Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 11: Avana Voalohane

Tantara 11: Avana Voalohane

HAINAO va ty raha voalohane nataon’​i Noa noho ty fianakaviane laha fa niboake baka anaty sambofiara tao roze? Nanao soro na fanomeza ho an’​Andranahare roze. Hitanao amy sary ambany eto raha zay. Nanao soro biby Noa mba hisaòra an’​Andranahare tamy nanavòtane ty fianakaviane tamy safodrano be iny.

Sambofiara noho avana

Arake ty hevitsinao, nahafaly an’​i Jehovah va fanomeza io? Eka, nahafaly aze. Nampitamà an’​i Noa kea Andranahare fa tsy handripake tany toy amy safodrano sasy.

Tsy ela le nimaike ty tany, ka afake niala tanaty sambofiara tao Noa noho ty fianakaviane mba hanomboke fiaìna vaovao. Nitahy an-droze Andranahare sady nivòla tamin-droze hoe: ‘Miteraha maro! Mitomboa nareo ka, fenò olo ty tany manontolo!’

Fe afara atoy, laha fa haharé safodrano be iny ty olo, le mety hatahotse tsy no ho hisy safodrano manahake an’​iny ndraike amy manarake. Ka le nanome famantàra Andranahare soa hahatiarova’​ty olo raha nampitamànine an’​i Noa iny hoe: tsy handripake ty tany amy safodrano sasy ie. Hainao hoe ino raha nome-Ndranahare ho famantàra io? Avana raha io.

Noa noho ty fianakaviane

Hita an-danitse eny avana io laha fa miposaky ty masoandro afara’​ty filatsàha’​ty ora. Mana loko soa maro avana io. Mbo tsy nahita raike va iha? Henteo azy amy sary eto toy.

Zao ty raha nampitamàni-Ndranahare: ‘Mampitamà aho fa tsy handripake ty olo noho ty biby amy safodrano sasy. Asiako avana an-danitse eny, soa laha fa miseho eny raha io le ho hitako, ka ho ­tiaroko safà nampitamàniko iny.’

Ino ty raha tiaronao laha fa mahita avana iha? Mahatiaro ty safà nampitamàni-Ndranahare iny tsika, hoe tsy handrava tontolo toy amy safodrano be sasy ie.

Genesisy 8:​18-22; 9:​9-17.



Fanontanea

  • Arake ty hita amy sary io, ino ty raha voalohane nataon’​i Noa laha vo niboake baka anaty sambofiara tao ie?
  • Tafara Safodrano iny, ino ty raha nampanaòvi-Ndranahare an’​i Noa noho ty fianakaviane?
  • Nampitamà ino Andranahare?
  • Ino ty raha tokone ho tiarontsika, laha fa mahita avana tsika?

Fanontanea Fanampine

  • Ino ty raha tokone ho tiarontsika, laha fa mahita avana tsika?

    Amy fomba manao akore ro anomezantsika an’​i Jehovah ty “hanitse teane” henany zao? (Gen. 8:​21; Heb. 13:​15, 16)

    Manao akore ty fahitàn’​i Jehovah ty fon’​olombelo? Ino ty raha tokone hataontsika? (Gen. 8:​21; Matio 15:​18, 19)

  • Vakio Genesisy 9:​9-17.

    Ino ty fifanekea nataon’​i Jehovah tamy raha iaby an-tany etoy? (Gen. 9:​10, 11)

    Tampitsy ombìa fifanekea mikasike avana io? (Gen. 9:​16)