Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 TOKO FAHA-7

Raha Tamàny Azo Antoky Mikasiky ty Longonao fa Nimaty

Raha Tamàny Azo Antoky Mikasiky ty Longonao fa Nimaty
  • Ino ty ahaizantsika fa hovelomy vatany ty maty?

  • Ino ty porofo fa maniry hamelo ty maty Jehovah?

  • Ia iaby ty olo hovelomy amy maty?

1-3. Ia ty fahavalo mania antsika iaby? Manino ro hampaivaiva antsika ty fandiniha ty fampianara Baiboly mikasiky raha zay?

NDAO hatao hoe lomay fahavalo romotsy raiky iha. Matanjaky mandilatsy anao ie sady mahalay. Hainao fa tsy handefitsy ie, satria fa nihitanao ty namonoany ty namanao sisany. Mihamarìny anao avao ie, ndre fa miezaky marè iha lomay azy. Tsy misy raha tamàny sasy toy, hoy ty asanao. Fe tampotampoky teo, le nisy mpanavotsy niavy. Matanjaky mandilatsy fahavalo iny mpanavotsy io sady nampitamà ie fa hanavotsy anao. Zay iha vo hetra!

2 Azo volany hoe hiany fahavalo io iha, hianiny iaby tsika. Hitantsika tamy toko taloha tao, fa kaihy ty Baiboly hoe fahavalo ty fahafatesa. Tsy misy maharesy azy tsika. Maro amintsika ro fa nahita azy nangalaky ty ay ty longontsika. Fe mbo mahery marè mandilatsy ty fahafatesa, Jehovah. Mpanavotsy be fitiava ie sady fa nanome porofo fa resiny ty fahafatesa. Mivola ty Baiboly hoe: “Hatao tsy misy ty fahafatesa, azy fahavalo farany iny.” (1 Korintianina 15:26) Vaovao soa vatany raha zay!

3 Ndao hohenteantsika tse hoe manao akory tsika lafa tratsy fahavalo io ty longontsika. Ho haintsika soa amy zay ty raha raiky nampitamany hahasambatsy antsika. Tsy ino  zay fa ty hoe hovelomy Jehovah ndraiky ty maty. (Isaia 26:19) Afaky mitamà tsika, fa hovelomy ty olo fa nimaty.

LAFA MISY LONGO MATY

4. a) Manino ro manampy antsika hahay Jehovah ty raha natao Jesosy? b) Ia ro nanjary nama Jesosy marè?

4 Fa nisy longonao fa nimaty va? Manaly tsy ho tanty ty alahelo azo baka amy raha zay. Mahatiaro ho tsy mahakofoky tsika, lafa miseho raha zay. Soa laha mandiniky ty Safà Ndranahary tsika amy fotoa manahaky rey, mba hahazoa fampahereza. (Vakio 2 Korintianina 1:3, 4.) Manampy antsika ty Baiboly hahay hoe, manao akory Jehovah noho Jesosy, lafa misy maty. Tantarà ao fa nalahelo Jesosy, lafa nisy maty. Nanahaky Babany marè ie. (Jaona 14:9) Lafa ta Jerosalema any ie, le nahazatsy azy ty nisafo Lazarosy noho Maria voho Marta ta Betania, tanà nariniky teo. Nanjary namany marè rozy telo mianadahy. Mivola ty Baiboly hoe: “Tea Jesosy, Marta noho ty rahavaviny voho Lazarosy.” (Jaona 11:5) Fe nimaty Lazarosy, araky ty fa nihitantsika.

5, 6. a) Nanao akory Jesosy lafa nahita longo noho nama Lazarosy rey nalahelo? b) Manino ro mampahery antsika ty mahay, fa nalahelo Jesosy?

5 Nanao akory Jesosy lafa nimaty namany iny? Volany ty Baiboly fa nalahelo niaraky tamy longo noho nama Lazarosy rey ie. Nampalahelo azy ty nahita an-drozy. “Nalahelo marè Jesosy tam-pony tao sady nangotsoky ty ainy”, bakeo ‘nilatsaky ty ranomasony.’ (Jaona 11:33, 35) Midika va zay fa tsy nisy raha tamàny Jesosy? Tsy zay, satria hainy fa hisy raha soa hiseho bakeo. (Jaona 11:3, 4) Fe ndre teo zay, le nalahelo ie lafa nisy maty.

