Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 30: Hazo Nirehitse

Tantara 30: Hazo Nirehitse

NIAVY zisiky amy vohitse Horeba teny Mosesy mba hila ahitse ho hani’​ty aondrine. Nahita hazo mirehitse ie etoa, fe tsy mety may hazo io!

Mosesy amy hazo mirehitse

‘Mahatserike raha toy’, hoy Mosesy. ‘Handeha marinike eny aho ami’​zay ho hitako soa hoe, ino ty raha miseho.’ Laha fa nandeha teny ie le naharé feo niboake baka amy hazo io teo, nivòla hoe: ‘Ka mandeha marinike etoy iha. Apotàho kapanao io, fa tany masy kitsahinao toy.’ Anjele ro nampiasà-Ndranahare hiresake tamin’​i Mosesy, ka le nosaronan’​i Mosesy ty tarehine.

Nivòla Andranahare hoe: ‘Fa hitako ty fijalea oloko reo a-Ejipta ane. Ka hafàhako roze. Iha ro halefako hanafake an-droze baka Ejipta ao.’ Jehovah ro handay olone reo ho amy tany Kanana ane.

Fe nivòla Mosesy hoe: ‘Olo tsy misy dikane aho. Ka fomba manao akore ro hanaòvako raha zay? Fe, ndao hatao hoe handeha ane aho. Hanontany ahy Israelita reo hoe: “Ia ty nanirake anao atoy?”, le ino ty hovolàniko amin-droze?’

Namaly Andranahare hoe: ‘Ho’​zao ty raha hovolàninao: “JEHOVAH Andranaharen’​i Abrahama, Andranaharen’​i Isaka noho Andranaharen’​i Jakoba ro nandefa ahy aminareo atoy.” ’ Le mbo nampian’​i Jehovah ndraike hoe: ‘Io ro anarako mandrakizay.’

Namaly Mosesy hoe: ‘Ka laha tsy mino ahy ohatse roze laha fa hivòla zaho hoe, iha ro nanirake ahy.’

Nanontany Jehovah hoe: ‘Ino moa raha an-tananao eny iny?’

Namaly Mosesy hoe: ‘Tehy toy.’

Alatsàho amy tany eo’, hoy Andranahare. Ka laha fa nataon’​i Mosesy raha zay, le nanjary bibilava tehy iny. Mbo nampanentean’​i Jehovah fahagagà raike hafa ndraike Mosesy, laha fa bakeo. Hoy ty asane: ‘Ampilìro anaty akanjonao ao ty tananao.’ Nanòvin’​i Mosesy raha zay, ka laha fa naboane bakao ty tanane, le nanjary foty bibike! Atao ho tanan’​olo boka reny tanane iny. Mbo nanome hery an’​i Mosesy hahafahane manao fahagagà fahatelo ndraike Jehovah. Ka hoy ty asane tamy farane: ‘Laha fa manao fahagagà reo iha, le hino ty Israelita fa zaho ro nandefa anao.’

Tafara raha rezay, le noly tan-tranone tany Mosesy sady nivòla tamin’​i Jetro hoe: ‘Engào handeha amy fianakaviako a-Ejipta ane reo aho, mba hahitako hoe manao akore iaby roze ane zay.’ Nanao veloma an’​i Mosesy Jetro, ka roso Mosesy handeha a-Ejipta ane.

Eksodosy 3:​1-22; 4:​1-20



Fanontanea

  • Ino ty anara vohitse amy sary io?
  • Ino ty raha nahatserike nihitan’​i Mosesy laha fa niarake ty aondrine tamy vohitse io teny ie?
  • Ino ty raha novolàny feo baka amy hazo nirehitse io tao? Feon’​ia raha io?
  • Ino ty navalin’​i Mosesy laha fa nivòla tamine Andranahare, fa ie ro hitarike vahoake-Ndranahare reo hiboake baka Ejipta ao?
  • Ino ty safà nampivolàni-Ndranahare an’​i Mosesy, laha fa nanontany vahoake reo hoe ia ty nanirake aze?
  • Tamy fomba manao akore ro nampisehoan’​i Mosesy, fa Andranahare ro nanirake aze?

Fanontanea Fanampine

  • Vakio Eksodosy 3:​1-22.

    Laha fa manenty tantaran’​i Mosesy io tsika, le matoky fa hanampy antsika Jehovah, ndra mihevitse aza tsika hoe tsy mahay ty asa ampanaòvine antsika. Hazavao. (Eks. 3:​11, 13; 2 Kor. 3:​5, 6)

  • Vakio Eksodosy 4:​1-20.

    Ino tamy toetsin’​i Mosesy ro niova tanaty 40 tao nijanonane ta-Midiana tany? Laha misy koa olo ta-hahazo andraikitse amy fiangona ao, ino ty fianara azony baka amy raha zay? (Eks. 2:​11, 12; 4:​10, 13; Mika 6:​8; 1 Tim. 3:​1, 6, 10)

    Manahake ty raha niseho tamin’​i Mosesy, ino koa ty atokisantsika, ndra mampiasa ty fandaminane, hananatse noho hanìty antsika aza Jehovah? (Eks. 4:​12-14; Sal. 103:14; Heb. 12:​4-11)