Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 21: Tsy Tea An’​i Josefa ty Rahalahine

Tantara 21: Tsy Tea An’​i Josefa ty Rahalahine

MALAHELO noho kivy ajà lahilahy toy. Josefa io. Navili’​ty rahalahine tamin’​olo handeha a-Ejipta ane ie. Ho andevo Josefa laha fa avy ane. Nanino rahalahine iaby reo ro nanao raha raty zay? Satria nialònan-droze Josefa.

Josefa navilin’ny rahalahine reo

Nitea an’​i Josefa bibike Jakoba, ka nasehone fitiavane aze zay, laha fa nanamboatse akanjo soa ho aze ie. Laha fa nihita rahalahine folo reny fa tean’​i Jakoba biby Josefa, le nanomboke nialo noho tsy tea aze roze. Fe nisy antone raike hafa kea tsy nitiavan-droze an’​i Josefa.

Nanonofy indroe Josefa. Tamy nofin’​i Josefa roe reo, le niankohoke noho nandohalike tamine teo iaby ty rahalahine. Ka laha fa nitantara nofy reo tamy rahalahine Josefa, le nanjeky ty tsy fitiavan-droze aze.

Laha fa niarake ty aondrin’​i Jakoba babane tan’​ala tany ty zokin’​i Josefa ndraike andro, le nanirake an’​i Josefa hanenty ty rahalahine Jakoba mba hahaìza ty vaovao mikasike an-droze. Ka laha vo nahita an’​i Josefa rahalahine reny, le nanao hoe: ‘Ndao ho vonòntsika ie!’ Fa Robena, aze talanolo iny, ro nivòla hoe: ‘Ka manao ho’​zao nareo!’ Tsy namono an’​i Josefa roze fa nofehezin-droze ie, le natorane tanaty vovo maike zay tao. Nipetrake roze laha fa bakeo mba hanapa-kevitse ty raha hatao an’​i Josefa.

Tamy fotoa io, le nisy Isimaelita nandalo teo. Nivòla tamy rahalahine reny Joda hoe: ‘Ndao havilintsika amin’​Isimaelita reto ie.’ Ka le zay vatane ro nataon-droze. Navìly farantsa volafoty 20 Josefa. Raty say noho tsy tea olo mihitsy roze!

Ino ty fanazavà hovolàny rahalahin’​i Josefa reo amin’​i Jakoba? Ho’​zao ty raha nataon-droze: namono aosy raike roze, bakeo najìan-droze tamy akanjon’​i Josefa soasoa iny teo lion’​aosy iny. Nandesine tamin-drane tany ankajo feno lio iny laha fa bakeo. Nivòla roze hoe: ‘Toy ty raha nihitanay, mba henteo vasa akanjon’​i Josefa iny toy na tsy ie.’

Nihain’​i Jakoba akanjo iny. Nitàny maré biby ie sady nikiakiake hoe: ‘Mati’​ty bibi-dia Josefa!’ Zay mihitsy hevitse tea rahalahin’​i Josefa reo hoeritseretin’​i Jakoba, baban-droze io. Nitany anane io tanaty fotoa maro Jakoba. Fe, Josefa tsy raha nimaty iaby. Ino ty raha niseho tamine laha fa ta-Ejipta ane?

Genesisy 37:​1-35.



Fanontanea

  • Ino ty antone nialòna rahalahin’​i Josefa reo aze? Ino ty raha nataon-droze?
  • Fa ho natao rahalahine reo ino Josefa? Fe ino hoasan’​i Robena?
  • Ino ty raha niseho laha fa nisy Isimaelita nandalo?
  • Tea rahalahin’​i Josefa reo ty hieritsereta baban-droze iny hoe maty Josefa. Ka, ino ty raha nataon-droze?

Fanontanea Fanampine

  • Vakio Genesisy 37:​1-35.

    Laha fa misy olo manao raha tsy mety amy fiangona ao, ino ty raha tokone hatao’​ty Kristiana mba hanahàfa ty ohatse nengàn’​i Josefa? (Gen. 37:​2; Lev. 5:​1; 1 Kor. 1:​11)

    Nanino rahalahin’​i Josefa reo ro namitake aze? (Gen. 37:​11, 18; Ohab. 27:​4; Jak. 3:​14-16)

    Misy fihetsike azo atao nasehon’​i Jakoba, laha fa nalahelo ie. Ino raha zay? (Gen. 37:​35)