6 Mampahery antsika ty mahay fa nalahelo Jesosy. Midika zay fa tsy teany, noho tsy tea Jehovah Babany ty fahafatesa. Mahavita mialy noho maharesy fahavalo io Jehovah Ndranahary! Hohenteantsika hoe ino ty raha nivita Jesosy, lafa namea Jehovah hery ie.

 “NAO LAZAROSY, MIBOAHA!”

7, 8. Manino tsika ro mivola fa laha ty hevitsin’olo, le fa tsy misy raha tamàny sasy Lazarosy? Fe ino ty natao Jesosy?

7 Nampangalà Jesosy, vato nanampena lakato nandevena any Lazarosy iny. Fe tsy naneky Marta, satria fa efatsy andro ty nahafatesany sady mety fa nanomboky ho lo ty fatiny. (Jaona 11:39) Laha ty hevitsin’olo avao, mbo misy raha tamàny va?

Lafa nivelomy Lazarosy, le nifalifaly marè iaby ty olo teo.​—Jaona 11:38-44

8 Fe nalà avao vato iny. Nikaiky marè amy zay Jesosy hoe: “Nao Lazarosy, miboaha!” Ino ty raha niseho? “Niboaky lahilahy fa nimaty iny.” (Jaona 11:43, 44) Falifaly iaby ty olo nahita raha zay! Samby nahay iaby ty olo teo, ndre ty troky raiky aminy, ndre ty longony, ndre ty namany fa, fa nimaty Lazarosy. Fe nitsanga tamin-drozy teo ndraiky lahilahy tean-drozy marè io. Le atao ho vandy raha niseho zay. Tsy isalasalà fa maro ty olo nandrakoky any Lazarosy. Resy vatany ty fahafatesa tamy fotoa zay!

Nivelomy Elia ndraiky anakilahy, ampela maty valy iny.​—1 Mpanjaka 17:17-24

9, 10. a) Ino ty porofo fa tsy ty hery Jesosy ro nampiasàny, lafa namelo Lazarosy tamy maty ie? b) Ino ty soa ho azontsika, lafa mamaky tantaran’olo nivelomy tamy maty reo tsika?

9 Tsy nivola Jesosy hoe heriny ro nahavitany fahagagà miavaky io. Lafa nivavaky ie taloha ty nikaihany Lazarosy hiboaky bakao, le natorony soa fa Jehovah ro namelo maty iny. (Vakio Jaona 11:41, 42.) Tsy tamy zay avao Jehovah ro nampiasa ty heriny hameloma ty maty. Raiky avao amin’olo sivy nivelomy ndraiky hita amy Baiboly ao Lazarosy. * Soasoa ty mamaky noho mianatsy tantara reo. Hitantsika baka amy raha rey, fa tsy mifilifily olo Ndranahary satria ndre tanora, ndre antitsy, ndre lahilahy, ndre ampela, ndre Israelita, ndre tsy Israelita, le nivelominy tamy maty iaby. Volany amy tantara rey koa fa, falifaly iaby  ty olo! Lafa nivelomy Jesosy tamy maty, ohatsy, ajà ampela raiky zay, le “falifaly biby” ty baba noho reniny. (Marka 5:42) Tsy hohalinon-drozy mihintsy raha soa natao Jehovah zay.

Nivelomy apostoly Petera ndraiky ampela kristiana raiky, atao hoe Dorkasy.​—Asan’ny Apostoly 9:36-42

10 Mbo nimaty avao ndraiky olo nivelomy Jesosy rey. Midika va raha zay, fa tsy nisy dikany ty nameloma an-drozy tamy maty? Tsy zay. Mampiseho fahamarina sisany baka amy Baiboly ao raha reo, sady mahavy antsika hanan-draha tamàny.

