Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 14: Notsapà-Ndranahare ty Finoan’​i Abrahama

Tantara 14: Notsapà-Ndranahare ty Finoan’​i Abrahama

HITANAO va hoe ino ty raha ataon’​i Abrahama eto? Misy meso an-tanane eny, sady atao hoe hamono anane io ty fanentea aze. Ino ty antone mety hanaòvane an’​io? Henteantsika tseky ty fomba nahazoan’​i Abrahama noho Saraha anake lahin-droze io.

Abrahama manao soro an’i Isaka

Tiaròvo, fa nampitamà an-droze Andranahare fa hanome anake lahy an-droze. Fe fa antitse maré Abrahama noho Saraha ka sarotse ty hampety raha zay. Fe ndra teo aza zay, le nino Abrahama fa afake manatanterake raha raike sarotse tanterahy Andranahare. Ka ino ty niseho?

Laha fa baka nampitamà an’​i Abrahama safàne io Andranahare le nandeha ty tao raike. Ka laha fa 100 tao Abrahama, voho 90 tao Saraha, le nanan’​anake lahy namea anara hoe Isaka zay roze. Notanterahi-Ndranahare vatane safà nampitamànine iny!

Fe laha fa nihabe Isaka, le notsapà-Ndranahare ty finoan’​i Abrahama. Nikaike ie hoe: ‘Abrahama!’ Namaly Abrahama hoe: ‘Toy aho!’ Nivòla Andranahare hoe: ‘Andeso Isaka, ananao lahitoka io, ka mandehàna amy vohitse raike hatoroko anao zay. Vonò ie, laha fa avy any nareo, ka anòvo soro ho ahy.

Nalahelo biby Abrahama naharé safà reo, satria teane biby Isaka. Tiaròvo fa nampitamà an’​i Abrahama Andranahare hoe hiparitake amy tany Kanana any ty taranane. Fe fomba manao akore ro hahatanterake raha zay laha ohatse ka maty Isaka? Tsy nazava tamin’​i Abrahama ty dika raha zay fe nanorike ty safà-Ndranahare avao ie.

Laha fa niavy tamy vohitse teny roze, le nofehezin’​i Abrahama Isaka ka napetrane tanabo alitara namboarine zay teo. Bakeo nangalake meso ie hamonoane an’​i Isaka, fe tamy fotoa io mihitsy ro nikaike anjeli-Ndranahare iny hoe: ‘Abrahama, Abrahama!’ Le namaly Abrahama hoe: ‘Toy aho!’

‘Ka mamono ndra manao raha hafa amy anake lahinao io’, hoy Andranahare. ‘Haiko henany zao fa mino ahy iha, satria tsy nandesinao nilay ahy ananao lahitoka io.’

Le vatane nana finoa bevata an’​Andranahare Abrahama! Nino ie fa tsy misy raha tsy hai-Ndranahare, sady natoky kea ie fa ndre maty aza Isaka, le mbo hai-Ndranahare ty mamelo aze ndraike. Fe tsy sitrapò-Ndranahare ty hamono an’​i Isaka. Ka natao-Ndranahare nisy aondry raike zay voafandrike tamy hazo marìny teo. Nivòla tamin’​i Abrahama ie mba hanao soro biby io fa tsy Isaka, anake lahine.

Genesisy 21:​1-7; 22:​1-18.



Fanontanea

  • Nampitamà ino an’​i Abrahama Andranahare? Tamy fomba manao akore ro nanatanterahane raha zay?
  • Arake ty hita amy sary io, ino ty fomba nitsapà-Ndranahare ty finoan’​i Abrahama?
  • Ino ty raha nataon’​i Abrahama ndra tsy haine aza ty dika raha nampanaòvi-Ndranahare aze io?
  • Ino ty raha niseho laha fa nampiboake meso hamonoane anane io Abrahama?
  • Nanao akore ty habe’​ty finoan’​i Abrahama an’​Andranahare?
  • Ino ty raha hafa namea-Ndranahare an’​i Abrahama mba hataone soro? Tamy fomba manao akore ro nanomezane raha zay?

Fanontanea Fanampine

  • Vakio Genesisy 21:​1-7.

    Nosavàrin’​i Abrahama anake lahine iny laha fa valo andro. Ino ty antone? (Gen. 17:​10-12; 21:​4)

  • Vakio Genesisy 22:​1-18.

    Tamy fomba manao akore ro nampisehoan’​i Isaka fa nanorike ty safàn’​i Abrahama, babane ie? Nifanandrify tamy raha bevata hafa, niseho tafara atoy raha zay. Hazavao. (Gen. 22:​7-9; 1 Kor. 5:​7; Fil. 2:​8, 9)