Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 33: Fiampità Riake Mena

Tantara 33: Fiampità Riake Mena

HENTEO moa ty raha miseho eto! Henjànin’​i Mosesy amy Riake Mena io eo tehine iny. Israelita, aze olo sasane miarake amine amy sary raike eto io. Fe ripake tan-driake tao iaby Farao noho ty tafine. Ndao ho henteantsika ty nahavy raha zay.

Miaramila Ejipsiana nilentike an-drano

Arake ty fa nianarantsika, le fa nivòla tamin’​Israelita reo Farao mba hiala ta-Ejipta tao, tafara nandefasa-Ndranahare loza fahafolo iny. Lahilahy Israelita 600 000 teo ho eo ro nandeha, ankoatse ty ampela noho ty anak’​ajà. Nisy olo hafa maro kea nino an’​i Jehovah, ka niarake tamin’​Israelita reo. Nandesin-droze niarake amin-droze iaby ty aondry noho ty aosy voho ty aombin-droze.

Taloha’​ty nandehànan-droze, le nangatake ravake volamena noho volafoty tamin’​Ejipsiana reo ty Israelita. Vo baka nahita loza farane iny Ejipsiana reo ka navàka bibike. Ze raha iaby nangatahin’​Israelita reo tamine, le namean-droze iaby.

Laha fa afake andro vitsivitsy, le niavy tamy Riake Mena teo ty Israelita. Nijàno teo roze. Tamy fotoa io le naneny tamy nandefasane Israelita reo, Farao noho ty vahoakine, ka hoy ty asane hoe: ‘Nengàntsika handeha andevontsika reny!’

Niova hevitse ndraike Farao, ka nalàne malaky ty sôvaline noho ty saretine miarake ami’​ty miaramilane, ka nandeha nanarake Israelita reny roze. Baka afaran’​Israelita reny tao roze miarake amy sarety matanjake 600, ankoatse ty sarety hafa ta-Ejipta tao.

Laha fa nahita Ejipsiana reny tafaran-droze tao ty Israelita, le navàka biby, satria tsy nahita lala handehàna sasy roze. Riake Mena io avao ro tanilan-droze teo; Ejipsiana reny fa mihamanànto baka afara ao. Fe nampiasa rahona Jehovah mba hampisaràha mpanompone reo noho ty Ejipsiana. Ka le tsy afake nahita ty Israelita ty Ejipsiana no sady tsy afake nanafike an-droze kea.

Bakeo novolànin’​i Jehovah ndraike Mosesy, mba hanenja tehine iny amy Riake Mena eo. Laha fa nataon’​i Mosesy raha zay, le nasian’​i Jehovah tsioke mahery baka antinàna ane. Nisarake roe riake iny, ka samby voatanjaky tan-tsisine roe teo iaby ty rano.

Nanomboke nandeha tamy tany maike amy riake iny ty Israelita. Lera maro ro nilàny tamy fandehanan’​olo an-tapitrisa reo noho ty bibine iaby tamy tany maike anivo riake iny teo. Nandeha niada soa roze mba hiampità an-tety eny. Farane, le nihita Ejipsiana reny ndraike ty Israelita, nilay an-droze, ka le nanorike Israelita reo baka afara ato roze.

Laha fa nanao raha zay roze, le natao-Ndranahare ty tsy handehàna’​ty saretin-droze. Nanomboke natahotse ty Ejipsiana sady nikiakiake hoe: ‘Ndao tsika hiala eto! Mialy amintsika Jehovah mba hanavòtane Israelita reo!’ Fe fa tara maré ty hanaòva raha zay henany zao.

Nivòla tamin’​i Mosesy Jehovah mba hanenja tehine iny amy Riake Mena eo, arake ty hitanao amy sary toy eto. Ka laha fa nanao raha zay Mosesy, le nanomboke nimpòly tamy pilasine taloha rano iny, ka le nilentike tao iaby Ejipsiana reny noho ty saretin-droze. Nanarake ty Israelita tanaty riake tao iaby ty tafikin’​i Farao, ka tsy nisy Ejipsiana nivelo ndre raike aza!

Faly bibike ty mpanompo-Ndranahare laha fa niavotse! Nanao hira fisaòra an’​i Jehovah ty lahilahy, ka nanao hoe: ‘Nandresy Jehovah. Navarine tanaty riake tao iaby ty sarety noho ty mpitikitse aze.’ Nangalake aponga Miriama zokin’​i Mosesy iny, ka nanarake aze iaby ty ampela hafa, nititike aponga baka afarane ao. Nitsinjake soa iaby roze, sady faly noho nihira hira natao lahilahy reny hoe: ‘Nandresy Jehovah. Navarine tanaty riake tao iaby ty sarety noho ty mpitikitse aze.’

Eksodosy toko faha-​12 zisiky amy toko faha-​15.



Fanontanea

  • Nisy firy ty lahilahy noho ampela voho ajà israelita niala ta-Ejipta tao? Ia koa ty olo hafa niarake tamin-droze?
  • Nanao akore Farao laha fa nengàne nandeha Israelita reny? Ino ty raha nataone laha fa bakeo?
  • Tsy tean’​i Jehovah ho tratsin’​Ejipsiana reo, ty Israelita. Ka ino ty raha nataone?
  • Ino ty raha niseho laha fa nampahitìn’​i Mosesy tamy Riake Mena eo tehine iny? Ino koa ty raha nataon’​Israelita reo?
  • Ino ty raha niseho laha fa nanìa Israelita reo tanaty riake tao ty Ejipsiana?
  • Tamy fomba manao akore ro nampisehoan’​Israelita reo fa faly bibike tami’​ty fanavòta nataon’​i Jehovah an-droze roze?

Fanontanea Fanampine

  • Vakio Eksodosy 12:​33-36.

    Tao maro ty naha-andevo Israelita reo ta-Ejipta ane. Ka ino ty raha nataon’​i Jehovah ho an-droze mba ho valy raha zay? (Eks. 3:​21, 22; 12:​35, 36)

  • Vakio Eksodosy 14:​1-31.

    Misy mpanompo-Ndranahare maro hanatri-maso aly Hara-magedona hoavy io. Ino ty raha azon-droze antoke laha fa mamaky safàn’​i Mosesy amy Eksodosy 14:​13, 14 ao io roze? (2 Tant. 20:17; Sal. 91:​8)

  • Vakio Eksodosy 15:​1-8, 20, 21.

    Nanino ty mpanompo-Ndranahare ro tokone hanao hira fiderà ho an’​i Jehovah? (Eks. 15:​1, 2; Sal. 105:​2, 3; Apok. 15:​3, 4)

    Amy fomba manao akore ro tokone hiderà’​ty ampela kristiana an’​i Jehovah, manahake ty nataon’​i Miriama noho ty ampela hafa, tanila Riake Mena iny teo? (Eks. 15:​20, 21; Sal. 68:​11)