Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 TOKO FAHA-5

Fanomeza Farany Ze Soa Baka amy Ndranahary ty Vilim-panavota

Fanomeza Farany Ze Soa Baka amy Ndranahary ty Vilim-panavota
  • Ino vilim-panavota zao?

  • Manao akory ty nanomeza azy?

  • Ino ty tombony azonao baka amy raha io?

  • Manao akory ty ampisehoanao fa teanao raha io?

1, 2. a) Fanomeza manao akory ro teanao marè? b) Manino tsika ro mivola fa tsy misy fanomeza soa mandilatsy ty vilim-panavota?

INO ty teanao marè amy ty fanomeza iaby fa niazonao? Tsy mianky amy ty hasarotany na ty drala lany taminy ro ivolana hoe soa ty fanomeza raiky. Ty raha azo antoky le hoe, ho teanao marè ty fanomeza raiky, lafa mahasambatsy anao na ilànao.

2 Mety ho maro ty fanomeza teanao ho azo, fe miavaky marè amy ty fanomeza iaby, raiky toy. Baka amy Ndranahary raha io. Maro ty raha nameany antsika, fa ty sorom-panavota natao Jesosy ro soa marè. (Vakio Matio 20:28.) Ho hitantsika amy toko toy ato fa tsy misy fanomeza soa mandilatsy ty vilim-panavota, satria hahavy anao ho sambatsy raha io sady ilànao. Io ty raha farany ze soa nampisehoa Jehovah, fa teany iha.

INO VILIM-PANAVOTA ZAO?

3. Ino ty atao hoe vilim-panavota? Ino ty raha mila haintsika mba hahaiza hoe ilà vatany raha io?

3 Ty atao hoe vilim-panavota, le ty raha natao Jehovah  hanavota ty olombelo ho afaky amy ty ota noho ty fahafatesa. (Efesianina 1:7) Mila mandiniky ty raha nisy ta Edena tany tsika, mba hahay ty raha tea ty Baiboly hampianary mikasiky raha io. Mila haintsika tse hoe ino ty raha nafoy Adama lafa nanao fahota ie, zay vo ho haintsika koa hoe manino ro ilà ty vilim-panavota.

4. Ino iaby ty raha soa niazo Adama baka amy ty ay lavorary nananany?

4 Lafa namoro Adama, Jehovah, le nanome azy ay lavorary. Soa marè raha zay, satria nahazoa Adama raha soa maro. Lavorary ty vatany noho ty sainy, ka tsy narary na antitsy na maty ie. Nana fifandrambesa manoka tamy Jehovah koa ie satria lavorary. Mivola ty Baiboly hoe “anaky Ndranahary” ie. (Lioka 3:38) Midika zay fa nifandramby soa tamy Jehovah ie, manahaky anakilahy mifandramby soa amy babany be fitiava. Niresaky noho nanome asa soa ho ahy anakiny io Jehovah, sady nanambara taminy ty raha teany hataony.—Genesisy 1:28-30; 2:16, 17.

5. Ino ty dika ty hoe natao “manahaky tarehy Ndranahary” Adama?

5 Natao “manahaky tarehy Ndranahary” Adama lafa niforony. (Genesisy 1:27) Tsy midika zay hoe mitovy fitsanga na mitovy tarehy amy Ndranahary ie. Hitantsika tamy toko 1 ao, fa Fanahy Ndranahary ka tsy afaky mahita azy tsika. (Jaona 4:24) Hita baka amy zay, fa tsy nofotsy noho lio Jehovah. Ka ty hoe natao manahaky tarehy Ndranahary Adama, le midika hoe namea toetsy mitovy amy toetsy Ndranahary ie, lafa niforony. Tafilitsy amy zay ty fitiava, ty fahendrea, ty fitiava ty rariny noho ty hery. Mbo misy raha hafa koa itoviza Adama amy Babany io: Nana fahalalaha hifily ie. Tsy manahaky fitaova niforony hiasa raha raiky avao ie, ka hoe tsy mahay laha tsy zay avao. Afaky nanapa-kevitsy amy ze raha teany hatao ie, na hanao raha soa na hanao raha raty. Ho nivelo zisiky farany amy Paradisa an-tany etoy ie, laha nifily hanoriky ty safà Ndranahary.

