Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ino Marina ro Ampianary ty Baiboly?

 TOKO FAHA-15

Fivavaha Tea Ndranahary

Fivavaha Tea Ndranahary
  • Tea Ndranahary va lafa kila fivavaha?

  • Manao akory ro ahaiza ty fivavaha marina?

  • Ia ro mpanompo Ndranahary vatany henanizao?

1. Ino ty soa ho azontsika laha manompo Ndranahary araky ty tokony ho ie tsika?

MIDARY antsika vatany Ndranahary sady teany hahazo tombony baka amy ty torolalany feno fitiava tsika. Ho sambatsy noho hanalavitsy raha manahira maro tsika, laha manompo azy araky ty tokony ho ie. Hahazo fitahia noho fanampea baka aminy koa tsika amy zay. (Isaia 48:17) Fivavaha an-jatony ro manao mampianatsy ty marina mikasiky a Ndranahary, kanefa samby hafa ty raha ampianarin-drozy mikasiky azy noho ty raha teany hataontsika.

2. Manao akory ty ahaizantsika hoe ho zao ty tokony hanompoa Jehovah, le ino ty ohatsy manampy antsika hahazo hevitsy zay?

2 Manao akory ty ahaizanao hoe ho zao ty tokony hanompoa Jehovah? Tsy voatery hodinihinao noho hampitovizinao iaby ty raha ampianary ty fivavaha kiraidraiky. Mila ianaranao avao hoe ino marina ro ampianary ty Baiboly mikasiky ty fivavaha marina. Toy misy ohatsy: Mampanahira ty drala sandoky amy tany maro. Laha irahy hanenty drala sandoky rey iha, manao akory ty ahaizanao azy? Ho tiarovinao kiraidraiky iaby va ty karaza drala sandoky? Aha. Aleo ty drala marina ro dinihinao soa. Lafa hainao ty drala marina, le ho ambinao ty drala sandoky. Mitovy amy zay koa, fa ho haintsika ty fivavaha diso, lafa ianarantsika ty famantara ahaiza ty fivavaha marina.

3. Ino ty nivolany Jesosy fa tsy maintsy ataontsika laha ta hahazo hatò amy Ndranahary tsika?

 3 Mila manompo Jehovah araky ty itiavany azy tsika. Mieritseritsy ty olo maro fa mety amy Ndranahary iaby lafa kila fivavaha, fe tsy zay ro ampianary ty Baiboly. Tsy ampy ty mivola hoe zaho Kristiana. Hoy Jesosy: “Tsy ze mivola amiko hoe: ‘Tompo, Tompo’, ro hilitsy amy Fanjakà ty lanitsy, fa ze manao ty sitrapo Babako an-danitsy any iny.” Midika zay, fa laha ta hahazo hatò amy Ndranahary tsika, le tsy maintsy ianarantsika ty raha takìny amintsika bakeo ataontsika. Nikaihy Jesosy hoe “mpandika lalàna” ty olo tsy manao ty sitrapo Jehovah. (Matio 7:21-23) Tsy misy dikany manahaky drala sandoky io ty fivavaha diso, sady mbo misy vokany raty koa baka aminy.

4. Ino ty tea Jesosy hovolany lafa niresaky mikasiky lala roe rey ie, le manaia iaby lala reo?

4 Afaky ho velo zisiky farany ty olo iaby. Fanomeza baka amy Jehovah raha zay. Fe laha ta hahazo fiaina zisiky farany amy Paradisa tsika, le tsy maintsy manompo azy araky ty tokony ho ie noho mana fiaina mampifaly azy. Mampalahelo fa maro ty tsy mahefa manao raha zay. Zay nahavy Jesosy hivola hoe: “Milira amy vavahady tery. Fa bevata sady malalaky ty lala mandeha amy fandripaha any, ka maro ty militsy any. Fa tery ty vavahady sady maifitsy ty lala mandeha amy ty fiaina, ka vitsy ty mahita azy.” (Matio 7:13, 14) Mitariky ty olo ho amy fiaina zisiky farany ty fivavaha marina. Fa ty fivavaha diso mitariky ho amy fandripaha. Fe tsy tea Jehovah hisy olo ho ripaky mihintsy, ka zay ty antony anengany ty olo hianatsy mikasiky azy. (2 Petera 3:9) Hita baka amy zay, fa mianky amy ty fomba anompoantsika a Ndranahary ro hahavelo na hahafaty antsika.

