Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 35: Nanome ty Lalàne Jehovah

Tantara 35: Nanome ty Lalàne Jehovah

NIAVY tamy Vohitse Sinay nokaìhy koa hoe Horeba teo ty Israelita, roe vola tafara’​ty nialan-droze ta-Ejipta tao. Teo avao kea ro niresahan’​i Jehovah tamin’​i Mosesy baka amy hazo nirehitse iny. Nijàno teo ty olo ka nipetrake teo.

Olo reny nijàno tambany tetoy iaby, fa Mosesy raike avao ro nanganike tamy vohitse iny teny. Laha fa niavy tamy farane anabo teny Mosesy, le nivòla Jehovah hoe: Teane hanompo Aze noho hanjary vahoakine, ty Israelita. Ka laha fa nijòtso tambany teny Mosesy, le ­nambarane tamin’​Israelita reo ty raha noresahin’​i Jehovah tamine. Samby naneky iaby ty olo fa hanorike ty safàn’​i Jehovah roze, satria ta ho vahoakine.

Nanao raha hafahafa Jehovah henany zao. Nasiane setroke niboake baka amy vohitse iny ao, bakeo nandefa hotroke maré biby kea ie. Le hoy ty asane tamin’​olo reo: ‘Zaho ro Jehovah Andranaharenareo, Aze nanday anareo niboake baka amy tany Ejipta ane iny.’ Hoy kea ty asane laha fa bakeo: ‘Ka mivavake ami-Ndranahare hafa nareo, laha tsy Amiko avao.’

Vato fisake roe

Namea-Ndranahare didy sivy na lalàna hafa kea Israelita reo, ka navàka biby roze. Hoy ty asan-droze tamin’​i Mosesy hoe: ‘Aleonay iha ro miresake aminay fa tsy Andranahare, tsy no ho maty avao zahay.’

Tafara atoy le nivòla tamin’​i Mosesy Jehovah hoe: ‘Miakara amy vohitse atoy iha, fa misy vato fisake roe hameako anao, nasiako ty lalàna teako horìhy vahoake reo.’ Le nandeha niakatse tamy vohitse teny ndraike Mosesy, ka nijàno teny tanaty 40 andro noho 40 haly.

Mana lalàna maro biby ho ahi’​ty vahoakine Andranahare. Nosoratin’​i Mosesy iaby lalàna reo. Fe Andranahare mihitsy ro nanoratse lalàna tamy vato fisake roe iny teo, ka nameane an’​i Mosesy raha reny laha fa bakeo mba horìhi’​ty vahoakine. Didy Folo ro ikaìha aze.

Mosesy tamy vohitse Sinay

Niavake biby Didy Folo reo. Fe manahake zay kea ty lalàna hafa namea-Ndranahare ty Israelita. Toy ty raike amine: ‘Tokone ho tea an’​i Jehovah Andranahare amy fonao manontolo iha, noho amy sainao manontolo, noho amy vatanao manontolo, voho amy herinao manontolo.’ Toy kea ty raike hafa: ‘Tokone ho tea ty namanao manahake ty itiavanao ty vatanao iha.’ Novolànin’​i Jesosy Kristy, fa reo ro lalàna roe farane ze bevata namean’​i Jehovah ty Israely vahoakine. Hianatse raha maro mikasike an’​i Jesosy, aze Ana-Ndranahare iny noho ty fampianarane tsika laha fa afara ane.

Eksodosy 19:​1-25; 20:​1-21; 24:​12-18; 31:18; Deoteronomia 6:​4-6; Levitikosy 19:18; Matio 22:​36-40.



Fanontanea

  • Taìa ro nipetrahan’​Israelita reo, roe vola tafara’​ty nialan-droze ta-Ejipta tao?
  • Ino ty raha tean’​i Jehovah hatao’​ty vahoakine? Ino ty navalin-droze aze?
  • Manino va Mosesy ro namean’​i Jehovah vato fisake roe?
  • Ino kea ty didy hafa namean’​i Jehovah Israelita reo ankoatse’​ty Didy Folo?
  • Ino ty lalàna roe farani’​ze bevata namean’​i Jesosy Kristy?

Fanontanea Fanampine

  • Vakio Eksodosy 19:​1-25; 20:​1-21; 24:​12-18; noho 31:​18.

    Ino ty raha tokone hataon’​olo fa nanolotse ty vatane ho an’​i Jehovah, laha ty Eksodosy 19:​8 ro hentea? (Matio 16:24; 1 Pet. 4:​1-3)

  • Vakio Deoteronomia 6:​4-6; Levitikosy 19:18; Matio 22:​36-40.

    Amy fomba manao akore ro ampisehoa’​ty Kristiana fa tea an’​Andranahare noho ty olo hafa ie? (Marka 6:34; Asa. 4:20; Rom. 15:​2)