6. Ino ty raha nafoy Adama, lafa tsy nanoriky safà Ndranahary ie, le ino ty vokany tamy ty taranakiny?

 6 Vinily Adama sarotsy ty tsy nanorihany safà Ndranahary, satria voaozo ho maty ie. Nafoiny ty ay lavorary nananany noho ty raha soa iaby niazony baka amy raha zay. (Genesisy 3:17-19) Mampalahelo, fa tsy ie raiky avao ro voa, fa ty taranakiny koa, satria nanjary tsy lavorary. Mivola ty Baiboly hoe: “Le manahaky ty nilira ty ota baka amin’olo raiky [Adama] ho amy zao tontolo zao, sady tamy ota ro nilira ty fahafatesa, ka niparitaky tamin’olo iaby ty fahafatesa, satria samby fa nanota rozy iaby.” (Romanina 5:12) Nandova ota baka amy Adama tsika olombelo. Zay ro mahavy ty Baiboly hivola hoe “naviliny” ho andevo ty ota noho ty fahafatesa ty vatany noho ty taranakiny. (Romanina 7:14) Tsy avotsy sasy Adama noho Eva, satria kinahin-drozy azy ty tsy nanoriky ty safà Ndranahary. Ka manao akory ty taranakiny? Mety ho avotsy avao va tsika?

7, 8. Ino iaby ty dika ty safà hoe vilim-panavota?

7 Nanome vilim-panavota Jehovah mba hanavota ty olo. Misy roe ty dika safà hoe vilim-panavota io. Voalohany, drala aloa mba hanavota olo, na hiviliana raha fa niahinao avao taloha. Ohatsy hoe drala aloa mba hanavota ajà nisy nangalatsy. Faharoe, drala hanonera na handoava vilin-draha raiky. Ohatsy hoe drala aloan’olo raiky, hanonera ty raha sinimbany na hitsaboa ty olo nasiany fery. Laha misy olo manimba raha, ohatsy, le drala mahavoavily raha sinimbany iny ro ampandoavy azy.

8 Ka manao akory ty hanonera fahavoaza bevata nampadesy Adama antsika iaby iny? Manao akory ty hanavota antsika amy ty ota noho ty fahafatesa? Andao tsika hianatsy mikasiky vilim-panavota namea Jehovah iny noho ty raha soa azontsika baka amy raha zay.

 MANAO AKORY TY NANOMEZA JEHOVAH VILIM-PANAVOTA IO?

9. Vilim-panavota manao akory ro tsy maintsy atao?

9 Ay lavorary ro nafoy, ka tsy mahasolo azy ty ain’olo tsy lavorary. (Salamo 49:7, 8) Mila mitovy amy raha nafoy iny, ty vilim-panavota aloa. Mifanaraky amy lalàna Ndranahary amy Baiboly ao raha zay. Ho zao ty volany ao: “Ay ho solo ty ay.” (Deoteronomia 19:21) Laha zay ro ie, ino ro afaky misolo ay lavorary nafoy Adama iny? Tsy maintsy ain’olo lavorary avao vo mety atao vilim-panavota.—1 Timoty 2:6.

10. Manao akory ty nanomeza Jehovah vilim-panavota io?

10 Ino ty natao Jehovah mba hanomeza vilim-panavota io? Nalefany tan-tany etoy ty raiky amy ty anakiny lavorary tan-danitsy any. Fe tsy ze hitahitany teo avao ro nirahiny, fa ty Anakilahiny toka, azy teany marè iny. (Vakio 1 Jaona 4:9, 10.) Tsy natao forosè Anakiny io, fa sitrapony ro niala tan-danitsy any. (Filipianina 2:7) Nianarantsika tamy toko taloha tao, fa nanao fahagagà Jehovah, lafa namindra ay anakiny io tanaty kibo Maria tao. Tsy nisy fahotà Jesosy lafa nateraky fa lavorary, satria nampiasa ty fanahiny masy Ndranahary.—Lioka 1:35.

Namea Jehovah ho vilim-panavota ho ahintsika Anakilahiny toka iny

11. Manao akory ty ahavità lahilahy raiky manavotsy olo an-tapitrisany?

11 Manao akory ty ahavità lahilahy raiky hanavotsy olo maro an-tapitrisany? Ino ty nahavy olo maro reo ho mpanota? Tiarovo fa tsy nana ay lavorary sasy Adama lafa nanota. Tsy afaky nanome ay lavorary ho ahy ty taranakiny koa ie, fa ota noho fahafatesa avao ro nafindrany tamin-drozy. Mifanohitsy amy zay, fa tsy mpanota sady lavorary Jesosy, azy kaihy ty Baiboly hoe “Adama farany” iny. (1 Korintianina 15:45) Azo volany hoe nisolo Adama ie, mba hanavota antsika. Nonerany ty fahotà natao Adama lafa nanao soro ty ainy noho nanoriky soa ty safà  Ndranahary ie. Afaky mitamà hana fiaina soa tsika lafa nanao raha zay Jesosy.—Romanina 5:19; 1 Korintianina 15:21, 22.

