Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 FANAZAVÀ FANAMPINY

Ino ty Atao hoe Andro Fitsarà?

Ino ty Atao hoe Andro Fitsarà?

INO ro avy an’eritseritsinao ao lafa maharè hoe Andro Fitsarà iha? Maro ty mieritseritsy fa hotsarà kiraidraiky, aloha ty sezi-mpanjakà Ndranahary eo ty olo an’arivony tapitrisa, amy andro io. Hamea raha soa ty sisany, ka hiay amy paradisa an-danitsy any. Fa ty hafa ho voasazy hijaly zisiky farany. Fe tsy mitovy amy zay mihintsy ty raha volany ty Baiboly mikasiky Andro Fitsarà io. Tsy mampavaka andro io fa andro natao hitamàna raha soa, noho fotoa hampimpolia amy pilasiny ty raha iaby.

Hoy ty apostoly Jaona mikasiky ty Andro Fitsarà amy Apokalypsy 20:11, 12 ao: “Nahita sezi-mpanjakà foty bevata aho, le nihitako azy mipetraky tanabony eo iny. Nilay tsy ho alohany eo ty tany noho ty lanitsy, sady tsy nisy pilasy ho ahin-drozy. Le nihitako ty maty, ndre ty be ndre ty kely, nitsanga taloha sezi-mpanjakà teo, le nisy boky mihoro nisokafy. Fe nisy boky mihoro raiky hafa koa nisokafy, tsy ino fa ty boky mihoro ty fiaina. Ka ty maty nitsarà araky ze raha voasoratsy tamy boky mihoro reo ao, araky ze raha nataon-drozy.” Ia mpitsara volany eo io?

Jehovah Ndranahary ro Mpitsara farany anabo. Fe misy olo hafa nanankinany fitsarà zay. Nivola ty apostoly Paoly amy Asan’ny Apostoly 17:31 ao, fa Ndranahary “fa nanondro andro raiky fa nieritseretiny hitsarà ty tany ipetraha, eka hitsaràny azy araky ty marina, amy alala lahilahy raiky voatendriny.” Jesosy Kristy fa nivelomy tamy maty nitendreny ho Mpitsara io. (Jaona 5:22) Ka  ombia zao ro manomboky ty Andro Fitsarà? Le ho zisiky ombia?

Hita amy Apokalypsy ao fa hanomboky afara ty aly Hara-magedona raha io, lafa rava ty tontolo Satana. * (Apokalypsy 16:14, 16; 19:19–20:3) Hogadrà arivo tao amy lavaky mangoakoaky Satana noho ty demoniany afara aly io. Fe ho mpitsara noho ‘hiaraky manjaka amy Kristy [an-danitsy any] 1 000 tao’, 144 000 mpiaraky mandova aminy rey. (Apokalypsy 14:1-3; 20:1-4; Romanina 8:17) Tsy raha malisalisa hatao anaty ty 24 lera avao ty Andro Fitsarà, fa haharitsy arivo tao.

“Hitsara ty velo noho ty maty” Jesosy Kristy anaty arivo tao io. (2 Timoty 4:1) Ia azy “velo” reo? Ty “vahoaky be” ho tafaboaky velo amy Hara-magedona. (Apokalypsy 7:9-17) Nahita “ty maty ...nitsanga taloha ty sezi-mpanjakà teo” koa ty apostoly Jaona. Araky ty nampitamàny Jesosy, le ‘haharè ty feony ze iaby an-dolo any le hiboaky’, na koa hovelomy ndraiky. (Jaona 5:28, 29; Asan’ny Apostoly 24:15) Fe mifototsy amy ino ty fitsarà olo iaby reo?

Hoy apostoly Jaona: “Nisy boky mihoro nisokafy ka ty maty nitsarà araky ze raha voasoratsy tamy boky mihoro reo ao, araky ze raha nataon-drozy.” (Apokalypsy 20:12) Ty raha nataon’olo taloha va ro hita amy boky mihoro reo ao? Aha, satria tsy ze raha nataony taloha ty nahafaty azy ro hitsarà azy. Manao akory ty ahaizantsika raha zay? Satria hoy ty Baiboly: “Ze maty, le afaky maliolio amy fahotàny.” (Romanina 6:7) Azo volany hoe fa natao malio tamy fahotàny azy hovelomy amy maty reo. Laha zay ro ie, le azo antoky fa ty raha hafa takỳ Ndranahary ro hita amy boky mihoro reo ao. Mila manoriky ty didiny ty olo ho tafaboaky velo amy Hara-magedona noho azy hovelomy amy maty reo, laha ta ho velo zisiky farany. Mila orihin-drozy koa ze raha vaovao takỳ Jehovah  anaty ty arivo tao. Midika zay, fa ty raha ataon’olo amy Andro Fitsarà ro hitsarà azy.

Vo samban’olo an’arivony tapitrisa ty hianatsy noho hanao ty raha tea Ndranahary, amy Andro Fitsarà io. Midika zay fa hisy asa bevata hatao mba hampianara an-drozy. “Hianatsy fahamarina [vatany] ty olo an-tany etoy.” (Isaia 26:9) Fe tsy ty olo iaby ro ta hanao ty sitrapo Ndranahary. Hoy ty Isaia 26:10: “Tsy hianatsy fahamarina ty raty fanahy, ndre fa ferinesa. Tsy hanao ty rariny ie, ndre amy tany ty fahitia ao aza. Sady tsy hahita ty maha anabo Jehovah ie.” Haripaky tsy hisy sasy raty fanahy reo amy Andro Fitsarà io.—Isaia 65:20.

Lafa ho tampitsy ty Andro Fitsarà, le ho “velo” vatany ty olo sisa tsy nimaty, satria fa lavorary. (Apokalypsy 20:5) Midika zay, fa hampoly amy fahalavoraria ndraiky ty olo amy Andro Fitsarà. (1 Korintianina 15:24-28) Bakeo, hisy fitsapà farany. Habototsy Satana, le hengà hamitaky farany ty olombelo. (Apokalypsy 20:3, 7-10) Ho tanteraky amy ty olo nahavita nanohitsy azy raha ampitamàny ty Baiboly toy: “Ty olo marina handova ty tany, le hipetraky eo zisiky farany.” (Salamo 37:29) Ho fitahia ho ahin’olo tsy mivaliky vatany ty Andro Fitsarà!

^ feh. 1 Manazava mikasiky ty Hara-magedona ty boky Fandresen-dahatra Miorina Amin’ny Soratra Masina, pejy 268-273 noho ty toko 20 amy boky Mivavaha Amin’ilay Hany Andriamanitra Marina, naboaky ty Vavolombelo Jehovah.