TY FAMANTARA AHAIZA TY FIVAVAHA MARINA

5. Manao akory ty amantara ty olo manoriky ty fivavaha marina?

5 Manao akory ty ahità ty “lala mandeha amy fiaina”?  Nivola Jesosy fa ho hita mazava soa amy ty fiainan’olo, laha marina na tsy marina ty fivavaha orihiny. Hoy ty asany:“Ty voa vokariny ro hamantaranareo soa an-drozy. .. Ty hazo soa iaby mamoa voa soa.” (Matio 7:16, 17) Midika zay, fa ty raha inoan’olo amy fivavaha marina ao noho ty fandaisam-batany, ro amantara an-drozy. Tsy lavorary sady manao hadisoa rozy, fe miezaky manao ty sitrapo Ndranahary ty ankamaroan-drozy. Ndao tsika handiniky famantara eny ahaiza ty olo manoriky ty fivavaha marina.

6, 7. Manao akory ty fieritsereta ty mpanompo Ndranahary ty Baiboly, le ino ty modely namea Jesosy mikasiky raha zay?

6 Mifototsy amy Baiboly ty raha ampianariny. Hoy ty Baiboly: “Lafa atao raha voasoratsy amy Soratsy Masy ao le baka amy ty hery ty fanahy masy Ndranahary, sady mahasoa mba hampianara, hananara, hanarena ze diso, hitezà araky ty fahamarina, mba hahavy ty olo Ndranahary hahay soa noho ho ampy fitaova amy asa soa iaby.” (2 Timoty 3:16, 17) Nanoratsy tamy Kristiana ty apostoly Paoly hoe: “Lafa nandramby ty safà Ndranahary nirenareo baka aminay nareo, le tsy nirambesinareo ho safàn’olo raha zay fa araky ty marina, tsy ino zay fa ty safà Ndranahary, miasa an’ainareo mpino ao iny.” (1 Tesalonianina 2:13) Midika zay, fa baka amy safà Ndranahary ty raha inoan’olo manoriky fivavaha marina, fa tsy baka amy hevitsin’olo na lilin-draza.

7 Nanome modely Jesosy Kristy, satria ty Safà Ndranahary ro nataony fototsy ty fampianarany. Hoy ty asany lafa nivavaky tamy Babany an-danitsy any iny: “Ty safànao ro fahamarina.” (Jaona 17:17) Nino ty Safà Ndranahary Jesosy, sady nifanaraky tamy Soratsy Masy iaby ze raha nampianariny. Matetiky ie ro nivola hoe: “Voasoratsy hoe.” (Matio 4:4, 7, 10) Mivola andinin-teny amy zay ie bakeo. Tsy mampianatsy ty hevitsiny koa ty vahoaky Ndranahary henanizao. Inoan-drozy fa safà Ndranahary ty Baiboly, sady ataon-drozy mifototsy soa amy ty raha volany ao ty fampianaran-drozy.

8. Ino ty tafilitsy amy fanompoa Jehovah?

 8 Jehovah raiky avao ro tompoen-drozy, sady ambaran-drozy ty anarany. Hoy Jesosy: “Jehovah Ndranaharinao ro tsy maintsy iankohofanao, le ho azy raiky avao ro tsy maintsy anaovanao fanompoa masy.” (Matio 4:10) Zay mahavy ty mpivavaky marina tsy manompo laha tsy Jehovah raiky avao. Tafilitsy amy fanompoa zay koa ty fanambarà ty anara hoe Jehovah, azy Ndranahary marina iny noho ty mikasikasiky azy. Hoy ty Salamo 83:18: “Iha raiky avao, azy mana anara hoe Jehovah, ro Farany Anabo amy tany toy iaby!” Nanome modely Jesosy, lafa nanampy olo hahay a Ndranahary, araky ty vavaky nataony hoe: “Ty anaranao fa nambarako tamin’olo nameanao ahy baka amy zao tontolo zao.” (Jaona 17:6) Manambara ty anara Ndranahary noho ty raha teany hatao voho ty toetsiny koa ty mpivavaky marina henanizao.

9, 10. Manao akory ty ahità fa mifankatea ty Kristiana marina?

