Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 10: Safodrano Be

Tantara 10: Safodrano Be

SAMBY nanohy ty fiaìnane manahake ty taloha avao ze olo tsy tamy sambofiara io tao. Tsy ninoan-droze fa hoavy Safodrano zao, ka le nimaty ty hehy roze. Fe tsy ela le nijàno fihehezan-droze zay.

Olo noho biby mialy ty ainy amy safodrano

Nilatsake tampoke ty ora, ka nirotsake maré bibike baka an-danitse ane. Marina ty raha novolànin’​i Noa! Fe fa tara maré henany zao ty hilìran’​olo anaty sambofiara io ao, fa nihilìan’​i Jehovah maré bibike ty varavara.

Tsy ela le nifeno rano ty toera ambany, ka niakatse tsikelikele rano iny, le nanjary rano be bakeo. Nandavo hazo maro noho nampikisake vato bevata, voho nantsitsìny biby rano be io. Navàka iaby ty olo. Nanganike tamy toera anabo roze. Laha mba nijànjy soa an’​i Noa moa roze, le afake nilitse tamy sambofiara io tamy fotoa tokone hilìra tao! Fe fa tara loatse ty fanaòva raha zay henany zao.

Nihaniakatse avao rano iny. Nirarake baka an-danitse ane tanaty 40 andro noho 40 haly ty ora. Tafakatse tamy sisy vohitse teny ty rano, ka tsy ela le rakotse iaby ndre vohitse farane abo bibike reny aza. Ka arake ty fa novolàni-Ndranahare le ho maty iaby ty olo noho ty biby tsy tanaty sambofiara io tao. Fa ze tanatine tao avao ro niavotse.

Soa ty nanamboaran’​i Noa noho ty anake lahine sambofiara io. Nandesy rano iny sambo io, sady nahàfone. Ka ndraike andro, laha fa tsy nilatsake sasy ty ora, le niposake ty masoandro. Nahatserike raha zay! Rano be avao ro nameno tany toy. Ka sambofiara iny avao ro mba nihita nihàfo tanabo rano iny teny.

Nihàfo tanabo rano sambofiara iny

Tsy hita sasy kea olo farane ze bevata bibike reny. Tsy hisy olo hampijalian-droze sasy. Nimaty iaby roze, noho ty renin-droze, voho ze olo raty fanahy iaby. Fe nanao akore ty baban-droze?

Tsy olo manahake antsika ty baban’​olo farane ze bevata bibike reo. Anjele naniry ty fiaìnan’​olombelo an-tany etoy roze, ka nijòtso ho etoy. Ka laha fa niavy ty Safodrano, le tsy nimaty niarake tamin’​olo naripake reny roze. Najànone ty fampiasà vatan’​olombelo nananane, ka nimpòly ho anjele an-danitse ane ndraike ie. Fe, fa tsy afake ho fianakavian’​anjeli-Ndranahare sasy roze, fa nanjary anjelin’​i Satana, kaìhi’​ty Baiboly hoe demonia.

Nasia-Ndranahare rivotse tan-tany etoy, ka nanomboke nihena rano tamy safodrano iny. Dimy vola tafara atoy, le nipetrake tanabo vohitse zay teo sambofiara io. Laha fa nandeha ty fotoa, le afake nahita ty raha tamy vohitse teny ty olo tanaty sambofiara io tao. Niharìtsy tsikelikele rano iny.

Nampiboake goàky baka amy sambofiara ao Noa, ka nampitìly voro io. Nitìly tsielatsiela avao voro io, bakeo nimpòly malaky, satria tsy nahita tany maike hipetràha. Nanao manahake zay matetike ie, bakeo nandeha noho nimpòly amy sambofiara io ao.

Voromailala

Tean’​i Noa ho hay laha fa nirìtsy soa ty rano, ka nandefa voromailala koa ie. Fe nimpòly voromailala iny, satria tsy nahita toera hipetràha. Nalefan’​i Noa fanindroane ndraike voromailala io, bakeo nimpòly ie sady nanday ravin-kazo oliva tam-bavane teny. Nihain’​i Noa tami’​zay fa nihena rano iny. Bakeo nalefane fanintelone ndraike voromailala iny, le tsy nimpòly sasy, satria fa nahita tany maike hipetràha.

Niresake tamin’​i Noa Andranahare, ka nanao hoe: ‘Miboàha baka anaty sambofiara ao iha noho ty fianakavianao, ka aboàho iaby biby reo.’ Fa ho tao raike mahery ty nijanònan-droze tanaty sambofiara io tao. Ka le azontsika an’​eritseritse fa nahafaly an-droze biby ty niboake bakao!

Genesisy 7:​10-24; 8:​1-17; 1 Petera 3:​19, 20.



Fanontanea

  • Nanino ty olo hafa ro tsy afake nilitse tanaty sambofiara tao sasy laha fa nanomboke nilatsake ty ora?
  • Tanaty firy andro noho firy haly Jehovah ro nandatsake ora, ka nanao akore ty habe rano iny?
  • Nanao akore sambofiara iny laha fa nanomboke nifeno rano tany toy?
  • Niavotse tamy Safodrano iny va olo farane ze bevata bibike reny? Ino kea ty nahazo ty baban-droze?
  • Nanao akore sambofiara iny laha fa afake dimy vola?
  • Ino ty antone nampiboàhan’​i Noa goàky baka amy sambofiara ao?
  • Tamy fomba manao akore ro nahaìzan’​i Noa, fa nihena rano iny?
  • Ino ty raha novolàni-Ndranahare tamin’​i Noa noho ty fianakaviane, tafara’​ty nijanonan-droze tao raike mahery tanaty sambofiara io tao?

Fanontanea Fanampine

  • Vakio Genesisy 7:​10-24.

    Ino iaby ty raha naripake tamy Safodrano iny? (Gen. 7:​23)

    Afake firy andro ty rano vo nihena? (Gen. 7:​24)

  • Vakio Genesisy 8:​1-17.

    Hita amy Genesisy 8:17 ao, fa tsy miova ty fikasà-Ndranahare tam-boalohane tany, mikasike ty tany. Manao akore ty fomba iresàhane raha zay? (Gen. 1:​22)

  • Vakio 1 Petera 3:​19, 20.

    Laha fa nimpòly tan-danitse ane anjele nivalike tami-Ndranahare reny, ino ty raha nahazo an-droze? (Joda 6)

    Laha fa hentea ty tantaran’​i Noa noho ty fianakaviane, le afake mahazo antoke tsika fa hanavotse ty vahoakine Jehovah. Hazavao. (2 Pet. 2:​9)