Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 31: Namonjy An’​i Farao Mosesy Noho Arona

Tantara 31: Namonjy An’​i Farao Mosesy Noho Arona

LAHA fa nimpòly ta-Ejipta ane Mosesy, le nitantara tamin’​i Arona rahalahine mikasike fahagagà iaby reny. Ka laha fa nampiseho fahagagà reo tamin’​Israelita reo Mosesy noho Arona, le nino iaby ty olo hoe miarake amin-droze Jehovah.

Bakeo namonjy an’​i Farao Mosesy noho Arona. Hoy ty asan-droze: ‘Jehovah Andranaharen’​Israely nivòla hoe: “Engào ty mpanompoko handeha anaty telo andro, mba hahafahan-droze manao fanompoam-pivavàha ho ahy an’​efitsy ane.” ’ Fe namaly Farao hoe: ‘Tsy haiko mihitsy Jehovah zao, ka tsy hengàko handeha ty Israely.’

Neloke biby Farao, satria nila fotoa tamine mba hivavàha amin’​i Jehovah ty olo. Ka le nataon’​i Farao forosé hiasa mafy vahoake reo. Nitarày tamin’​i Mosesy ty Israelita mikasike ty fandesa an-droze amy fomba raty, ka le nalahelo biby Mosesy. Fe nivòla tamine Jehovah mba tsy ho kivy. ‘Hataoko ze handefasan’​i Farao ty mpanompoko’, hoy Jehovah.

Mosesy noho Arona tamy Farao teo

Namonjy an’​i Farao ndraike Mosesy noho Arona. Tamy fotoa io ro nanaòvan-droze fahagagà. Natorakin’​i Arona tamy tany ty tehine, ka nanjary bibilava bevata bibike. Fe mba nanao kea ty olo fangalàn’​i Farao torohevitse ka nanorake ty tehin-droze, le nanjary bibilava koa. Mba henteo tseky moa! Bibilavan-dr’​i Arona iny le nihina ty bibilavan’​olo mpanome torohevitse an’​i Farao reny. Fe mbo tsy nalefan’​i Farao avao Israelita reo.

Avy henany io ty fotoa hampianaran’​i Jehovah an’​i Farao. Hainao va hoe fomba manao akore ro hanaovane raha zay? Handefa loza folo Jehovah, ka hahita fahasahiràna bevata Ejipsiana reo.

Laha fa niseho ty maromaro tamy loza reo, le nampikaike an’​i Mosesy Farao, ka nanao hoe: ‘Ajanòno ami’​zay loza io, fa halefako ty Israely.’ Fe laha fa nijàno loza reny, le niova hevitse ndraike Farao. Tsy nengàne handeha ty olo. Fe, tafara loza fahafolo iny, vo nalefan’​i Farao ami’​zay Israelita reny.

Hainao va hoe ino iaby loza folo reo? Ndao hianarantsika ty mikasike raha reo.

Eksodosy 4:​27-31; 5:​1-23; 6:1-13, 26-30; 7:1-13.



Fanontanea

  • Nanao akore Israelita reo laha fa nahita an’​i Mosesy noho Arona nanao fahagagà?
  • Ino ty raha novolànin’​i Mosesy noho Arona tamin’​i Farao, fe ino ty navaly Farao an-droze?
  • Ino ty raha niseho laha fa natorakin’​i Arona ty tehine, arake ty hita amy sary eo?
  • Tamy fomba manao akore ro nampianaran’​i Jehovah an’​i Farao? Ino ty raha nataon’​i Farao laha fa nahazo anatse zay?
  • Ino ty raha niseho tafara loza fahafolo iny?

Fanontanea Fanampine

  • Vakio Eksodosy 4:​27-31 noho 5:​1-23.

    Ino ty tean’​i Farao ho volàny amy hoe: “Tsy haiko mihitsy Jehovah zao”? (Eks. 5:​2; 1 Sam. 2:12; Rom. 1:​21)

  • Vakio Eksodosy 6:​1-13, 26-30.

    Ino ty antone ivolàna fa tsy mbo nambaran’​i Jehovah tamin’​i Abrahama, Isaka, noho Jakoba ty mikasikasike aze? (Eks. 3:​13, 14; 6:​3; Gen. 12:​8)

    Nihevitse ty vatane ho tsy mahay ty asa nampanaòvin’​i Jehovah aze mihitsy Mosesy, fe mbo nampiasan’​i Jehovah avao. Mahavy antsika hieritseritse ino raha zay? (Eks. 6:​12, 30; Lioka 21:​13-15)

  • Vakio Eksodosy 7:​1-13.

    Nahasaky nivòla ty didim-pitsaràn’​i Jehovah tamin’​i Farao, Mosesy noho Arona. Tokone hanao ino kea ty mpanompo-Ndranahare mba hanahàfa an-droze? (Eks. 7:​2, 3, 6; Asa. 4:​29-31)

    Tamy fomba manao akore ro nampisehoan’​i Jehovah, fa mbo anabo mandilatse andranahare ejipsiana reo ie? (Eks. 7:12; 1 Tant. 29:​12)