12. Manaporofo ino ty fijalea nahazo Jesosy?

12 Voatantara amy Baiboly ao iaby ty fijalea niareta Jesosy taloha ty nahafatesany. Nifilary marè ie, nifantsihy marè tamy hazo fijalea, sady nangirifiry vo maty. (Jaona 19:1, 16-18, 30; Fanazavà Fanampiny, “Manino ty Kristiana Marina ro Tsy Mampiasa Lakroa?”) Manino Jesosy ro voatery nijaly marè manahaky zay? Mbo ho hitantsika afarafara ao, fa manasara raha raty ty mpanompo Ndranahary, Satana. Mivola ie hoe, hiala amy Ndranahary iaby ty olo, lafa misy raha sarotsy mahazo azy. Fe tsy nivaliky tamy Jehovah avao Jesosy ndre nimaro marè aza ty raha nampijaly azy. Nanome porofo bevata ie tamy fotoa zay hoe mpavandy Satana. Natorony koa fa ndre ino ndre ino atao ty Devoly, le mahavita tsy mivaliky amy Ndranahary ty olo lavorary noho mana fahalalaha hifily. Azo antoky fa nifalifaly biby Jehovah lafa tsy nivaliky taminy Anakilahiny teany marè io!—Ohabolana 27:11.

13. Manao akory ty nandoava ty vilim-panavota?

13 Manao akory ty nandoava ty vilim-panavota? Nengà Ndranahary hovonoa Anakiny lavorary iny tamy 14 Nisana, vola jiosy, tamy tao 33. Nanao soro ty ainy lavorary Jesosy tamy fotoa zay, sady “indraiky avao” ro nanaovany raha io. (Hebreo 10:10) Telo andro tafara ty nahafatesany, le nivelomy Jehovah ie, sady nameany vata fanahy ndraiky. Lafa niavy tan-danitsy any ie, le naloany tamy Ndranahary ty vilim-panavota, tsy ino zay fa ty ay lavorary nataony soro, hanavota ty taranaky Adama. (Hebreo 9:24) Naneky raha zay Jehovah mba hanavota ty olo tsy ho andevo ty ota noho ty fahafatesa.—Vakio Romanina 3:23, 24.

 INO TY RAHA SOA AZONAO BAKA AMY TY VILIM-PANAVOTA?

14, 15. Ino ty raha tsy maintsy ataontsika mba hahazoa fanengà hadisoa?

14 Ty vilim-panavota baka amy Ndranahary ro mahavy ty olombelo ho afaky hahazo fitahia bevata. Ndao hodinihintsika ty raha soa ho azontsika manomboky henanizao noho amy hoavy, baka amy fanomeza farany ze soa baka amy Ndranahary io.

15 Fanengà hadisoa. Tsy lavorary tsika, ka mila miezaky marè vo mahavita manao raha soa. Manao raha tsy mety iaby tsika, ndre amy ty raha volanintsika, ndre amy ty raha ataontsika. Fe ndre eo zay, le afaky mahazo “ty fanengà ty hadisoantsika” tsika, baka amy ty sorom-panavota natao Jesosy. (Kolosianina 1:13, 14) Fe tsy hahazo fanengà hadisoa tsika, laha tsy mibebaky. Tsy maintsy miambany noho misoloho amy Jehovah, voho mangataky fanengà hadisoa aminy tsika, mifototsy amy finoa ty sorom-panavota natao Anakiny iny.—Vakio 1 Jaona 1:8, 9.

16. Manino tsika ro afaky manompo Ndranahary amy eritseritsy malio? Manino ro ilà raha zay?

16 Eritseritsy malio amy Ndranahary eo. Malaky kivy ty olo sady malaky mihevitsy ty vatany ho tsy misy dikany, lafa mania azy ty eritseriny. Fe soa fanahy Jehovah, ka manenga ty hadisoantsika, satria teo vilim-panavota iny. Zay ro mahavy antsika ho afaky manompo azy amy eritseritsy malio, ndre tsy lavorary aza tsika. (Hebreo 9:13, 14) Mbo zay avao koa ro mahavy antsika mahasaky miresaky aminy, ka tsy misalasala mivavaky aminy. (Hebreo 4:14-16) Milamin-tsay noho sambatsy sady hihevitsy ty vatantsika ho misy dikany tsika, lafa malio eritseritsy.

17. Ino iaby ty fitahia ho azontsika, lafa nimaty ho ahintsika Jesosy?

17 Afaky mitamà fiaina zisiky farany amy paradisa an-tany etoa. Volany amy Romanina 6:23 fa “fahafatesa ro  karama azo baka amy ota.” Mbo volany ao koa fa “fiaina zisiky farany amy alala Kristy Jesosy Tompontsika ro fanomeza baka amy Ndranahary.” Hitantsika tamy toko faha-3 tao ty fitahia ho azontsika, lafa ho Paradisa tany toy. (Apokalypsy 21:3, 4) Laha tsy nimaty ho ahintsika Jesosy, le tsy ho nahazo raha soa maro reo tsika. Anaty fitahia zay ty hoe ho velo zisiky farany sady ho salama soa avao. Fe mila mampiseho ty fitiavantsika vilim-panavota io tsika, laha ta hahazo fitahia maro reo.

