Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 26: Tsy Nivalike Tami-Ndranahare Joba

Tantara 26: Tsy Nivalike Tami-Ndranahare Joba

TSY mahaferinay anao va lahilahy marare amy sary io? Joba ty anarane. Valine ampela eo io. Hainao va hoe ino ty raha volànine tamin’​i Joba? ‘Manozòna an’​Andranahare iha, ami’​zay ho maty.’ Ndao ho henteantsika hoe ino ty antone nivolànane raha manahake zay, noho ty antone nampijaly an’​i Joba maré manahake an’​io.

Joba feno bay

Lahilahy tsy nivalike tamin’​i Jehovah noho nanao ty sitrapòne Joba. Nipetrake ta-Oza tany ie, tsy lavitse loatse an’​i Kanana. Tean’​i Jehovah bibike Joba, fe nisy olo tsy nitea aze. Hainao va hoe ia?

Satana Devoly. Tiaròvo fa Satana aze anjele raty tsy tea an’​i Jehovah iny. Nahavita nitao an’​i Adama noho Eva tsy hanorike ty safàn’​i Jehovah ie, ka nieritseritse ie fa hahavita hitao olo maro hafa hanao manahake zay kea. Fe afake nanao raha zay va ie? Aha. Eritsereto moa ampela noho lahilahy maro tsy nivalike tami-Ndranahare fa nianarantsika reny. Firy amin-droze reny ty tiaronao?

Tafara’​ty nahafatesan’​i Jakoba noho Josefa ta-Ejipta tao, le Joba raike avao ty olo tsy nivalike tamin’​i Jehovah tan-tany etoy. Tean’​i Jehovah ty hahaìzan’​i Satana, fa tsy afake hitarike ty olo iaby ho raty fanahy ie, ka hoy ty asane: ‘Henteo Joba, fa mbo tsy nivalike tamiko mihitsy ie.’

Namaly Satana hoe: ‘Tsy mivalike aminao ie, satria notahìnao, sady nameanao raha soa maro. Fa laha alànao amine iaby raha reo, le henteo soa fa hivalike aminao ie.’

Nivòla Jehovah hoe: ‘Ndahàna, alao amine iaby raha reo. Anòvo iaby ze raha raty teanao hatao amin’​i Joba. Ho henteantsika eo laha hivalike amiko ie. Fe anòvo avao ze tsy hahafaty aze.’

Nanòvin’​i Satana tseky ze hangalaran’​olo ty aomby noho ramevan’​i Joba, bakeo novonòne ty aondrine noho ty aosine. Novonòne tamy tsioke mahery kea ty anan’​i Joba folo mianadahy. Laha fa vitane zay, le nasiane arete raty bibike io Joba ka nijaly. Zay ty antone nivolàna valin’​i Joba io hoe: ‘Manozòna an’​Andranahare iha, ami’​zay ho maty.’ Fe tsy nanao raha zay Joba. Bakeo nisy nama raty fanahy kea niavy tamin’​i Joba teo, sady nivòla tamine fa raty bibike ty fiaìnane. Fe, tsy nivalike tami-Ndranahare avao Joba.

Nahafaly an’​i Jehovah bibike raha zay, ka le nitahy an’​i Joba ie, manahake ty hitanao amy sary io. Nalàne aretin’​i Joba iny. Nanan’​anake folo hafa soasoa Joba; noho aomby, aondry, rameva, in-droe’​ty fa nananane taloha.

Ho vitanao kea va ty tsy hivalike amin’​i Jehovah, manahake ty nataon’​i Joba? Laha zay ro hataonao, le hitahy anao kea Andranahare. Ho afake hiay mandrakizay iha, laha fa hovà soasoa manahake zariday Edena iny ty tany manontolo.

Joba 1:​1-22; 2:​1-13; 42:​10-17.

Joba noho ty fianakaviane


Fanontanea

  • Ia Joba io?
  • Ino ty raha nandraman’​i Satana natao? Fe nivitane va raha zay?
  • Ino ty raha nengàn’​i Jehovah hataon’​i Satana? Ino ty antone?
  • Ino ty antone nivolàna valin’​i Joba iny tamin’​i Joba hoe: “Manozòna an’​Andranahare iha, ami’​zay ho maty”? (Henteo sary io.)
  • Arake ty hitanao amy sary faharoe io eo, tamy fomba manao akore ro nitahian’​i Jehovah an’​i Joba? Ino ty antone?
  • Laha tsy mivalike amin’​i Jehovah manahake an’​i Joba tsika, ino va ty fitahia ho azontsika?

Fanontanea Fanampine

  • Vakio Joba 1:​1-22.

    Amy fomba manao akore ro azo’​ty Kristiana anahàfa an’​i Joba? (Joba 1:​1; Fil. 2:15; 2 Pet. 3:​14)

  • Vakio Joba 2:​1-13.

    Ino ty raha samby hafa nataon’​i Joba noho valine iny, laha fa nampijaly an-droze Satana? (Joba 2:​9, 10; Ohab. 19:​3; Mika 7:​7; Mal. 3:​14)

  • Vakio Joba 42:​10-17.

    Ino ty mampitovy ty fitahia niazon’​i Joba noho Jesosy tami’​ty tsy fivalihan-droze tamin’​i Jehovah? (Joba 42:12; Fil. 2:​9-11)

    Tsy nivalike tami-Ndranahare mihitsy Joba, ka nahazo fitahia. Manino ty fahaìzantsika raha zay ro manatanjake antsika? (Joba 42:​10, 12; Heb. 6:10; Jak. 1:​2-4, 12; 5:​11)