Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 15: Nitolike Valin’​i Lota Iny

Tantara 15: Nitolike Valin’​i Lota Iny

NIARAKE nipetrake tamin’​i Abrahama ta-Kanana tany Lota noho ty fianakaviane. Nivòla tamin’​i Lota ho’​zao Abrahama ndraike andro: ‘Tsy ampy ho ahi’​ty bibintsika iaby tany eto toy. Ka laha teanao le, hisarake tsika. Laha mandeha aroy iha, le handeha atoy aho.’

Nitsinjo ty tany manodidy aze Lota ka nahita toera raike soa biby, nisy rano noho ahitse soa ho ahi’​ty bibine. Tany ro nifindràn’​i Lota noho ty fianakaviane noho ty bibine. Farane le nipetrake ta-Sodoma tao roze.

Raty fanahy biby, noho raty say, voho raty fomba ty olo ta-Sodoma tao. Lahilahy soa fanahy Lota ka nampalahelo aze raha zay. Nalahelo kea Andranahare. Farane, le nandefa anjele roe Andranahare ka niresake tamin’​i Lota anjele reo, fa ho avy Andranahare ka handrava an’​i Sodoma noho Gomora tanà marìny aze eo, satria fa raty maré ty sain’​olo tao.

Ho’​zao ty raha novolànin’​anjele reo tamin’​i Lota: ‘Mandehàna malaky iha! Andeso miarake aminao valinao noho anak’​ampelanao roe reo ka mialà etoa!’ Tsy nahataitse an’​i Lota noho ty fianakaviane loatse safà io, ka le notarihy anjele reo tan-tana roze mba hiboake tanà io. Bakeo nivòla ty raike tamy anjele reo: ‘Avòto ty ainareo! Ka mitolike mihitsy ­nareo! Lomaìsa maré, ka ndahàna mivòny amy vohitse roy ane, tsy no ho maty avao.’

Nanorike safàn’​anjele reo Lota noho ty anak’​ampelane, ka niala ta-Sodoma tao. Tsy nijanojano noho tsy nitolike mihitsy roze. Fa valin’​i Lota iny ro tsy nety, fa laha fa lavidavitse an’​i Sodoma roze, le nijàno ie bakeo nitolike. Ka le nanjary bolonga-tsira ie. Hitanao va ie amy sary toy eto?

Misy fianara azontsika baka amy tantara toy. Mampianatse antsika ie fa manavotse ze manorike ty safàne Andranahare, fa ze tsy maneke aze le ho maty.

Genesisy 13:​5-13; 18:​20-33; 19:​1-29; Lioka 17:​28-32; 2 Petera 2:​6-8.

Lota niala ta Sodoma


Fanontanea

  • Nanino Abrahama noho Lota ro nisarake?
  • Nanino Lota ro nifìly hipetrake ta-Sodoma tao?
  • Nanao akore ty olo ta-Sodoma tao?
  • Ino ty raha novolànin’​anjele roe reo tamin’​i Lota?
  • Nanino valin’​i Lota iny ro nanjary bolonga-tsira?
  • Ino ty fianara azontsika baka amy raha nahazo valin’​i Lota iny?

Fanontanea Fanampine

  • Vakio Genesisy 13:​5-13.

    Ino ty fianara azontsika tami’​ty raha nataon’i Abrahama laha misy ty tsy fifanaràha? (Gen. 13:​8, 9; Rom. 12:10; Fil. 2:​3, 4)

  • Vakio Genesisy 18:​20-33.

    Laha ty fomba nandaìsan’​i Jehovah an’​i Abrahama ro hentea, manino tsika ro afake matoky, fa hitsara arake ty marina Jehovah noho Jesosy? (Gen. 18:​25, 26; Matio 25:​31-33)

  • Vakio Genesisy 19:​1-29.

    Laha fitantarà amy Baiboly ao io ro hentea, manao akore ty fahità-Ndranahare ty fandria’​ty lahilahy samby lahilahy noho ty ampela samby ampela? (Gen. 19:​5, 13; Lev. 20:​13)

    Ino ty tsy nampitovy ty raha nataon’​i Lota noho Abrahama laha fa nanome torohevitse an-droze Andranahare? Ino ty fianara azontsika baka amy raha zay? (Gen. 19:​15, 16, 19, 20; 22:​3)

  • Vakio Lioka 17:​28-32.

    Akore ro fihevera valin’​i Lota iny ty hanàna? Ino koa ty fianara azontsika baka amy raha zay? (Lioka 12:15; 17:​31, 32; Matio 6:​19-21, 25)

  • Vakio 2 Petera 2:​6-8.

    Laha manahake an’​i Lota tsika, tokone hanao akore ty fahitantsika tontolo manodidy antsika tsy tea an’​Andranahare toy? (Ezek. 9:​4; 1 Jaona 2:​15-17)