MANAO AKORY TY AMPISEHOANAO TY FITIAVANAO RAHA IO?

18. Manino tsika ro tokony hisaotsy Jehovah amy vilim-panavota iny?

18 Manino tsika ro tokony hisaotsy Jehovah amy vilim-panavota iny? Hita hoe misy dikany ty fanomeza raiky, laha nahafoy fotoa na drala na nanao ezaky bevata ty mpanome azy. Mahafaly antsika ty mahay hoe tea antsika Ndranahary, ka ty vilim-panavota ro porofo bevata amy raha zay. Ty vilim-panavota ro fanomeza farany ze soa, satria nahafoy raha bevata Ndranahary mba hanomeza raha io. Mivola ty Jaona 3:16 fa “bevata vatany ty fitiava Ndranahary zao tontolo zao, ka nameany ty anakilahiny toka.”  Ty vilim-panavota ro porofo bevata, fa tea antsika Jehovah. Mbo manaporofo koa raha io, fa tea antsika Jesosy satria nahafoy ty ainy ho ahintsika. (Vakio Jaona 15:13.) Ka ty fanomeza ty vilim-panavota, le tokony haharesy lahatsy antsika fa tea antsika kiraidraiky Jehovah noho Jesosy.—Galatianina 2:20.

Atoronao fa teanao ty vilim-panavota, lafa miezaky avao iha, hahay soa mikasiky Jehovah

19, 20. Manao akory ty ampisehoanao fa isaoranao Ndranahary noho teanao ty vilim-panavota?

19 Manao akory ty ampisehoanao fa isaoranao Ndranahary noho teanao ty vilim-panavota? Voalohany, mila miezaky avao iha hahay soa mikasiky Jehovah. (Jaona 17:3) Hanampy anao hanao raha zay, ty fianara Baiboly amy boky toy. Lafa mihamaro ty raha hainao mikasiky Jehovah, le hanjary hitombo koa ty fitiavanao azy. Hahavy anao ta hanao ze raha teany avao koa ty fitiavanao azy.—1 Jaona 5:3.

20 Atorò fa inoanao ty sorom-panavota natao Jesosy. Nivola Jesosy hoe: “Ze mampiseho finoa ty Anaky, le mana fiaina zisiky farany.” (Jaona 3:36) Manao akory ty ampisehoantsika fa mino any Jesosy tsika? Tsy ampy ty mivola hoe mino azy tsika. Volany Jakoba 2:26 fa ‘maty ty finoa laha tsy atoro amy ty atao.’ Midika zay, fa mila manao raha hanaporofoa ty finoanao iha. Atorontsika, ohatsy, fa mino Jesosy tsika, lafa manao ze farany vitantsika mba hanahafa azy, tsy amy ty safà volanintsika avao fa amy ty raha anovintsika koa.—Jaona 13:15.

21, 22. a) Manino tsika ro mila mamonjy ty Sakafo Hariva ty Tompo? b) Ino ty hohazavany amy toko faha-6 noho faha-7 ao?

21 Mamonjea ty sakafo hariva ty Tompo fatao santao. Tamy 14 Nisana tao 33 hariva, le nanomboky nanao fankalazà raiky Jesosy. “Sakafo Hariva ty Tompo” ro ikaiha ty Baiboly raha io. (1 Korintianina 11:20; Matio 26:26-28) Mbo kaihy koa hoe Fahatiarova ty nahafatesa Kristy raha io. Nampanaovy Jesosy fankalazà io ty apostoliny noho ty  Kristiana marina mba hanampea an-drozy hahatiaro, fa namoy ty ainy lavorary ho vilim-panavota ie. Ho zao ty hafatsy napetrakiny mikasiky fankalazà io: “Anovo avao ty manahaky zao ho fahatiarova ahy.” (Lioka 22:19) Ty fankalazà ty Fahatiarova ro manampy antsika hahatiaro, fa tea antsika marè Jehovah noho Jesosy, lafa nanome vilim-panavota iny rozy. Laha mamonjy Fahatiarova ty nahafatesa Jesosy avao tsika santao, le asehontsika fa teantsika vatany vilim-panavota iny. *

22 Tsy misy raha soa mandilatsy vilim-panavota namea Jehovah io. (2 Korintianina 9:14, 15) Ndre ty olo fa nimaty aza, le mahazo tombony baka amy raha io. Hanazava mikasiky raha zay ty toko faha-6 noho faha-7.

^ feh. 21 Laha teanao ty hahazo fanazavà maromaro mikasiky ty Sakafo Hariva ty Tompo, le henteo Fanazavà Fanampiny hoe “Manome Voninahitsy a Ndranahary ty Fankalazà ty Sakafo Hariva ty Tompo.”