Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 FANAZAVÀ FANAMPINY

Ia Mikaela Arkanjely Zao?

Ia Mikaela Arkanjely Zao?

TSY voaresaky matetiky amy Baiboly ao, azy anjely kaihy hoe Mikaela iny. Fe, lafa misy firesaha mikasiky azy ao, le ie am-panaova asa zay. Mialy amy anjely raty, ohatsy, Mikaela, amy boky Daniela ao; mifamaly amy Satana ie amy taratasy Joda ao; le mialy amy Devoly noho ty demoniany ie amy Apokalypsy ao. Midika hoe “Ia ro Manahaky Ndranahary?” ty anara hoe Mikaela. Mety soa aminy anarany zay, satria miaro ty fandaisa Jehovah noho mialy amy ty fahavalony ie. Fe ia moa Mikaela zao?

Mana anara maromaro ty olo raiky kindraiky. Kaihy hoe Israely, ohatsy, Jakoba, le kaihy hoe Simona koa ty apostoly Petera. (Genesisy 49:1, 2; Matio 10:2) Atoro ty Baiboly koa, fa ty hoe Mikaela, le anara hafa ikaiha any Jesosy Kristy, taloha noho tafara ty nivelomany tan-tany etoy. Handiniky porofo baka amy Baiboly ao mikasiky raha zay tsika.

Arkanjely. Kaihy ty Baiboly hoe “arkanjely”, Mikaela. (Joda 9) Midika hoe “mpitariky ty anjely” ty safà hoe “arkanjely.” Mivola raha raiky avao safà io amy Baiboly ao. Midika zay fa raiky avao ty arkanjely. Ampifandrambesy amy Jesosy koa ty pilasy ty arkanjely. Hoy ty 1 Tesalonianina 4:16 mikasiky Jesosy Tompo nivelomy tamy maty: “Tompo mihintsy amy zay ro hijotso baka an-danitsy any ka hikomandy amy feo marè, amy feo ty arkanjely.” Hita baka amy zay, fa volany hoe feo ty arkanjely ty feo Jesosy. Sahala ta  hivola andinin-teny io hoe Jesosy mihintsy ro Mikaela arkanjely.

Mpitariky Maramila. Mivola ty Baiboly hoe “Mikaela noho ty anjeliny nialy tamy dragona iny ... noho ty anjeliny.” (Apokalypsy 12:7) Hita baka amy zay, fa Mpitariky maramila anjely tsy mivaliky, Mikaela. Mivola koa ty Apokalypsy hoe Mpitariky maramila anjely tsy mivaliky Jesosy. (Apokalypsy 19:14-16) Miresaky mikasiky “Jesosy Tompo” noho ty “anjeliny mahery” koa ty apostoly Paoly. (2 Tesalonianina 1:7) Ka, samby hita amy Baiboly ao, ndre Mikaela noho ty “anjeliny” ndre Jesosy noho ty “anjeliny.” (Matio 13:41; 16:27; 24:31; 1 Petera 3:22) Fe tsy volany ao hoe misy roe samby hafa maramila anjely tsy mivaliky an-danitsy any reo, ka ty raiky tarihy Mikaela, le ty raiky tarihy Jesosy. Hita baka amy zay hoe mbo Jesosy Kristy an-danitsy any avao Mikaela io. *

^ feh. 1 Ahità fanazavà fanampiny manaporofo fa mbo Anaky Ndranahary iny avao ro kaihy hoe Mikaela, amy pejy 298-299 amy boky Fandresen-dahatra Miorina amin’ny Soratra Masina, naboaky ty Vavolombelo Jehovah.