Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 TOKO FAHA-8

Ino Fanjakà Ndranahary Zao?

Ino Fanjakà Ndranahary Zao?
  • Ino ty volany amy Baiboly ao mikasiky ty Fanjakà Ndranahary?

  • Ino ty raha hataony?

  • Ombia Fanjakà io ro hanatanteraky ty sitrapo Ndranahary an-tany etoy?

1. Ino ty vavaky malaza hodinihintsika?

HAIN’OLO maro an-tany etoy ty vavaky hoe Babanay an-danitsy any, kaihy koa hoe Vavaky Nampianary Tompo. Vavaky modely namea Jesosy Kristy raha io. Misy hevitsy maro soa ho hay ty anatiny ao. Hazava soa aminao hoe ino marina ro ampianary ty Baiboly, lafa mandiniky fangataha telo voalohany amy vavaky io ao iha.

2. Ino iaby ty fangataha telo, tea Jesosy hatao ty mpianatsiny?

2 Nivola ho zao Jesosy amy fanomboha vavaky io ao hoe: “Mivavaha ho zao nareo: ‘Babanay an-danitsy any, hohamasiny lahy ty anaranao. Ho avy lahy ty fanjakànao. Hatao an-tany etoy lahy ty sitraponao, manahaky ty an-danitsy any.’ ” (Matio 6:9-13) Ino ty dika fangataha telo reo?

3. Ino ty raha mila haintsika mikasiky ty Fanjakà Ndranahary?

3 Fa nianatsy raha maro mikasiky ty anara Ndranahary hoe Jehovah tsika. Fa nianarantsika koa ty sitrapo Ndranahary, ty raha fa nivitany noho mbo hataony ho ahin’olombelo. Fe ino ty tea Jesosy hovolany lafa nampirisiky antsika hivavaky ie hoe: “Ho avy lahy ty fanjakànao”? Ino Fanjakà Ndranahary zao? Manao akory ty hanamasinany ty anara Ndranahary? Ino koa ty  ifandrambesa ty fiavia Fanjakà io noho ty fanaova ty sitrapony?

INO FANJAKÀ NDRANAHARY ZAO?

4. Ino Fanjakà Ndranahary zao? Ia ty Mpanjakany?

4 Fanjakà natsanga Jehovah, andesy ty Mpanjaka finiliny raha io. Ia Mpanjaka io? Jesosy Kristy. Anabo mandilatsy ty mpitariky olombelo iaby Jesosy Mpanjaka, sady kaihy hoe “Mpanjaka ty mpanjaka” noho “Tompo ty tompo.” (1 Timoty 6:15) Mana hery hanaova raha soa mandilatsy ty kila mpanday olombelo ie, ndre ty farany mahay amin-drozy aza.

5. Baka aia ty Fanjakà Ndranahary ro handay ty vahoakiny? Aia ty faritsy hanjakany?

5 Baka aia Fanjakà Ndranahary io ro handay ty vahoakiny? Aia Jesosy henanizao? Tiarovo fa nivonoa tamy hazo fijalea teo ie, bakeo nivelomy ndraiky. Niakatsy an-danitsy any ie, fotoa kelikely tafara raha zay. (Asan’ny Apostoly 2:33) Midika zay, fa an-danitsy any ro misy ty Fanjakà Ndranahary. Zay mahavy ty Baiboly hikaiky azy hoe ‘fanjakà an-danitsy any.’ (2 Timoty 4:18) Fe ndre zay, le hanjaka amy tany toy iaby Fanjakà io.—Vakio Apokalypsy 11:15.

6, 7. Manino Jesosy ro Mpanjaka miavaky?

6 Manino Jesosy ro Mpanjaka miavaky? Satria tsy mety maty ie. Ampitahà ty Baiboly amy mpanday fanjakà olombelo Jesosy, volaniny ao fa “ie raiky avao ro tsy mety maty, sady mipetraky amy hazavà tsy hay vonjè.” (1 Timoty 6:16) Midika zay, fa haharitsy ty raha iaby ataony. Hanao raha soa maro ho ahy ty vahoakiny vatany ie.

