Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 TOKO FAHA-19

Mijanòna amy Fitiava Ndranahary Ao

Mijanòna amy Fitiava Ndranahary Ao
  • Manao akory tea a Ndranahary zao?

  • Manao akory ty hijanonantsika amy fitiavany ao?

  • Ino ty raha soa hamea Jehovah ty olo mijano amy fitiavany ao?

Sahala anaty andro mitsioky marè tsika, ka ataonao fialofa va Jehovah?

1, 2. Aia ty ahitantsika fialofa azo antoky henanizao?

ERITSERETO hoe mitsioky marè ty andro kanefa iha mbo an-dala eny. Mihamaìky ty lanitsy. Manelatsy ty andro, mideboky ty hotroky, bakeo mizinja ty ora. Manao lia mà iha sady mitolitoliky mila fialofa. Ndroa, antsisin-dala eroa, misy fialofa. Matanjaky noho maiky ty eo, sady soasoa ty fahitanao azy. Falifaly biby iha nahita pilasy io!

2 Sahala anaty andro mitsioky marè koa tsika henanizao. Miharaty ty fiaina amy tany toy iaby. Fe misy fialofa raiky azo antoky. Afaky miaro antsika amy ze raha mety hanimba antsika fialofa io. Ino fialofa io? Hoy ty Baiboly: “Hivola amy Jehovah aho hoe: ‘Fialofako iha, sady fiarova matanjaky ho ahy, Ndranahariko azy hatokisako iny.’ ”—Salamo 91:2.

3. Ino ty tokony hataontsika, mba hahavy Jehovah ho fialofa ho ahintsika?

3 Mba eritsereto avao tse moa! Afaky ho fialofa ho antsika Jehovah, azy Mpamoro noho  Mpanjaka ty raha iaby iny. Afaky hiaro antsika avao ie, satria mahery lavitsy mandilatsy ty raha iaby mety hanimba antsika. Ndre misy raha raty mahazo antsika, le hainy ty manafaky ty vokatsy raha zay. Ka ino ty tokony hataontsika, mba ho fialofa ho antsika Jehovah? Mila matoky azy tsika. Mampirisiky antsika koa ty Safàny hoe: “Mijanòna amy fitiava Ndranahary ao.” (Joda 21) Mila mijano amy fitiava Babantsika an-danitsy any iny vatany tsika. Zay ty ataontsika laha tsy engantsika hihena ty fitiavantsika azy. Azo antoky fa ho fialofa ho antsika ie amy zay. Ka manao akory ty hananantsika fifandrambesa soa aminy?

TY AHITANTSIKA TY FITIAVA NDRANAHARY NOHO TY HAMALEANTSIKA RAHA ZAY

4, 5. Manonòna vitsivitsy amy ty fampisehoa Jehovah ty fitiavany antsika?

4 Mila haintsika ty nampisehoa Jehovah ty fitiavany antsika, laha ta hijano amy fitiavany ao tsika. Eritsereto ty raha ampianary ty Baiboly nihitanao tamy boky toy ato. Namea Jehovah antsika tany soa biby toy mba hipetrahantsika. Nifenoany hany, rano, biby mahatandrena, faritsy soasoa, noho raha maro hafa ty etoy. Nampanoratsy ty Baiboly koa ie, le nambarany antsika ao ty anarany noho ty toetsiny. Hitantsika ao koa fa nirahiny ho an-tany etoy mihintsy Jesosy, Anakiny teany marè iny, le nengany hijaly noho ho maty ho antsika. (Jaona 3:16) Ino ty soa azontsika baka amy raha zay? Manjary mitamà hoavy farany ze soa tsika.

5 Mianky amy raha raiky hafa natao Ndranahary koa ty hoavintsika. Nanory fanjakà an-danitsy any Jehovah, tsy ino zay fa ty Fanjakà ty Mesia. Sisa kely, le hanampitsy ty fijalea iaby Fanjakà io, bakeo hanova ty tany ho paradisa. Mba eritsereto avao tse moa! Hiada noho ho sambatsy zisiky farany iha amy paradisa io ao. (Salamo 37:29) Amea Jehovah tari-dala tsika henanizao, mba hananantsika fiaina farany ze soa zisiky hiavia raha zay. Nameany fahalalaha hivavaky  aminy koa tsika, ka afaky miresaky aminy avao. Vitsivitsy avao amy ty fampisehoa Ndranahary ty fitiavany ty olo iaby noho ty fitiavany anao iha raiky, nitonòny teo reo.