FIANARA RAMBESINTSIKA BAKA AMY FAMELOMA TY MATY

11. Manino ty tantara Lazarosy ro ahità fa marina ty Mpitoriteny 9:5?

11 Mivola ty Baiboly hoe “ty maty tsy mahay ndre ino ndre ino.” Tsy mahatiaro raha rozy, sady tsy velo ambalimbaliky any. Manaporofo raha zay ty tantara Lazarosy. Ino ty nivolaniny, lafa nivelomy ndraiky ie? Nitantara raha nampatahotsy tan-danitsy any va ie? Sa ie nampihorohoro olo mikasiky afobe mampatahotsy? Aha. Tsy mivola mihintsy ty Baiboly hoe nitantara raha manahaky zay ie. ‘Tsy nahay ndre ino ndre ino’ Lazarosy, tanaty efatsy andro nahafaty azy zay. (Mpitoriteny 9:5) Niroro tamy fahafatesa tao avao ie.—Jaona 11:11.

12. Manino tsika ro matoky fa nivelomy tamy maty vatany Lazarosy?

12 Hita baka amy tantara Lazarosy io koa, fa misy vatany ty fameloma ty maty, fa tsy hoe tapasiry avao. Maro ty vavolombelo nahita, fa nivelomy Jesosy tamy maty Lazarosy. Ndre ty mpitariky fivavaha nalay Jesosy aza, le naneky fa nisy vatany fahagagà io. Fe hoy ty asan-drozy: “Ino ty hataontsika fa manao famantara maro lahilahy iny [Jesosy]?” (Jaona 11:47) Maro ty olo nandeha nanenty Lazarosy nivelomy tamy maty, ka nanjary maro ty olo nino any Jesosy. Lafa nihitan-drozy Lazarosy, le naneky rozy fa nirahy Ndranahary vatany Jesosy. Navesatsy marè  porofo io, farany nanao tetiky mba hamonoa any Jesosy noho Lazarosy, mpitariky fivavaha jiosy raty say reo.—Jaona 11:53; 12:9-11.

13. Manino tsika ro mino fa afaky mamelo ty maty vatany Jehovah?

13 Sarotsy va ty mino hoe hovelomy vatany ty maty? Aha, satria nivola Jesosy fa hovelomy ndraiky “ze iaby an-dolo any” afarafara ao. (Jaona 5:28) Mpamoro ty kila raha iaby miay Jehovah. Le ho sarotsy aminy va ty hamoro an-drozy ndraiky? Tsy sarotsy, fa mianky amy ty fahatiarova Jehovah avao. Ho tiarony iaby va ty longontsika fa nimaty? An-tapitrisany tapitrisa maro ty basia, fe amea Ndranahary anara kiraidraiky! (Isaia 40:26) Afaky matoky tsika fa mahatiaro soa, ty mikasiky longontsika fa nimaty rey ie, sady fa parè hamelo an-drozy ndraiky.

14, 15. Laha hentea ty safà Joba, ino ty porofo fa ta hamelo ty maty vatany Jehovah?

14 Ino ty mahavy antsika hatòky, fa ta hamelo ty maty vatany Jehovah? Satria zay ty safàny amy Baiboly ao. Nanontany ho zao Joba, azy lahilahy tsy nivaliky iny: “Laha maty ty lahilahy mahery, mbo ho velo ndraiky va ie?” Nivola Joba fa handiny an-dolo ao ie, zisiky hiavia ty fotoa hahatiarova Ndranahary azy. Nivola tamy Jehovah ie hoe: “Hikaiky iha, le hanoy aho, satria irìnao marè ty hahita ty asan-tananao.”—Joba 14:13-15.

15 Mba eritsereto moa! Maniry ta hamelo ty maty ndraiky Jehovah. Tsy mampahery anao va ty mahay raha zay? Fe manao akory ty mikasiky fameloma ty maty amy hoavy? Ia iaby ro hovelomy? Aia ty hameloma an-drozy?