9 Mifankatea vatany rozy, sady fitiava tsy mitamà valiny ty ahin-drozy. Hoy Jesosy: “Laha mifankatea nareo, le zay ro ahaizan’olo iaby fa mpianatsiko nareo.” (Jaona 13:35) Nifankatea manahaky zay ty Kristiana voalohany. Laha manahaky ty fitiava Ndranahary tsika, le ho tea olo, tsy manavakavaky karaza na firenena na farim-piainan’olo. Mahavy ty olo hiharo raiky manahaky ty mpirahalahy tsy mifankafoy fitiava io. (Vakio Kolosianina 3:14.) Tsy mifankatea manahaky ty mpirahalahy ty olo amy fivavaha diso ao. Manao akory ty ahaizantsika raha zay? Mifamono rozy satria tsy mitovy firenena na karaza. Tsy mandramby kobay hamonoa ty olo finoa raiky aminy na ty olo hafa ty Kristiana marina. Hoy ty Baiboly: “Ho zao ro ahità soa ze anaky Ndranahary noho ze anaky ty Devoly: Ze tsy manao ty marina, le tsy baka amy Ndranahary. Mitovy amy zay koa ze tsy tea ty rahalahiny. ... Tokony hifankatea tsika, fa tsy hanahaky Kaina, azy baka amy raty iny, ka nanao vonoan-draty ty rahalahiny.”—1 Jaona 3:10-12; 4:20, 21.

 10 Fe tsy ampy ty hoe tsy mamono olo, laha teantsika ty hampiseho ty fitiava marina. Mahafoy fotoa noho hery voho hanana ty Kristiana marina, mba hifanampea noho hifampahereza. (Hebreo 10:24, 25) Manao ty marina rozy sady mifanampy lafa misy raha manahira. ‘Manao raha soa amin’olo iaby’ rozy, araky ty torohevitsy ty Baiboly.—Galatianina 6:10

11. Manino tsika ro mila maneky fa amy alala Jesosy Kristy ro hanavota Ndranahary ty olo?

11 Eken-drozy fa amy alala Jesosy Kristy ro hamonjea Ndranahary ty olo. Hoy ty Baiboly: “Sady tsy misy olo hafa hahazoa fanavota, satria tsy misy anara hafa ambany lanitsy etoy, namea ty olo mba hahazoantsika fanavota.” (Asan’ny Apostoly 4:12) Fa nihitantsika tamy Toko faha-5 tao hoe nanao soro ty ainy Jesosy, mba hanavota ty olo manoriky safà. (Matio 20:28) Mbo ie avao koa ro nitinginy Ndranahary ho Mpanjaka ty Fanjakà an-danitsy any, azy Fanjakà handay tany toy iaby iny. Tea Ndranahary hanoriky ty safà Jesosy noho hanaraky ty fampianarany tsika, laha ta ho velo zisiky farany. Zay ro mahavy ty Baiboly hivola hoe: “Ze mampiseho finoa ty Anaky le mana fiaina zisiky farany. Fa ze tsy manoriky ty safà ty Anaky tsy hahita fiaina.”—Jaona 3:36.

12. Ino ty dika ty hoe tsy miharo amy zao tontolo zao?

12 Tsy miharo amy zao tontolo zao rozy. Hoy Jesosy lafa nitsara azy Pilato, mpanday Romanina: “Tsy miharo amy tontolo toy ty Fanjakàko.” (Jaona 18:36) Vahoaky ty Fanjakà Jesosy ty Kristiana, ndre aia ndre aia ty firenena misy azy, ka tsy manao politiky rozy sady tsy militsy amy aly. Fe tsy manaka olo hilitsy amy antoko politiky, na hilatsaky hofilỳ, na hifily, ty mpanompo Jehovah. Manoriky lalàna koa rozy, ndre tsy militsy amy politiky. Ino ty antony? Satria mandidy an-drozy mba “haneky ty manam-pahefà” mpanday fanjakà ty Baiboly. (Romanina 13:1) Lafa mifanohitsy amy ty raha ampanovy Ndranahary ty raha ampanovy ty fanjakà,  le manoriky safà apostoly toy ty mpivavaky marina: “Ndranahary ro mpanday anay ka ie ro tsy maintsy orihinay safà, fa tsy olo.”—Asan’ny Apostoly 5:29; Marka 12:17

13. Manao akory ty fahità ty tena mpianatsy Jesosy ty Fanjakà Ndranahary, le ino ty ataon-drozy lafa mahay raha zay?

13 Manambara rozy hoe ty Fanjakà Ndranahary raiky avao ro azon’olombelo tamàny. Hoy Jesosy: ‘Hotorỳ amy tany toy iaby ty vaovao soa Fanjakà iny, ho vavolombelo amy firenena  iaby, zay vo ho avy ty farany.’ (Matio 24:14) Tsy mampirisiky olo hitamà ty mpanday Fanjakà hamaha ty raha manahira azy ty tena mpianatsy Jesosy Kristy. Fa, ambaran-drozy hoe ty fanjakà Ndranahary an-danitsy any avao ro azon’olo tamàny hamaha ty raha manahira azy. (Salamo 146:3) Nampianary Jesosy hangataky ty hiavia fanjakà io tsika, lafa nivola ie hoe: “Ho avy lahy ty Fanjakànao! Hatao an-tany etoy lahy ty sitraponao, manahaky ty an-danitsy any.” (Matio 6:10) Mivola ty Baiboly fa Fanjakà an-danitsy any io, ro ‘hanorotoro noho handrava fanjakà iaby [misy henanizao] reo, fa ie ho eo avao zisiky amy fotoa tsy voafaritsy.’—Daniela 2:44; Apokalypsy 16:14; 19:19-21.