6. Manao akory ty hamaleanao ty fitiava Jehovah anao?

6 Toy ty fanontanea bevata mila eritseretinao: Manao akory ty hamaleako ty fitiava Jehovah ahy? Maro ty hivola hoe: “Tokony ho tea any Jehovah koa aho.” Tsapanao va hoe mana fitiava azy iha? Nivola Jesosy hoe toy ty didy farany bevata: “Mila tea Jehovah Ndranaharinao amy ty fonao iaby iha, noho ty vatanao iaby, voho ty sainao iaby.” (Matio 22:37) Azo antoky fa misy antony maro itiavanao any Jehovah Ndranahary. Fe laha tsapanao fa tea azy iha, le midika va zay fa tea azy amy ty fonao iaby, noho ty vatanao iaby, voho ty sainao iaby iha?

7. Hazavao fa tsy tokony ho fihetseham-po avao ty fitiava a Ndranahary.

7 Atoro ty Baiboly fa tsy fihetseham-po avao fitiava a Ndranahary zao. Marina hoe mila renao anatinao ao ty fitiava a Ndranahary, fe vo fanomboha ty fitiava azy marina raha zay. Mila vihim-pôma, ohatsy, iha laha ta hamboly pôma. Ka manao akory laha ohatsy ta hihina pôma iha fe vihim-pôma iny avao ro amea anao? Ho afa-po va iha? Aia koa! Mitovy amy zay koa, fa vo fanombohany avao ty fahaizanao hoe teanao Jehovah Ndranahary. Hoy ty Baiboly: “Ho zao fitiava a Ndranahary zao, le ty hanorihantsika ty didiny. Fe tsy mavesatsy ty didiny.” (1 Jaona 5:3) Ty fitiava a Ndranahary le hita amy ty vokatsy soa andesiny. Tsy maintsy aseho amin’atao fitiava io.—Vakio Matio 7:16-20.

8, 9. Manao akory ty ampisehoantsika fa teantsika Ndranahary, sady isaorantsika ty raha nataony?

8 Mampiseho ty fitiava a Ndranahary tsika, lafa manoriky ty didiny noho ty torolalany. Tsy sarotsy loatsy ty manao raha  zay. Tsy mavesatsy ty lalàna Jehovah, fa natao hanampea antsika hana fiaina soa sady mahasambatsy noho mahafa-po. (Isaia 48:17, 18) Atorontsika fa misaotsy Babantsika an-danitsy any iny tsika amy ty raha bevata nataony ho antsika, lafa manoriky ty tari-dala baka aminy. Fe mampalahelo fa olo vitsivitsy avao ro manao raha zay henanizao. Tsy teantsika ty tsy hahay misaotsy manahaky ty olo tamy andro Jesosy. Nitaha boka folo Jesosy, fe raiky avao ro nimpoly mba hisaotsy azy. (Lioka 17:12-17) Azo antoky fa ta hanahaky raiky nahay nisaotsy iny tsika, fa tsy azy sivy tsy nahay nisaotsy rey!

9 Ino iaby moa didy Jehovah tokony horihintsika rezao? Fa nandiniky maromaro tsika tamy boky toy ato, fe himpoliantsika ndraiky ty sisany. Hijano amy fitiava Ndranahary ao tsika, laha manoriky ty didiny.

MAMONJEA ANY JEHOVAH AVAO

10. Hazavao hoe manino ro ilà ty mianatsy avao mikasiky Jehovah Ndranahary.

10 Ilà vatany ty mianatsy mikasiky Jehovah, mba hamonjea azy. Tsy tokony hieny mihintsy fianara  zay. Ndao hatao hoe mamindro amonto eny iha amy andro haly sady manintsy biby. Hengànao hihena va afo iny, bakeo ho maty? Aha. Hampeanao katà avao raha iny, soa hiroaroa noho hafana avao. Mety hianky amy zay aza ty ainao! Manahaky katà mampirehitsy afo “ty fahaiza a Ndranahary.” Mampiroaroa avao ty fitiavantsika Jehovah raha io.—Ohabolana 2:1-5.

