Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 13: Abrahama, Nama-Ndranahare

Tantara 13: Abrahama, Nama-Ndranahare

ORA ty anaran-tanà raike nipetràhan’​olo tafara Safodrano iny. Nanjary tanàm-be noho nisy trano soa ty tao. Fe samby nivavake tami-ndranahare diso iaby ty olo tao noho ty ta-Babela tany. Tsy nanahake an’​i Noa noho Sema anake lahine, nazoto nanompo an’​i Jehovah, ty olo nipetrake tamy tanà reo tao.

Nimaty Noa laha fa nifeno 350 tao, tafara safodrano be iny. Roe tao tafara atoy, le naterake ami’​zay lahilahy hitanao amy sary toy eto. Olo niavake sady tean’​i Jehovah Andranahare bibike ie. Abrahama ty anarane, nipetrake niarake tami’​ty fianakaviane ta-Ora tao ie.

Abrahama manenty kinta

Nivòla tamin’​i Abrahama Andranahare ndraike andro hoe: ‘Mialà amy tany Ora toy iha, ka andeso miarake aminao fianakavianao reo. Mandehàna amy faritse hatoroko anao zay nareo.’ Ino ty nataon’​i Abrahama? Nanorike ty safà-Ndranahare va ie ka niala tami’​ty fiaìna nampiada aze ta-Ora tao? Eka, nanao raha zay ie. Nama-Ndranahare ty nahaìzan’​olo an’​i Abrahama, satria nanorike avao ty safà-Ndranahare ie.

Niarake tamin’​i Abrahama ty sasane amy fianakaviane laha fa niala ta-Ora tao ie. Nanarake aze ohatse Tera baban’​i Abrahama, noho Lota ana’​ty rahalahine. Niarake tamin’​i Abrahama kea, Saraha valine. Laha fa nandeha ty fotoa le niavy tamy toera raike atao hoe Harana zay roze. Tao ro nahafaty an’​i Tera. Fa lavitse an’​i Ora roze amin’​io.

Niala ta-Harana tao Abrahama noho ty fianakaviane tsy ela tafara fotoa io, ka nandeha tamy tanà raike atao hoe Kanana zay. Tao ro nivolànan’​i Jehovah tamine hoe: ‘Toy tany hameako ty tarananao zao.’ Nijàno ta-Kanana tao Abrahama ka nipetrake tanaty tranolay.

Nanomboke nanampy an’​i Abrahama Andranahare soa hanànane aondry noho biby karazane maro voho mpanompo an-jatone. Fe tsy niterake roze amin’​i Saraha.

Laha fa 99 tao Abrahama, le nivòla tamine Jehovah hoe: ‘Mampitamà anao aho fa ho rae’​ty firenena maro iha.’ Fomba manao akore ro hahatanterake raha zay, satria fa antitse biby Abrahama noho Saraha henany zao ka fa tsy afake hiterake?

Genesisy 11:​27-32; 12:​1-7; 17:​1-8, 15-17; 18:​9-19.



Fanontanea

  • Olo nanao akore ro nipetrake tamy tanàn’​i Ora tao?
  • Ia lahilahy amy sary io? Nombìa ie ro naterake? Nipetrake taìa ie?
  • Ino ty raha nampanaòvi-Ndranahare an’​i Abrahama?
  • Nanino Abrahama ro nokaìhy hoe nama-Ndranahare?
  • Ia ty niarake tamin’​i Abrahama laha fa niala ta-Ora tao ie?
  • Ino ty raha novolàni-Ndranahare tamin’​i Abrahama laha fa niavy ta-Kanana tao ie?
  • Nampitamà ino an’​i Abrahama, Andranahare laha fa nifeno 99 tao ie?

Fanontanea Fanampine

  • Vakio Genesisy 11:​27-32.

    Mpi-ino va Abrahama noho Lota io? (Gen. 11:​27)

    Tera ro volàny fa nanday ty fianakaviane nifindra ta-Kanana tao, fe ino ty ahaìzantsika fa Abrahama ro nitarike an-droze hifindra ane? Ino ty antone nanaòvane raha zay? (Gen. 11:31; Asa. 7:​2-4)

  • Vakio Genesisy 12:​1-7.

    Nataon’​i Jehovah tamin’​ia kea fifanekea nataone tamin’​i Abrahama iny laha fa niavy ta-Kanana tao Abrahama? (Gen. 12:​7)

  • Vakio Genesisy 17:​1-8, 15-17.

    Ia ty anara nanovà ty anaran’​i Abrama laha fa 99 tao ie? Ino ty antone? (Gen. 17:​5)

    Ino ty fitahia nampitamànin’​i Jehovah, fa hataone amin’​i Saraha? (Gen. 17:​15, 16)

  • Vakio Genesisy 18:​9-19.

    Ino ty raha tokone hatao’​ty rae arake ty hita amy Genesisy 18:19 ao? (Deot. 6:​6, 7; Efes. 6:​4)

    Ino ty raha niseho tamin’​i Saraha, ahità fa tsy afake mamòny ndra ino ndra ino amin’​i Jehovah tsika? (Gen. 18:​12, 15; Sal. 44:​21)