7 Ho zao ty faminania mikasiky Jesosy: “Hipetraky aminy ty Fanahy Jehovah, le ty fanahy manome fahendrea noho fahihira noho torohevitsy noho hery noho fahaizan-draha, voho fahatahora any Jehovah.  Hahafalifaly azy ty fahatahora any Jehovah. Tsy hitsara araky ze hita ty masony avao ie, na hananatsy araky ze re ty sofiny, fa araky ty rariny ro hitsarany ty mahantra, voho araky ty hitiny ro hananarany ty olo, mba hahasoa ty mpandefitsy an-tany etoa.” (Isaia 11:2-4) Midika zay, fa hanao raha marina noho hiferinay olo an-tany etoy Jesosy Mpanjaka. Teanao va ty hana mpanjaka manahaky zay?

8. Ia iaby ro hiaraky manjaka amy Jesosy?

8 Tsy Jesosy raiky avao ro hanjaka, fa hisy olo hafa koa hiaraky manjaka aminy. Nivola tamy Timoty ohatsy apostoly Paoly hoe: “Laha miaritsy avao tsika, le ho mpanjaka hiaraky manday aminy.” (2 Timoty 2:12) Hiaraky manjaka amy Jesosy an-danitsy any Paoly noho Timoty voho ty olo hafa tsy mivaliky finily Ndranahary. Firy rozy ro hahazo raha zay?

9. Firy ty hiaraky manjaka amy Jesosy? Nanomboky nombia Ndranahary ro nifily an-drozy?

9 Hitantsika tamy Toko faha-7 tao fa nahazo fahità apostoly Jaona. Nihitany “ty Anak’aondry [Jesosy Kristy] nitsanga tamy vohitsy Ziona [pilasy mpanjaka tanjahany an-danitsy any] teo, le nisy 144 000 niaraky taminy, nana ty anara Anak’aondry noho ty anara Babany voasoratsy tamy handrin-drozy teo.” Ia 144 000 reo? Mbo nivola avao Jaona hoe: “Rozy ro nanoriky avao ty Anak’aondry ndre taia ndre taia ty nandehanany. Baka amin’olombelo teo ro niviliana an-drozy mba ho voaloham-bokatsy ho ahy Ndranahary noho ty anak’aondry.” (Apokalypsy 14:1, 4) Mpianatsy Jesosy Kristy tsy nivaliky rozy, sady finily hiaraky manjaka aminy an-danitsy any. Lafa nivelomy ndraiky ho an-danitsy any rozy, le ‘ho mpanjaka handay ty tany’ hiaraky amy Jesosy. (Apokalypsy 5:10) Fa nifily Kristiana tsy nivaliky Ndranahary nanomboky  tamy fotoa nahavelo ty apostoly, mba hamenoa ty isaky 144 000.

10. Manino ro fitiava antsika vatany ty nifiliana Jesosy noho 144 000 reo handay ty olombelo?

10 Fitiava antsika vatany ty nifiliana any Jesosy noho 144 000 reo handay ty olombelo. Ino ty antony? Fa niolombelo Jesosy, sady hainy ty hoe mijaly. Nivola Paoly fa tsy hoe “tsy miferinay antsika amy ty raha mampalemy antsika” Jesosy “fa nitsapà tamy raha iaby manahaky antsika koa, fe tsy nanota.” (Hebreo 4:15; 5:8) Fa nijaly noho fa niaritsy koa azy hiaraky manjaka aminy reo. Nialy tamy tsy fahalavoraria koa rozy, sady niaritsy arety sankarazany. Azo antoky fa ho hain-drozy soa ty fahasahirana mahazo ty olombelo!

INO TY HATAO TY FANJAKÀ NDRANAHARY?

