Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 20: Nahita Fahasahiràna Dina

Tantara 20: Nahita Fahasahiràna Dina

HITANAO va hoe handeha hamangy an’​ia Dina? Handeha hanenty ty sasane tamy somonjara mipetrake a-Kanana ao reo ie. Hahafaly an’​i Jakoba babane va raha zay? Mba hamalia fanontanea zay, le tiaròvo tseky ty fomba fihevitsin’​i Abrahama noho Isaka mikasike ampela nipetrake ta-Kanana tao reny.

Dina namangy ampela Kananita

Naniry ty hanambalian’​i Isaka ampela baka Kanana ao va Abrahama? Aha. Nitean’​i Isaka noho Rebeka hanambaly ampela kananita va Jakoba, anake lahin-droze iny? Aha. Hainao va ty antone?

Satria, nanompo andranahare diso olo ta-Kanana tao reo. Tsy nisy olo soa azo novalỳ ty tao, sady tsy nisy olo azo natao nama marinike. Ka azontsika antoke fa tsy ho tean’​i Jakoba hinama amy somonjara kananita reo koa anak’​ampelane io.

Azo antoke fa nahita fahasahiràna Dina. Hitanao va lahilahy kananita manenty an’​i Dina amy sary io? Sekema ty anarane. Ndraike andro, laha fa nandeha tany ndraike Dina, le nataon’​i Sekema forosé mba handry miarake amine. Raty bibike raha nataone zay, satria ty mpivaly avao ro tokone hiarake handry. Nanday fahasahiràna hafa kea fomba raty nataon’​i Sekema tamin’​i Dina io.

Laha fa niré anadahin’​i Dina reny ty raha niseho, le neloke biby roze. Neloke maré ty roe tamin-droze, Simeona noho Levy, ka nangalake mesobe sady nandeha tamy tanà io tany mba hanatràtsy lahilahy reo tampotampoke. Novonòn-droze Sekema noho ty rahalahine miarake amy lahilahy hafa kea. Neloke Jakoba laha fa naharé raha raty nataon’​anane reo.

Nanao akore ty fomba nanomboha fahasahiràna reo? Nanomboke raha io, laha fa ninama tamin’​olo tsy mpanorike ty lalà-Ndranahare Dina. Tsy ho teantsika kea ty hana nama manahake zay, sa tsy zay?

Genesisy 34:​1-31.



Fanontanea

  • Ino ty antone tsy nitiavan’​i Abrahama noho Isaka hanambalea’​ty anan-droze olo baka amy tany Kanana ao io?
  • Tean’​i Jakoba va ty hinamà anak’​ampelane iny ampela kananita reo?
  • Ia lahilahy manenty an’​i Dina amy sary io? Ino ty raha raty nanòvine?
  • Ino ty raha nataon’​i Simeona noho Levy, anadahin’​i Dina reny, laha fa naharé ty raha niseho roze?
  • Nitean’​i Jakoba va ty raha nataon’​i Simeona noho Levy io?
  • Nanao akore ty nanomboha fahasahiràna maro tamy fianakavia io tao?

Fanontanea Fanampine

  • Vakio Genesisy 34:​1-31.

    Ino va ty antone ivolàna fa baka amin’​i Dina avao ro nahavy aze tsy ho virijiny sasy, laha fa nisy nandrava aze? (Gal. 6:​7)

    Atoro’​ty zatovo amy andro henany zao, fa nahazo anatse soa baka amy tantaran’​i Dina roze. Amy fomba manao akore ro ampisehoan-droze raha zay? (Ohab. 13:20; 1 Kor. 15:33; 1 Jaona 5:​19