Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 7: Lahilahy Raike Nahery Fo

Tantara 7: Lahilahy Raike Nahery Fo
Enoka

NIHANITOMBO ty olombelo tan-tany etoy, ka ty ankamaroane le nanao raha raty manahake an’​i Kaina. Fe nisy lahilahy raike niavake. Io lahilahy zao, Enoka ty anarane. Lahilahy nahery fo ie. Ty olo iaby nanodidy aze le nanao raha raty, fa Enoka ­nanompo an’​Andranahare avao.

Hainao va hoe nanino ty ankamaroan’​olo ro nanao raha raty? Diniho hoe, ia ro nahavy an’​i Adama noho Eva tsy hanorike ty safà-Ndranahare noho nampihìna hazo fa nandrarà an-droze iny? Anjele raty ie io. Satana ro ikaìha’​ty Baiboly aze. Ataone ze hahavy ty olo ho raty fanahy.

Halatsy noho famonoa olo

Ndraike andro Enoka le nirahin’​i Jehovah Andranahare hivòla tamin’​olo raha tsy tean-droze ho re mihitsy. Ho’​zao raha io: ‘Handripake ty olo raty fanahy Andranahare ndraike andro any.’ Azo antoke fa nimeloke bibike ty olo naharé raha zay. Mety fa nanandra hamono an’​i Enoka iaby aza roze. Ka, nila nana herim-po Enoka mba ho afake hanambara raha hatao-Ndranahare amy hoavy io.

Tsy nengà-Ndranahare hiay maharitse niarake amy vahoake raty fanahy reo Enoka. Niay tanaty 365 tao avao Enoka. Nanino tsika ro mivòla hoe “365 tao avao”? Satria, natanjake noho mbo velo mandilatse ty fotoa iaìnantsika henany zao ty olo tamy fotoa io. Eritsereto fa Metosela anan’​i Enoka iny ohatse, le nivelo tanaty 969 tao!

Olo manao raha raty

Laha fa nimaty Enoka, le nihananjeky ty faharatia’​ty olo. Mivòla ty Baiboly fa ‘raha raty avao ro an-tsain-droze ao’, ka ‘nanjary feno hasatà raty ty tany.’

Hainao va ty antone raike nahamaro ty fahasahiràna tan-tany etoy tamy fotoa io? Satria nahita fomba vaovao hitarìha ty olo hanao raty Satana. Hianatse mikasike an’​io tsika.

Genesisy 5:​21-24, 27; 6:​5; Hebreo 11:​5; Joda 14, 15.



Fanontanea

  • Ino ty nampiavake an’​i Enoka?
  • Nanino ty olo tamy andron’​i Enoka ro tea nanao raha raty?
  • Ino iaby ty raha raty nataon-droze? (Henteo sary io.)
  • Nanino Enoka ro nila herim-po?
  • Afake niay tanaty firy tao ty olo tamy fotoa io, fe firy tao avao ty andro niaìnan’​i Enoka?
  • Ino ty raha niseho laha fa nimaty Enoka?

Fanontanea Fanampine

  • Vakio Genesisy 5:​21-24, 27.

    Nanao akore ty fifankahazoan’​i Enoka tamin’​i Jehovah? (Gen. 5:​24)

    Laha ty Baiboly ro hentea, ia ty anara lahilahy farani’​ze nilava velo tan-tany etoy iny? Firy tao ie vo nimaty? (Gen. 5:​27)

  • Vakio Genesisy 6:​5.

    Nanao akore ty faharatia’​ty fiaìna tan-tany etoy tafara’​ty nahafatesan’​i Enoka? Ino ty hitantsika laha ampitovỳ ami’​ty fiaìna henany zao? (2 Tim. 3:​13)

  • Vakio Hebreo 11:​5.

    Ino ty toetsin’​i Enoka “nitea-Ndranahare”, ka ino ty vokane? (Gen. 5:​22)

  • Vakio Joda 14, 15.

    Amy fomba manao akore ro azo’​ty Kristiana anahàfa ty herim-pon’​i Enoka, laha fa manambara amin’​olo roze, fa marìny aly Hara-magedona zao? (2 Tim. 4:​2; Heb. 13:​6)