11. Manino ro nampangatahy Jesosy mpianatsiny reo, ty hanaova an-danitsy any ty sitrapo Ndranahary?

11 Tsy ty hiavia Fanjakà Ndranahary avao ro nampangatahy Jesosy ty mpianatsiny, fa ty ‘hanaova ty sitrapony an-tany etoy, manahaky ty an-danitsy any’ koa. An-danitsy any Ndranahary, sady fa manao ty sitrapony avao ty anjeliny tsy mivaliky. Fe nihitantsika tamy Toko faha-3 tao, fa tsy nanao ty sitrapony sasy ty anjely raty raiky kaihy hoe Satana Devoly, azy nitariky any Adama noho Eva hanota iny. Hianarantsika ty mikasiky anjely io amy Toko faha-10 ao. Mbo nengà hipetraky kelikely tan-danitsy any Satana noho ty anjely nanoriky azy, kaihy hoe demonia. Hita baka amy zay, fa tsy ze tan-danitsy any iaby ro nanao ty sitrapo Ndranahary. Fe niova raha zay, lafa nanomboky nanday ty Fanjakà Ndranahary. Nialy tamy Satana, Jesosy Kristy laha vo nandramby fanjakà.—Vakio Apokalypsy 12:7-9.

12. Misy raha roe bevata volany ty Apokalypsy 12:10. Ino iaby?

 12 Araky ty faminania, le ho zao ty raha niseho: “Le nahare feo marè tan-danitsy any aho, nanao ho zao: ‘Avy ty fanavota Ndranahary noho ty heriny noho ty fanjakany voho ty fahefà Kristiny henanizao, satria natoraky azy mpanasara raha raty rahalahintsika iny [Satana], azy nanasara raha raty an-drozy andro noho haly tamy Ndranaharintsika teo iny!’ ” (Apokalypsy 12:10) Ino raha roe bevata volany eo reo? Voalohany, nanomboky nanjaka ty Fanjakà Ndranahary andesy Jesosy Kristy. Faharoe, niroasy baka an-danitsy any Satana, le natoraky tan-tany etoy.

13. Nanao akory ty tan-danitsy any lafa niroasy baka any Satana?

13 Nanao akory lafa vita raha roe reo? Ho zao ty raha nisy tan-danitsy any: “Le mifalifalia iha lanitsy, noho nareo mipetraky aminy ao!” (Apokalypsy 12:12) Falifaly ty anjely tsy mivaliky an-danitsy any, satria fa tsy any sasy Satana noho ty demoniany. Tsy mivaliky amy Jehovah iaby henanizao ty an-danitsy any. Milamy noho mifankatea soa iaby ty any. Fa atao an-danitsy any henanizao ty sitrapo Ndranahary.

Nanjary feno loza ty tany, lafa niroasy baka an-danitsy any Satana noho ty demoniany. Fe tsy ho ela, le tsy hisy sasy raha zay

14. Nanao akory ty tan-tany etoy lafa natoraky etoy Satana?

14 Ka nanao akory ty tan-tany etoy? Hoy ty Baiboly: “Loza ho ahy ty tany noho ty riaky, fa nijotso aminareo any ty Devoly sady meloky marè, satria hainy fa kelikely ty fotoa ananany.” (Apokalypsy 12:12) Neloky Satana satria niroasy baka an-danitsy any, sady fa kelikely ty fotoa ananany. Mahavy “loza”, noho fijalea an-tany etoy ie. Hianatsy mikasiky “loza” zay tsika amy toko manaraky ao. Fe laha hentea raha atao Satana zay, hanao akory ty hanatanteraha Fanjakà io ty sitrapo Ndranahary an-tany etoy?

