iha. Nanao raha raty biby olo reo. Halinon-droze ty lalàko, ka mandohalike amy anak’​aomby volamena io roze.’

Olo mivavake amy anak’aomby volamena

Nijòtso baka amy vohitse eny malaky Mosesy. Laha fa nihanarìny ie, le nahita ty raha nataon’​Israelita reo. Mihira noho mitsinjake manodidy anak’​aomby volamena iny iaby ty olo! Neloke biby Mosesy, ka le natòntane tamy tany vato fisake roe nisy lalàna reny, bakeo nopotepotehine. Laha fa bakeo, le nalàne kea anak’​aomby volamena iny, ka natòntane tamy tany sady notorotoròne.

Raty vatane raha nataon’​olo reo. Novolànin’​i Mosesy ty lahilahy sasane mba hangalake ty sabatsin-droze. Ka hoy Mosesy hoe: ‘Ze olo nivavake tamy anak’​aomby volamena io le tokone hovonòa iaby.’ Nahafaty olo 3 000, lahilahy reo! Tsy mampiseho va raha zay fa tsy tokone hivavake ami-ndranahare hafa tsika laha tsy amin’​i Jehovah raike avao?

Eksodosy 32:​1-35.



Fanontanea

  • Ino va raha ataon’​olo amy sary eo reo? Ino ty antone?
  • Nanino va Jehovah ro neloke? Ino ty raha nataon’​i Mosesy laha fa nahita ty raha natao vahoake reo ie?
  • Ino ty raha nampanaòvin’​i Mosesy ty lahilahy sasane?
  • Ino ty fianara azontsika baka amy tantara io?

Fanontanea Fanampine

  • Vakio Eksodosy 32:​1-35.

    Hataon’​i Jehovah akore ty olo mampifangaro ty fivavàha marina noho ty fivavàha diso, laha fitantarà io ro hentea? (Eks. 32:​4-6, 10; 1 Kor. 10:​7, 11)

    Tokone hanao akore ty Kristiana laha fa mifìly hira noho tsinjake teane hatao? (Eks. 32:​18, 19; Efes. 5:​15, 16; 1 Jaona 2:​15-17)

    Azo alà tahake ty raha natao fokon’​i Levy reo, satria nanarake avao ty fahamarìna roze. Ino ty antone mahasoa raha nataon-droze zay? (Eks. 32:​25-28; Sal. 18:​25)