Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 28: Ty Fomba Nanavòta An’​i Mosesy

Tantara 28: Ty Fomba Nanavòta An’​i Mosesy

HENTEO moa anak’​ajà kelikele tomàny noho mitanjake tanan’​ampela io. Mosesy io. Hainao va hoe ia ampela soa eo io? Anak’​ampela’​ty mpanjakan’​i Ejipta io, anak’​ampelan’​i Farao.

Anak’ampela Farao nahita an’i Mosesy

Navònin-drenine tanaty telo vola ajà io, satria tsy teane hovonò’​ty Ejipsiana. Fe nihaine fa mety ho tratsy Mosesy, ka io ty raha nataone mba hanavòtane aze.

Nangalake panié ie, ka namboarine soa, ami’​zay tsy hilìran-drano. Nampilìrine tao Mosesy, bakeo nengàne tan-tsisy Ranon’​i Neily teo panié nisy aze iny. Nivòla tamin’​i Miriama, anabavin’​i Mosesy, renin-droze iny, mba hitsanga marinirinike teny ami’​zay hahita ty raha hiseho.

Tsy ela tafarani’​zay, le nijòbo tamy Ranon’​i Neily tao anak’​ampelan’​i Farao iny mba hiandro. Nahita panié tanaty zozoro tao ie. Nikaike ty raike tamy mpanompovavine reny ie, ka nanao hoe: ‘Ndahàna alao ho ahy panié roy.’ Laha fa nosokafine panié iny, le nahita anak’​ajà kelikele soasoa tao ie! Nitàny Mosesy ka niferenesa anak’​ampelan’​i Mpanjaka io. Tsy teane ty hamonòa aze.

Bakeo, niavy Miriama, hita amy sary eo io. Nanontanian’​i Miriama anak’​ampelan’​i Farao io hoe: ‘Handeha hikaike ampela israelita hikarakara ajà io ho anao va aho?’

Eka, mandehàna’, hoy anak’​ampelan’​i mpanjaka iny.

Nandeha tamy renine ane malaky Miriama mba hivòla aze. Ka laha fa niavy tamy anak’​ampelan’​i mpanjaka teo renin’​i Mosesy iny, le hoy ty asa anak’​ampelan’​i mpanjaka iny hoe: ‘Rambeso ajà toy, ka tezào soa, fa ho karamàko iha.’

Afake nikarakara ty anane avao renin’​i Mosesy iny. Ka laha fa nihabe Mosesy, le nandesine tamy anak’​ampelan’​i Farao tane. Natsanga anan’​i Farao io ho anane Mosesy. Zay ty antone nahavy an’​i Mosesy ho be tan-tranon’​i Farao tao io.

Eksodosy 2:​1-10.



Fanontanea

  • Ia anak’​ajà kelikele amy sary io? Tanan’​ia tanjahane eo io?
  • Ino ty raha natao’​ty renin’​i Mosesy mba hiaròva aze tsy ho maty?
  • Ia ajà ampela amy sary io? Ino ty raha nataone?
  • Ino ty raha novolànin’​i Miriama, laha fa nihita anak’​ampelan’​i Farao iny, anak’​ajà kelikele io?
  • Ino ty raha novolàny anak’​ampela mpanjaka io tamy renin’​i Mosesy?

Fanontanea Fanampine

  • Vakio Eksodosy 2:​1-10.

    Ino iaby ty raha niazo renin’​i Mosesy io nampianary an’​i Mosesy, tamin’​i Mosesy mbo nikelikele? Ino koa ty fianara azo’​ty rae amin-drene baka amy raha zay? (Eks. 2:​9, 10; Deot. 6:​6-9; Ohab. 22:​6; Efes. 6:​4; 2 Tim. 3:​15)