15. Ino ty raha tea Ndranahary hatao amy tany toy?

15 Tiaronao va ty raha tea Ndranahary hatao amy tany  toy? Nihitanao tamy Toko faha-3 tao raha zay. Araky ty nihita ta Edena any, fa tea Ndranahary hatao paradisa tany toy sady ho feno olo marina tsy ho maty sasy. Fe nitariky any Adama noho Eva hanota Satana, ka nanjary tsy tanteraky ty raha tea Ndranahary hatao amy tany toy. Fe tsy niova ty raha tea Ndranahary hatao, fa mbo teany ‘handova tany toy ty olo marina, le hipetraky eo zisiky farany.’ (Salamo 37:29) Zay ro hotanterahy ty Fanjakà Ndranahary. Amy fomba akory?

16, 17. Ino ty ambara Daniela 2:44 antsika mikasiky ty Fanjakà Ndranahary?

16 Diniho faminania amy Daniela 2:44 toy: “Amy andro mpanjaka reo azy Ndranahary ty lanitsy iny, le hanory fanjakà tsy ho rava zisiky farany, sady tsy ho azon’olo hafa fanjakà io. Hotorotoroeny noho haravany fanjakà iaby reo, fa ie ho eo avao zisiky amy fotoa tsy voafaritsy.” Ino ty ambara raha zay amintsika mikasiky ty Fanjakà Ndranahary?

17 Voalohany, haòry “amy andro mpanjaka reo”, na amy fotoa mbo mampisy ty fanjakà andesin’olombelo ty Fanjakà Ndranahary. Faharoe, ho eo avao zisiky farany Fanjakà io. Tsy ho resy, na hosoloa ty fanjakà hafa ie. Fahatelo, hialy ty Fanjakà Ndranahary noho ty fanjakà iaby an-tany etoa. Ty Fanjakà Ndranahary ro handresy, le ie raiky avao ro handay ty olombelo. Fanjakà soa mbo tsy nisy tetoy ndraiky ro handay ty olo amy fotoa zay.

18. Ino ro ikaiha ty aly hatao ty Fanjakà Ndranahary noho ty fanjakàn’olombelo?

18 Maro ty raha volany ty Baiboly mikasiky ty aly hatao ty Fanjakà Ndranahary noho ty fanjakà an-tany etoa. Mivola ohatsy ie, fa lafa mihamarìny ty farany, le hisy anjely raty hanaparitaky vandy hamitaha “ze mpanjaka amy tany iaby misy olo.” Ino ty antony? “Mba hamoria  an-drozy [ty mpanjaka] ho amy aly ty andro bevata Ndranahary, azy Farany ze Mahery iny.” Havory “ho amy pilasy kaihy amy safà hebreo hoe Hara-magedona” mpanjaka reo. (Apokalypsy 16:14, 16) Midika zay, fa kaihy hoe Hara-magedona ty aly hatao ty fanjakàn’olombelo noho ty Fanjakà Ndranahary.

19, 20. Manino ro mbo tsy atao an-tany etoy ty sitrapo Ndranahary?

19 Ino ty hotanterahy ty Fanjakà Ndranahary amy alala ty Hara-Magedona? Eritsereto ndraiky ty raha tea Ndranahary hatao amy tany toy. Tea Jehovah ho feno olo marina lavorary noho manompo azy ty tany, sady ho Paradisa. Nanino raha zay ro mbo tsy tanteraky? Satria mpanota tsika, ka marary noho maty. Fe nianarantsika tamy Toko faha-5 ao, fa maty ho antsika Jesosy, mba ho afaky hiay zisiky farany tsika. Tiaronao koa vasa safà Jaona amy Filazantsara ao iny hoe: “Bevata vatany ty fitiava Ndranahary, zao tontolo zao, ka nameany ty Anakilahiny toka mba tsy ho ripaky ze mampiseho finoa azy, fa hana fiaina zisiky farany.”—Jaona 3:16.