“ZE IABY AN-DOLO ANY”

16. Hanao akory ty fiaina lafa hovelomy ty maty?

16 Mampianatsy antsika raha maro mikasiky ty fameloma ty maty amy hoavy, ty famakia tantaran’olo nivelomy tamy maty amy Baiboly ao. Tan-tany tetoy avao rozy ro  nivelomy ka nahita ty longony ndraiky. Manahaky zay avao koa ty hiseho amy hoavy, fe mbo ho soa mandilatsy zay. Nihitantsika tamy Toko faha-3 tao, fa tea Ndranahary hovà paradisa tany toy iaby. Tsy ho feno aly, halatsy miharo vonoan’olo noho arety sasy an-tany etoa, lafa hovelomy ty maty. Afaky hiay zisiky farany an-tany etoa rozy, sady hiay amy fiaina milamy noho sambatsy.

17. Ia iaby ro hovelomy amy maty?

17 Ia ro hovelomy amy maty? Nivola Jesosy hoe ‘hahare ty feony ze iaby an-dolo any, le hiboaky.’ (Jaona 5:28, 29) Mivola koa ty Apokalypsy 20:13 hoe: “Ty riaky nampiboaky ty maty taminy tao, le ty fahafatesa noho ty lolo nampiboaky ty maty taminy tao.” Ty lolo misy ty maty iaby, ro teany hovolany amy hoe “lolo” eto. (Henteo Fanazavà Fanampiny hoe “Ino ty Atao hoe Sheôl noho Haides?”) Fa tsy hisy raha sasy amy lolo io ao amy hoavy, satria fa hovelomy ndraiky ty olo an’arivony tapitrisa niroro tao. Nivola apostoly Paoly hoe: “Hisy fameloma ty marina noho ty tsy marina.” (Asan’ny Apostoly 24:15) Ino ty dika raha zay?

Hovelomy ty maty amy Paradisa ao, ka hifankahita amy ty longony ndraiky

18. Ia iaby ro tafilitsy amy “ty marina” hovelomy amy maty reo? Ino ty vokatsy ty fitamananao raha zay?

18 Tafilitsy amy hoe “ty marina” ty ankamaroan’olo resahy amy Baiboly ao, azy nivelo taloha ty niavia Jesosy tan-tany etoy rey. Vasa tiaronao ry Noa, Abrahama, Saraha, Mosesy, Estera noho ty maro hafa. Hita amy Hebreo toko faha-11 ao ty sisany amy lahilahy noho ampela nanam-pinoa reo. Fe mbo anaty “ty marina” avao koa ty mpanompo Jehovah maty amy andro henanizao. Tsy matahotsy ty ho maty sasy tsika, satria mitamà ty fameloma ty maty.—Hebreo 2:15.

19. Ia azy “tsy marina” reo? Soa fanahy Jehovah, ka ino ty raha hengàny hataon-drozy?

19 Ka manao akory azy tsy nanompo Jehovah na tsy nanoriky ty safàny, satria tsy nahay azy mihintsy? Tsy  hohalino, azy “tsy marina”, an’arivony tapitrisisa rey. Hovelomy amy maty koa rozy, le hamea fotoa hianarany mikasiky Ndranahary marina iny, noho hanompoany azy. Anaty ty arivo tao, le hovelomy ty maty sady hengà hiay an-tany etoa, miaraky amy ty mpanompo Jehovah tsy mivaliky. Ho soasoa vatany ty fiaina amy zay. Fotoa zay ro kaihy ty Baiboly hoe Andro Fitsarà. *

20. Ino Gehena zao? Ia ro ho mbeo?

20 Midika va zay fa hovelomy iaby lafa kila olo maty? Aha. Mivola ty Baiboly, fa amy “Gehena” ao ty maty sisany. (Lioka 12:5) Baka amy anara pilasy fanaria fako, tambaliky Jerosalema taloha tany, ty anara hoe Gehena. Noroa tany ty faty noho ty fako. Naria tany ze fatin’olo nieritserety ty Jiosy hoe tsy maeva halevy, noho tsy maeva hovelomy ndraiky. Hita baka amy zay, fa mety soa laha kaihy hoe Gehena, ty fandripaha zisiky farany. Jehovah ro mampiboaky ty didim-pitsarà farany, ndre ampiasany amy fitsarà ty velo noho ty maty aza Jesosy. (Asan’ny Apostoly 10:42) Tsy hovelominy sasy, ze ataony hoe raty fanahy noho tsy mety miova.