Manahaky afo ty fitiavanao Jehovah, ka tokony hataonao ze hampiroaroa azy avao

11. Ino ty vokatsy ty fampianara Jesosy tamy mpanori-dia azy?

11 Nitea Jesosy hirehitsy marè am-po ty mpianatsiny ao avao ty fitiavany any Jehovah noho ty Safàny marina sady lafovily. Tafara ty nivelomany tamy maty, le nanazava tamy ty mpianatsiny roe lahy mikasiky ty faminania sisany amy Soratsy Hebreo ao, fa tanteraky taminy ie. Ino ty vokany? Hoy ty mpianatsiny tafara atoy: “Tsy sahala nisy afo niroaroa va tam-pontsika tao tamy ie niresaky tamintsika tan-dala teny, ka nanazava soa ty Soratsy Masy tamintsika?”—Lioka 24:32

12, 13. a) Manao akory ty fitiava ty ankamaroan’olo a Ndranahary noho ty Baiboly henanizao? b) Ino ty azontsika atao mba tsy hihamanintsy ty fitiavantsika?

12 Tamy iha vo nahay ty marina ampianary ty Baiboly, renao nirehitsy tam-ponao ao va ty hafalea, noho ty zotom-po voho ty fitiava a Ndranahary? Azo antoky hoe zay ty raha niseho. Olo maro koa ro nana fihetseham-po manahaky zay. Fe misy raha tokony hataontsika henanizao, tsy ino zay fa ty tsy hampihena fitiava io, fa hampitombo azy avao, ndre tsy mora aza ty manao raha zay. Tsy tokony hanahaky tontolo toy tsika. Nivola Jesosy hoe ‘hihamanintsy ty fitiavan’olo maro.’ (Matio 24:12) Ino ty azonao atao mba tsy hihamanintsy ty fitiavanao any Jehovah noho ty fahamarina baka amy Baiboly ao?

13 Miezaha avao hahay any Jehovah Ndranahary noho Jesosy Kristy. (Jaona 17:3) Vetsevetseo soa ze raha ianaranao baka amy Baiboly ao, le anontaneo ty vatanao hoe: ‘Ino ty ianarako mikasiky Jehovah Ndranahary baka amy raha zay? Ino ty antony hafa hitako etoa, ka mahavy ahy ho tea azy amy ty foko noho ty saiko voho ty vatako iaby?’ (Vakio 1 Timoty 4:15.) Hirehitsy  soa avao ty fitiavanao any Jehovah, laha mieritseritsy manahaky zay iha.

14. Manino tsika ro tokony hivavaky, laha tsy teantsika hihena ty fitiavantsika Jehovah?

14 Mila mivavaky tsy tampaky koa tsika, mba hirehitsy soa avao ty fitiavantsika any Jehovah. (1 Tesalonianina 5:17) Hitantsika tamy Toko faha-17 fa fanomeza lafovily baka amy Ndranahary ty vavaky. Lasa mifandramby soa ty olo, lafa mifampiresaky tsy tampaky sady tsy misy raha avonivony. Hifandramby soa avao amy Jehovah sady ho marìny azy koa tsika, laha mivavaky tsy tampaky. Fe tsy tokony hanjary fahazara avao ty vavaky, ka hanao safà mimpolimpoly avao tsika fa tsy vokatsy ty fo noho tsy misy ventiny. Tokony hiresaky amy Jehovah manahaky ajà miresaky amy ty babany teany tsika. Mazava ho azy fa hanaja azy tsika lafa miresaky aminy, kanefa tsy hamonivony raha aminy, sady tsy hisalasala hanambara aminy ze raha iaby am-pontsika ao. (Salamo 62:8) Ilà amy ty fanompoantsika any Jehovah ty fianara am-bata noho ty vavaky vokatsy ty fo. Manampy antsika hijano amy fitiava Ndranahary ao raha zay.