20 Mbo maro koa ty olo mpanao raty. Mavandy noho mamitaky voho raty fandaisam-bata rozy. Tsy ta hanao ty sitrapo Ndranahary rozy, ka ho ripaky amy Aly Hara-magedona. (Vakio Salamo 37:10.) Mbo tsy atao an-tany etoy koa ty sitrapo Ndranahary, satria tsy mampirisiky ty olo hanao raha zay ty fanjakà. Maro ty fanjakà tsy mahay manday, raty fanahy noho tsy manao ty marina. Mivola mazava ty Baiboly fa “nanjakazaka tamy ty namany ty olo ka nampilitsy loza taminy.”—Mpitoriteny 8:9.

21. Manao akory ty hanatanteraha Fanjakà io ty sitrapo Ndranahary an-tany etoy?

21 Ty Fanjakà Ndranahary avao sisa ro handay ty olombelo, lafa vita Hara-magedona. Fanjakà io ro hanao ty sitrapo Ndranahary sady handay fitahia bevata. Tsy hengany hiasa  sasy, ohatsy, Satana noho ty demoniany. (Apokalypsy 20:1-3) Handay fitahia koa ty soro natao Jesosy, ka tsy harary na ho maty sasy ty olo tsy nivaliky. Afaky hiay zisiky farany rozy. (Vakio Apokalypsy 22:1-3.) Hanjary paradisa tany toy. Hanatanteraky ty sitrapo Ndranahary an-tany etoy Fanjakà io, sady hanamasy ty anarany. Ino ty dika raha zay? Midika raha zay, fa hanome voninahitsy ty anara hoe Jehovah iaby ty vahoaky andesy ty Fanjakà Ndranahary.

NOMBIA FANJAKÀ NDRANAHARY IO RO NANOMBOKY NIASA?

22. Manino ro haintsika fa tsy tamy Jesosy tan-tany etoy, na tsiela tafara ty nameloma azy tamy maty ro niavia ty Fanjakà Ndranahary?

22 Mbo tsy niavy Fanjakà io, kanao Jesosy nivola tamy ty mpianatsiny hivavaky hoe: “Ho avy lahy ty Fanjakanao.” Niavy va raha io lafa niakatsy tan-danitsy any Jesosy? Aha, satria nivola Petera noho Paoly, fa lafa nivelomy tamy maty Jesosy, le tanteraky taminy faminania amy Salamo 110:1 hoe: “Hoy Jehovah tamy Tompoko: ‘Mipetraha ankavanako eto Zisiky hanaovako ty fahavalonao ho fasianao tomboky.’ ” (Asan’ny Apostoly 2:32-35; Hebreo 10:12, 13) Midika zay, fa hisy fandinisa tse.

Lafa manday Fanjakà iny, le hatao an-tany etoy ty sitrapo Ndranahary, manahaky ty atao an-danitsy any

23. a) Nombia ro nanomboky nanday ty Fanjakà Ndranahary? b) Ino ty hodinihy amy toko manaraky?

23 Nombia ty nitampera fandinisa io? Araky ty konty natao ty mpianatsy Baiboly, tamy farampara tao 1800 noho  tamy voalohandoha tao 1900 reo, le tampitsy tamy 1914 fandinisa io. (Henteo Fanazavà Fanampiny hoe “1914: Tao Miavaky amy Faminania amy Baiboly Ao.”) Marina raha zay laha hentea ty raha niseho nanomboky tamy 1914. Hita amy fahatanteraha ty faminania amy Baiboly ao, fa nanjary Mpanjaka Kristy tamy 1914, sady nanomboky nanday ty Fanjakà Ndranahary an-danitsy any. Midika zay, fa miay amy “fotoa kelikely” anana Satana tsika henanizao. (Apokalypsy 12:12; Salamo 110:2) Afaky matoky tsika fa tsy ho ela, le hanao raha ty Fanjakà Ndranahary, mba ho tanteraky an-tany etoy ty sitrapo Ndranahary. Tsy vaovao soa va lahy zay? Inoanao va raha zay? Ho hitanao amy toko manaraky ao, fa zay vatany ro ampianary ty Baiboly.