Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Boky Misy Tantara Baka Amy Baiboly

Tantara 9: Nanamboatse Sambofiara Noa

Tantara 9: Nanamboatse Sambofiara Noa
Olo mikizaky Noa

NANAMBALY Noa. Nanan’​anake telo ie: Sema, Hama, Jafeta ty anara’​ty anane. Samby nanambaly iaby anane reo. Ka, nisy valo roze fianakavia raike.

Nisy raha hafahafa nampanaòvi-Ndranahare an’​i Noa. Nampanamboarine sambofiara bevata ie. Manahake sambo ty haben’​i sambofiara io, fe mitovy amy vata be sady lava ty fahità aze. ‘Asio efitse telo mananabo raha io’, hoy Andranahare, ‘efitsefero anatine ao.’ Hipetràhan’​i Noa noho ty fianakaviane voho ty biby efitse reo. Natao tao kea ty hany nilàn-droze iaby.

Novolàni-Ndranahare Noa mba hanamboatse soa sambofiara io, soa tsy hilìran-drano anatine ao. Hoy Andranahare: ‘Handefa safodrano aho sady handrava tany iaby toy. Ze olo tsy anaty sambofiara io ao le ho maty iaby.’

Nanorike ty safà-Ndranahare Noa noho ty anane, ka nanamboatse sambofiara io. Tsy nino an’​i Noa ty olo laha fa nivòla tamin-droze ty raha hatao-Ndranahare ie. Nihehy avao olo reo, ka mbo nanohy ty fomban­droze raty.

Nampilitse biby noho hane tamy sambofiara tao Noa noho ty fianakaviane

Bevata bibike sambofiara io, ka tao maromaro tafara atoy vo nivita. Nampilìrin’​i Noa tanaty sambofiara tao ami’zay biby reny arake ty safà-Ndranahare. Kiroedroe ty fampilìra biby reo, ka samby nisy lahine noho vavine iaby arake ty karazane. Fe ty baka amy karazam-biby hafa, le fito ro novolàni-Ndranahare hampilìry ao. Nivòla tamin’​i Noa kea Andranahare mba hampilitse karazam-boro tao. Nataon’​i Noa iaby ze kila raha nampanaòvi-Ndranahare aze.

Laha fa nivita iaby raha rezay, le nilitse tanaty sambofiara iny tao koa Noa noho ty fianakaviane. Bakeo, nihilìa-Ndranahare ty varavara, ka nandìny tanatine tao Noa noho ty fianakaviane. Eritsereto hoe nandìny niarake tamin-droze tanaty sambofiara io tao koa iha. Ho avy vatane va safodrano zao arake ty fa novolàni-Ndranahare?

Genesisy 6:​9-22; 7:​1-9.



Fanontanea

  • Nisy olo firy tamy fianakavian’​i Noa tao? Ia iaby ty anara’​ty anake lahine?
  • Raha hafahafa ino ro nampanaòvi-Ndranahare an’​i Noa? Ino ty antone?
  • Nanao akore olo tanà raike amin’​i Noa reny laha fa niresake amin-droze mikasike sambofiara io ie?
  • Ino ty raha nampanaòvi-Ndranahare an’​i Noa mikasike biby reo?
  • Ino ty raha nataon’​i Noa noho ty fianakaviane laha fa nihilìa-Ndranahare sambofiara iny?

Fanontanea Fanampine

  • Vakio Genesisy 6:​9-22.

    Ino ty raha nampiavake an’​i Noa, mpanompo-Ndranahare marina iny? (Gen. 6:​9, 22)

    Manao akore ty fahitàn’​i Jehovah ty hasatà raty? Ka, tokone ho fisà mangàla havozàha manao akore ro filìntsika hatao? (Gen. 6:​11, 12; Sal. 11:​5)

    Fomba manao akore ro hanahàfantsika an’​i Noa laha fa mahazo tari-dala baka amy fandaminan’​i Jehovah tsika? (Gen. 6:​22; 1 Jaona 5:​3)

  • Vakio Genesisy 7:​1-9.

    Ndra fa hain’​i Jehovah aza hoe mpanota Noa, le mbo nataone hoe olo-marina avao. Mahasoa sady manampy antsika ty fahaìza raha zay. Hazavao. (Gen. 7:​1; Ohab. 10:16; Isaia 26:​7)