Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 8: Olo Farane ze Bevata Bibike Tan-tany Etoy

Tantara 8: Olo Farane ze Bevata Bibike Tan-tany Etoy

INO ty ho nieritseretinao laha nisy olo namonjy anao ka lava mandilatse tafotranonao io ie? Olo farane ze bevata bibike olo io! Nisy fotoa nisia’​ty olo farane ze bevata bibike tan-tany etoy. Atoro’​ty Baiboly fa anjele tan-danitse tany ty baban-droze. Ka fomba manao akore ro nampisy raha zay?

Olo farane ze bevata manerisere olo

Tiaròvo, fa anjele raty atao hoe Satana ro nampisy ty korònta. Fa nanandra nitarike ty anjeli-Ndranahare ho raty iaby aza ie. Laha fa nandeha ty fotoa le nanorike an’​i Satana ty sasane tamy anjele reo. Najànon-droze ty asa nampanaòvi-Ndranahare an-droze tan-danitse tany. Nijòtso ho an-tany etoy roze ka nanova ty vatan-droze ho vatan’​olombelo. Hainao va ty antone?

Volàni’​ty Baiboly fa nihita ana-Ndranahare reo fa ampela soa ty ampela tan-tany etoy, ka naniry hiarake hipetrake amine roze. Ka le nijòtso tan-tany etoy roze soa hanambaly ampela reo. Mivòla ty Baiboly fa raty raha zay, satria fa natao-Ndranahare hiay an-danitse ane ty anjele.

Laha fa niterake anjele reo noho ty valine, le niavake tami’​ty ajà hafa ty anan-droze. Tamy voalohane le tsy niavake loatse roze. Fe, laha fa nandeha ty fotoa le nitombo roze sady nihanatanjake zisiky naha olo farane ze bevata bibike an-droze.

Raty fanahy olo farane ze bevata bibike reo. Nampijaly olo roze, ­satria natanjake noho bevata. Noseriseren-droze ty olo, soa ho raty fanahy manahake an-droze.

Nimaty Enoka, fe nisy olo soa fanahy raike ndraike tan-tany etoy. Noa ty anara lahilahy io. Nanao ty raha nampanaòvi-Ndranahare aze avao ie.

Nivòla tamin’​i Noa Andranahare, ndraike andro, fa ho avy ty andro handripàhane ty olo raty fanahy. Fe nanavotse an’​i Noa noho ty fianakaviane noho ty karazam-biby maro Andranahare. Ndao ho henteantsika ty fomba nanaòva-Ndranahare raha zay.

Genesisy 6:​1-8; Joda 6.



Fanontanea

  • Ino ty raha niseho laha fa nijànjy an’​i Satana ty anjeli-Ndranahare sasane?
  • Nanino ty anjele sasane ro tsy niasa tan-danitse tany sasy, fa nijòtso ho an-tany etoy?
  • Tsy tokone hijòtso an-tany etoy ka hanova ty vatan-droze ho vatan’​olombelo ty anjele. Ino ty antone?
  • Ino va ty nampiavake, anan’​anjele reo io?
  • Arake ty hitanao amy sary io eo, ino ty raha natao anan’​anjele reny laha fa nihabe roze?
  • Ia ty olo soa fanahy niay tan-tany etoy tafaran’​i Enoka? Ino ty antone nitiava-Ndranahare aze?

Fanontanea Fanampine

  • Vakio Genesisy 6:​1-8.

    Misy vokane amin’​i Jehovah ty raha ataontsika. Manao akore ty fomba iresàha’​ty Genesisy 6:​6 raha zay? (Sal. 78:​40, 41; Ohab. 27:​11)

  • Vakio Joda 6.

    “Tsy nitanjake ty pilasine tam-boalohane tany” anjele tamy andron’​i Noa reny, fa nivalike tamin’​i Jehovah. Ino kea ty fianara azontsika baka ami’​ty raha nahazo an-droze? (1 Kor. 3:​5-9; 2 Pet. 2:​4, 9, 10)