MAHITÀ FIFALEA AMY FANOMPOA ATAONAO

15, 16. Manino ro voninahitsy noho hanana ho antsika ty asa fitoria mikasiky Fanjakà iny?

15 Tsika kiraidraiky avao ro manao fianara am-bata noho mivavaky. Hiresaky mikasiky karaza fanompoa hafa hitan’olo maro tsika henanizao, tsy ino zay fa ty firesaha mikasiky ty raha inoantsika. Fa niresaky mikasiky ty fahamarina baka amy Baiboly ao tamin’olo va iha? Voninahitsy bevata ho anao vatany raha zay. (Lioka 1:74) Manao ty anjarantsika amy ty asa bevata raiky napetraky tamy ty Kristiana marina iaby tsika, lafa miresaky ty raha nianarantsika mikasiky Jehovah Ndranahary. Tsy ino asa io fa ty fitoria ty vaovao soa ty Fanjakà Ndranahary.—Vakio Matio 24:14; 28:19, 20.

16 Lafovily tamy apostoly Paoly ty fanompoany, ka nikaihiny hoe hanana. (2 Korintianina 4:7) Tsy misy asa soa  mandilatsy ty miresaky mikasiky Jehovah Ndranahary noho ty raha teany hatao. Ie ro Tompo farany ze soa, sady ahazoa tombony maro biby ty fanompoa azy. Lafa manao asa io iha, le manampy ty olo mahity fo hamonjy Babantsika an-danitsy any iny noho handeha amy lala ty fiaina zisiky farany! Aia  koa hisy asa mahafa-po mandilatsy zay? Mbo manatanjaky ty finoanao noho ty fitiavanao any Jehovah koa ty fitoria mikasiky azy noho ty Safàny. Falifaly Jehovah mahita ty ezaky ataonao. (Hebreo 6:10) Hijano amy fitiavany ao iha, laha mazoto manao asa io avao.—Vakio 1 Korintianina 15:58.

17. Manino ro meky ty asa fitoria henanizao?

17 Soa ho tiarovy fa asa meky ty fitoria Fanjakà iny. Hoy ty Baiboly: “Torio ty safà, sady ataovo tsy misy hataky andro raha zay.” (2 Timoty 4:2) Manino ro meky asa io henanizao? Satria hoy ty Safà Ndranahary: “Marìny ty andro bevata Jehovah. Fa marìny ie, sady mihamamonjy malaky marè.” (Zefania 1:14) Fa kelikely vatany ty fotoa tavela le handripaky tontolo toy Jehovah. Mila ampiembeny vatany ty olo! Tokony ho hain-drozy hoe henanizao ty fotoa hifilia any Jehovah ho Mpanjaka. “Tsy ho tara” ty farany.—Habakoka 2:3.

18. Manino tsika ro tokony hanompo Jehovah miaraky amy ty Kristiana marina?

18 Tea Jehovah hanompo azy miaraky amy ty Kristiana marina tsika. Zay ro mahavy ty Safàny hivola hoe: “Mba mifandiniha tsika mba handrisiky ho amy fitiava noho ty asa soa, ka tsy hahafoy ty fiarahantsika mivory, manahaky ty sisany fa zatsy tsy mivory, fa hifampahery, vo handraky fa hitanareo fa mihamarìny ty andro.” (Hebreo 10:24, 25) Afaky midera noho manompo a Ndranahary azy teantsika marè iny tsika, lafa miaraky mivory amy ty finoa raiky amintsika. Mifampahery koa tsika amy zay.

19. Ino ty azontsika atao mba hitombo ty fifankatiava amy fiangona kristiana ao?

19 Afaky mampitombo ty fifankatiava noho ty finamà misy amy fiangona eo tsika, lafa miaraky amy ty mpanompo Jehovah. Mila mifantoky amy ty toetsy soan’olo tsika, manahaky ty fanentea Jehovah ty toetsy soa ananantsika. Ka mitamà hoe ho lavorary ty olo finoa raiky aminao. Tiarovo fa tsy mitovy ty fandrosoa vitantsika amy ty fanompoa Jehovah, sady samby manao hadisoa tsika iaby. (Vakio Kolosianina 3:13.) Miezaha hinama soa amin’olo tea any Jehovah vatany, le  handroso iha amy ty fanompoa azy. Hijano amy fitiavany ao vatany iha, laha manompo azy miaraky amy rahalahinao noho anabavinao kristiana reo. Ino ty raha soa amea Jehovah ty mpanompony tsy mivaliky sady mijano amy fitiavany ao?

