Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 27: Mpanjaka Raty Fanahy Ta-Ejipta Tao

Tantara 27: Mpanjaka Raty Fanahy Ta-Ejipta Tao

NATAO lahilahy retoa forosé hiasa ty olo. Henteo moa lahilahy mamàngo mpiasa amy filatse io! Baka amy fianakavian’​i Jakoba mpiasa reo, ka Israelita ro nikaìha an-droze. Ejipsiana lahilahy manao forosé an-droze hiasa reo. Nanjary andevo’​ty Ejipsiana ty Israelita. Ino ty antone nahavy raha zay?

Ejipsiana manerisery israelita

Nipetrake ta-Ejipta tao sady niada Jakoba noho ty fianakaviane, tanaty tao maromaro. Afake nikarakara an-droze soa Josefa, satria lahilahy niavake noho nana fahefà ta-Ejipta tao. Fe nimaty Josefa tafara atoy. Bakeo, nisy mpanjaka vaovao tsy tea Israelita reo nanjaka ta-Ejipta tao.

Nanandevo ty Israelita Farao raty fanahy io. Nifìly lahilahy masiake ie mba hampijaly noho hanara-maso an-droze. Nanao forosé ty Israelita hiasa mafy mba hanamboatse trano ho an’​i Farao roze. Fe nihamaro avao ty Israelita ka nitombo ty isan-droze. Laha fa nandeha ty fotoa, le nanomboke navàka ty Ejipsiana tsy no ho maro biby ty Israelita ka hahery.

Ejipsiana manerisery israelita

Hainao va ty raha nataon’​i Farao? Nivòla tamin’​ampela nampiterake israelita reny Farao hoe: ‘Vonò iaby laha fa kila ajà lahilahy vo aterake.’ Fe soa fanahy ampela reo, ka tsy novonòn-droze anak’​ajà kelikele vo terake reny.

Nanome didy ty vahoakine iaby Farao hoe: ‘Alao ty anak’​ajà lahilahy israelita vo naterake, ka vonò iaby, fa ze anak’​ajà ampela avao ro engào.’ Tsy hitanao raty biby va didin’​i Farao zay? Ndao ho henteatsika hoe nanao akore ty nanavòta anak’​ajà lahilahy raike zay.

Eksodosy 1:​6-22.



Fanontanea

  • Ia lahilahy mitanjake filatse amy sary io? Ia koa aze vangòa io?
  • Ino ty raha nahazo Israelita reo laha fa nimaty Josefa?
  • Nanino Ejipsiana reo ro nanjary navàka ty Israelita?
  • Ino ty didy namean’​i Farao ze ampela nampiterake reny israelita?

Fanontanea Fanampine

  • Vakio Eksodosy 1:​6-22.

    Nanomboke nanatanterake raha nampitamànine an’​i Abrahama iny Jehovah. Tamy fomba manao akore ro nanaòvane raha zay? (Eks. 1:​7; Gen. 12:​2; Asa. 7:​17)

    Natoron’​ampela Hebreo mpampiterake reny, fa masy amin-droze ty ay. Tamy fomba manao akore? (Eks. 1:​17; Gen. 9:​6)

    Ino ty fitahia niazon’​ampela mpampiterake reo, tami’​ty tsy fivalihan-droze amin’​i Jehovah? (Eks. 1:​20, 21; Ohab. 19:​17)

    Nampitamà Taranake ho an’​i Abrahama Jehovah. Ka ino ty raha nataon’​i Satana mba tsy hahatanterake fikasàn’​i Jehovah zay? (Eks. 1:22; Matio 2:​16)