Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 25: Nifindra Ta-Ejipta ane ty Fianakavia

Tantara 25: Nifindra Ta-Ejipta ane ty Fianakavia

TSY nitantin’​i Josefa sasy raha iny farane. Novolànine iaby mpiasane reo mba hiboake baka an-trano ao. Laha fa ie raike avao ro tao niarake tamy rahalahine reny, le nanomboke nitàny Josefa. Nitserike biby rahalahine reny, laha fa nahita aze nitàny, satria tsy hain-droze hoe ino ty antone nampitàny aze. Farane le nivòla Josefa hoe: ‘Zaho ro Josefa. Mbo velo avao va babako zay?’

Tserike biby rahalahine reny, ka tsy nisy nahafivòla. Natahotse roze. Fe nivòla Josefa hoe: ‘Avia bakao nareo.’ Laha fa namonjy an’​i Josefa roze, le nivòla ie hoe: ‘Zaho Josefa rahalahinareo, aze navilinareo ta-Ejipta atoy iny.’

Tsy neloke Josefa fa mbo nisoa fanahy tamy rahalahine reo, ka nanao hoe: ‘Ka maneny ty namaròtanareo ahy atoy nareo. Andranahare mihitsy ro nandefa ahy ho a-Ejipta atoy mba hanavotse ty olo. Nataon’​i Farao ho mpitarike ty tany iaby aho. Ka, mandehàna malaky nareo mimpòly amy babako ane, tantarao amine iaby ty raha nihitanareo. Volàno kea ie hoavy atoy noho hipetrake eto.’

Nofihìnin’​i Josefa tami’​ty tanane rahalahine reny, bakeo niorofane iaby. Laha fa nirén’​i Farao fa niavy ao iaby rahalahin’​i Josefa reny, le nivòla tamin’​i Josefa ie hoe: ‘Ameo kalesy roze ka alefaso hangalake an’​i babanareo noho ty fianakavianareo iaby, ho atoy. Hameako tany soa biby a-Ejipta etoa roze.’

Notanterahin-droze raha zay. Hitanao amy sary eto Josefa noho ty babane mifankahita laha fa niavy ta-Ejipta ane ty fianakaviane iaby.

Nanjary maro biby ty fianakavian’​i Jakoba. Nisy 70 ty fitambaran-droze iaby nifindra ta-Ejipta ane, tanaty raha zay ohatse Jakoba noho ty anane voho ty zafine. Fe tao kea ty ampela valin-droze, noho ty mpanompone. Roze iaby reo ro nifindra ta-Ejipta ane. Nokaìhy hoe Israelita roze, satria fa novà-Ndranahare hoe Israely ty anaran’​i Jakoba. Nanjary olo niavake tami-Ndranahare ty Israelita, ka zay ro henteantsika amy tantara manarake ao.

Genesisy 45:​1-28; 46:​1-27.

Josefa noho ty fianakaviane


Fanontanea

  • Ino ty raha niseho laha fa nivòla tamy rahalahine reo Josefa hoe ia ie?
  • Ino ty raha nohazavàn’​i Josefa soa tamy rahalahine reo?
  • Ino hoasan’​i Farao laha fa naharé resake mikasike rahalahin’​i Josefa reo ie?
  • Nanao akore ty hamaroa’​ty fianakavian’​i Jakoba laha fa nifindra ta-Ejipta ao roze?
  • Ino ty anara nikaìha fianakavian’​i Jakoba reo laha fa tafara atoy. Ino ty antone?

Fanontanea Fanampine

  • Vakio Genesisy 45:​1-28.

    Hain’​i Jehovah ty manova ty raha raty natao hampijalia ty mpanompone hanjary ho soa. Manao akore ty fomba iresàha’​ty Baiboly raha zay amy tantaran’​i Josefa ao? (Gen. 45:​5-8; Isaia 8:10; Fil. 1:​12-14)

  • Vakio Genesisy 46:​1-27.

    Ino ty raha nampitamànin’​i Jehovah an’​i Jakoba, laha mbo tan-dala ho a-Ejipta ane iny roze? (Gen. 46:​1-4.)