MIEZAHA HAHAZO “TY FIAINA VATANY”

20, 21. Ino “fiaina vatany” zao, le manino raha zay ro fitamànan-draha soasoa?

20 Fiaina ro raha soa amea Jehovah ty mpanompony tsy mivaliky. Fe fiaina manao akory zao? Miay vatany va ty fahitanao ty vatanao henanizao? Mety maro ty hivola hoe: ‘Mazava ho azy, satria mifoky rivotsy tsika, mihina, noho mino. Tsy miay vatany va zay?’ Lafa mahatiaro sambatsy aza tsika, le mety hivola hoe: “Fiaina vatany lahy toy!” Fe atoro ty Baiboly fa tsy misy olo azo volany hoe miay vatany henanizao.

Ho azonao va “ty fiaina vatany”, azy tea Jehovah ho ahinao iny?

21 Mampirisiky antsika “hivahatsy marè amy ty fiaina vatany” ty Safà Ndranahary. (1 Timoty 6:19) Midika zay fa amy hoavy tsika vo afaky hahazo “fiaina vatany” io. Lafa lavorary tsika, vo azo volany hoe miay vatany, satria ho araky ty nitiava Jehovah hanaova azy ty fiainantsika. Lafa miay anaty ty fahasalamà, fiadana voho fahasambara amy tany paradisa ao tsika vo azo volany hoe mana “ty fiaina vatany”, na ty fiaina zisiky farany.(1 Timoty 6:12) Tsy fitamànan-draha soasoa va lahy zay?

22. Ino ty tokony hataonao, mba ‘hivaharanao marè amy ty fiaina vatany’?

22 Fe manao akory ty ahavitantsika ‘mivahatsy marè amy ty fiaina vatany’? Lafa niresaky mikasiky raha zay Paoly, le nampirisiky ty Kristiana “hanao raha soa” noho “hanan-kanana amy ty asa soa.” (1 Timoty 6:18) Midika zay fa mianky amy fanorihantsika ty fahamarina nianarantsika tamy Baiboly ao ro hahazoantsika ty fiaina vatany. Fe, ta hivola va Paoly hoe takalo ty raha soa ataontsika “ty fiaina vatany”? Aha, satria baka amy ty “hasoam-panahy tsy manam-paharoe” aseho Ndranahary amintsika ro hahazoantsika fiaina farany ze soa  io. (Romanina 5:15) Fe mahafalifaly Jehovah avao ty mamaly soa ty mpanompony tsy mivaliky. Teany hahazo “ty fiaina vatany” iha. Fiaina mahasambatsy noho mampiada voho maharitsy zisiky farany, zay ro ho azon’olo mijano amy fitiava Ndranahary ao.

23. Manino iha ro mila mijano amy fitiava Ndranahary ao?

23 Tokony hanontany ty vatantsika tsika kiraidraiky hoe: ‘Manompo a Ndranahary manahaky ty resahy amy Baiboly ao va aho?’ Mety ty ataontsika laha miezaky manao any zay sanandro tsika. Afaky matoky tsika fa ho fialofa ho antsika Jehovah. Hiaro ty mpanompony tsy mivaliky ie amy andro farany mivalintoa toy. Havotany koa tsika, le handesiny amy tontolo vaovao soasoa ao, sady fa marìny. Ho falifaly vatany tsika amy fotoa zay! Ho falifaly marè koa tsika satria nahay nifily soa tanaty ty andro farany! Laha mahay mifily koa iha henanizao, le hahazo “ty fiaina vatany”, tsy ino zay fa ty fiaina manahaky ty nitiava Jehovah azy, ho zisiky farany tsy misy fahatamperany!