Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 16: Nahazo Valy Soa Isaka

Tantara 16: Nahazo Valy Soa Isaka

HAINAO va hoe ia ampela amy sary io? Rebeka ty anarane. Isaka ty anara lahilahy vonjen’​io. Nanjary valine Rebeka. Fomba manao akore ty nahavy raha zay?

Tean’​i Abrahama hahazo valy soa Isaka. Tsy nirìne ty hanambalian’​i Isaka, ampela Kananita, satria nanompo andranahare diso olo reo. Ka nokaìhin’​i Abrahama ty mpanompone raike, le novolànine hoe: ‘Teako handeha amy fianakaviako a-Harana any iha, ka hila valy ho an’​i Isaka.’

Avy le nangalake rameva folo mpanompon’​i Abrahama iny, ka nandeha. Laha fa niavy tanila toera misy ty fianakavian’​i Abrahama reo teo ie, le nijàno tamy vovo zay teo. Fa harivariva ty andro, sady fotoa fantsakà’​ty ampela rano am-bovo eo tami’​zay. Ka le nivavake tamin’​i Jehovah mpanompon’​i Abrahama iny hoe: ‘Mba anòvo ze ampela manome rano ahy noho ho ahy rameva reo ro hofilìnao ho valin’​i Isaka.’

Mifankahita Rebeka noho Isaka

Tsy ela, le niavy Rebeka mba hantsàka rano. Ka laha fa nangatake rano tamine mpanompo iny, le nameane. Nanome rano ho ahy rameva maran-drano reo kea ie laha fa bakeo. Asa mafy raha zay satria mahalany rano maro biby ty rameva.

Laha fa vitan’​i Rebeka raha rezay, le nanontanea mpanompon’​i Abrahama iny ty anara’​ty babane. Nanontaniane kea laha afake miroro amin-droze ao ie amy haly. Hoy ty asan’​ampela iny hoe: ‘Betoela ty anara’​ty babako, misy trano azonao ipetràha koa aminay ao.’ Nihain’​i mpanompon’​i Abrahama iny fa anake’​ty rahalahin’​i Abrahama atao hoe Nahora, Betoela io. Ka niankohoke tamy tany ie, sady nisaotse an’​i Jehovah tamy nitarìhane aze ho amy fianakavian’​i Abrahama reo tao.

Tamy halike io avao, le novolàny mpanompon’​i Abrahama io an’​i Betoela noho Labana anadahin’​i Rebeka ty antondiane tamin-droze tao. Samby naneke ty hiarahan’​i Rebeka amine roze sady naneke ty hanambaliane an’​i Isaka. Ino ty novolànin’​i Rebeka laha fa nanontanea ie? ‘Eka’, hoy ty asane, ta handeha ie. Ka laha fa hamarain’​iny, le niondra rameva roze mba handeha himpòly a-Kanana any.

Fa harivariva ty andro vo niavy roze. Nahita lahilahy nandehandeha tan-tonda teny Rebeka. Isaka io. Faly bibike ie nahita an’​i Rebeka. Telo tao talohan’​io ro fa nahafaty an’​i Saraha renin’​i Isaka, ka mbo nalahelo avao ie. Fe tea maré an’​i Rebeka Isaka henany zao, ka nanjary falifale ndraike.

Genesisy 24:​1-67.



Fanontanea

  • Ia lahilahy noho ampela amy sary eo reo?
  • Ino ty raha nataon’​i Abrahama mba hahazoa valy ho an’​i Isaka, anake lahine? Ino ty antone?
  • Tamy fomba manao akore ro namalia-Ndranahare vavake natao mpanompon’​i Abrahama iny?
  • Nanontanea Rebeka laha ta hanambaly an’​i Isaka. Ino ty valin-teny nameane?
  • Ino va ty nahavy an’​i Isaka ho falifale ndraike io?

Fanontanea Fanampine

  • Vakio Genesisy 24:​1-67.

    Ino iaby ty toetsy soa nasehon’​i Rebeka laha fa nifankahita tamy mpanompon’​i Abrahama iny tam-bovo teo ie? (Gen. 24:​17-20; Ohab. 31:​17, 31)

    Ino ty fianara azo’​ty Kristiana alà tahake tami’​ty raha nataon’​i Abrahama ho an’​i Isaka? (Gen. 24:​37, 38; 1 Kor. 7:39; 2 Kor. 6:​14)

    Nanino tsika ro tokone hila fotoa handinìha soa, manahake ty nataon’​i Isaka? (Gen. 24:63; Sal. 77:12; Fil. 4:​8)