FAMELOMA HO AN-DANITSY ANY

21, 22. a) Ino ty karaza fameloma hafa volany ty Baiboly? b) Ia ro voalohany nivelomy tamy maty, ka nanjary fanahy?

21 Misy karaza fameloma ty maty hafa koa hita amy Baiboly ao. Volany ao fa misy olo hovelomy amy maty, mba hanjary fanahy an-danitsy any. Ohatsy raiky avao ro hita amy Baiboly ao, tsy ia zay fa Jesosy Kristy.

22 Tsy nengà Jehovah hijano tan-dolo ao avao Anakiny tsy nivaliky io, lafa nisy namono. (Salamo 16:10; Asan’ny Apostoly 13:34, 35) Nivelominy tamy maty Jesosy, fe tsy  olombelo sasy ie tafara raha zay. Nanazava apostoly Petera fa “nofotsy [Kristy] lafa nivonoa, fa fanahy lafa nivelomy.” (1 Petera 3:18) Fahagagà bevata vatany raha zay. Velo ndraiky Jesosy sady nanjary fanahy mahery! (Vakio 1 Korintianina 15:3-6.) Ie ro voalohany nahazo voninahitsy bevata io. Fe hisy olo hafa koa hovelomy amy maty ka hanjary fanahy.—Jaona 3:13.

23, 24. Ia “aondry vitsy” Jesosy reo? Firy ty isan-drozy?

23 Lafa hay Jesosy fa marìny himpoly an-danitsy any ie, le nivola tamy mpianatsiny tsy nivaliky reo, fa “hanoma pilasy” ho ahin-drozy any. (Jaona 14:2) Nikaihiny hoe “aondry vitsy” ty olo manan-danitsy any. (Lioka 12:32) Firy ty isa Kristiana tsy mivaliky reo? Nivola apostoly Jaona amy Apokalypsy 14:1 ao hoe: “Le nihitako ty Anak’aondry [Jesosy Kristy] nitsanga tamy Vohitsy Ziona teo, le nisy 144 000 niaraky taminy, nana ty anara Anak’aondry noho ty anara Babany voasoratsy tamy handrin-drozy teo.”

24 Hovelomy amy maty Kristiana 144 000 reo, sady hiay an-danitsy any. Tafilitsy amy zay ty apostoly Jesosy tsy nivaliky. Ombia rozy ro hovelomy? Volany apostoly Paoly hoe anaty ty fanatreha Kristy. (1 Korintianina 15:23) Ho hitanao amy Toko faha-9 ao fa miay amy fotoa io tsika henanizao. Midika raha zay fa, avy le hovelomy ho an-danitsy any, ze sisa tavela amy 144 000 reo lafa maty. (1 Korintianina 15:51-55) Fe hiay amy Paradisa an-tany etoa iaby ty ankamaroan’olo hovelomy amy maty.

25. Ino ty hianarantsika amy toko manaraky?

25 Haharesy fahafatesa fahavalontsika io vatany Jehovah, bakeo tsy hisy sasy raha io zisiky farany! (Vakio Isaia 25:8.) Mety hieritseritsy iha hoe: ‘Hanao ino an-danitsy any azy hovelomy ho any reo? Ho mpanday Fanjakà raiky an-danitsy any rozy. Hianatsy raha maro mikasiky fanjakà farany ze soa io tsika amy toko manaraky ao.

^ feh. 9 Hita amy 1 Mpanjaka 17:17-24; 2 Mpanjaka 4:32-37; 13:20, 21; Matio 28:5-7; Lioka 7:11-17; 8:40-56; Asan’ny Apostoly 9:36-42, noho 20:7-12 ao ty tantara sisany.

^ feh. 19 Laha teanao ty hahazo fanazavà fanampiny mikasiky ty Andro Fitsarà noho ty fototsy na ty antony itsarà ty olo, le henteo Fanazavà Fanampiny hoe “Ino ty Atao hoe Andro Fitsarà?