14. Araky ty hevitsinao, ia ty fivavaha manaraky ty raha takỳ amy ty fivavaha marina?

14 Eritsereto raha nidinihintsika reo, ka anontaneo ty vatanao hoe: ‘Ia ty fivavaha mampifototsy ty fampianarany iaby amy Baiboly, sady manambara ty anara Jehovah? Ia ty fivavaha mana ty fitiava baka amy Ndranahary, mino any Jesosy, tsy miharo amy zao tontolo zao, noho manambara hoe ty Fanjakà Ndranahary avao ro azon’olo tamàny hamaha ty raha manahira azy? Ia amy fivavaha iaby henanizao reo ro manaraky raha iaby eo reo?’ Hita mazava soa fa ty Vavolombelo Jehovah ro manaraky raha rezay.—Vakio Isaia 43:10-12.

INO TY HATAONAO?

15. Tea Ndranahary hino ty fisiany tsika, fe ino koa ty raha mbo teany hataontsika?

15 Tsy ampy ty mino a Ndranahary, laha ta hampifaly azy iha. Mivola ty Baiboly fa ndre ty demonia aza mino fa misy Ndranahary. (Jakoba 2:19) Fe tsy manao ty sitrapo Ndranahary rozy, sady tsy teany. Ka laha ta ho teany tsika, le tsy maintsy mino ty fisiany, sady manao ty sitrapony. Tsy maintsy miala amy fivavaha diso koa tsika, bakeo manaraky ty fivavaha marina.

16. Ino ty tokony hataontsika, laha nisy raha nataontsika misy ifandrambesany amy fivavaha diso?

 16 Natoro apostoly Paoly hoe tsy tokony hanao raha misy ifandrambesany amy fivavaha diso mihintsy tsika. Hoy ty asany: “ ‘Le miboaha baka aminy ao nareo, sady misaraha aminy’, hoy Jehovah, ‘ka mikasiky raha maloto sasy, le handramby anareo aho.’ ” (2 Korintianina 6:17; Isaia 52:11) Hita baka amy zay, fa tsy manao ndre ino ndre ino misy ifandrambesany amy fivavaha diso ty Kristiana marina.

17, 18. Ino “Babylona Bevata” zao, le manino iha ro tokony ‘hiboaky baka aminy ao’ malaky?

17 Kaihy ty Baiboly hoe “Babylona Bevata” ty karaza fivavaha diso iaby. * (Apokalypsy 17:5) Ahatiarovantsika tanà Babylona taloha iny anara io. Tany ro nanomboha ty fivavaha diso, tafara Ranobe tamy andro Noa. Bakany ty niavia ty ankamaroa ty fombafomba noho ty fampianara amy fivavaha diso henanizao reo. Nivavaky tamy ndranahary telo miharo raiky, ohatsy, ty Babyloniana. Kanefa ty Baiboly mivola mazava hoe raiky avao ty Ndranahary marina, tsy ia zay fa Jehovah, le anakiny Jesosy Kristy. (Jaona 17:3) Nino koa ty Babyloniana hoe mana fanahy tsy mety maty ty olo, ka mety hifindra amy pilasy fampijalijalea any fanahy io lafa maty olo iny. Ampianary ty ankamaroa ty fivavaha koa henanizao hoe mana fanahy tsy mety maty ty olo, sady mety hijaly amy afobe any fanahy io.

18 Niparitaky amy tany toy iaby fivavaha ta Babylona taloha tany iny, ka mety soa laha kaihy hoe Babylona Bevata ty fitambara ty fivavaha diso amy tany toy iaby. Fe nivola Ndranahary fa ho rava tampoky ie. Azonao amy zay va hoe manino iha ro tokony hiala lavitsy any Babylona Bevata? Tea Jehovah ‘hiboaky baka aminy ao’ malaky iha, tany mbo misy ty fotoa.—Vakio Apokalypsy 18:4.

Ho maro biby mandilatsy ty raha afoinao ty raha ho azonao, lafa manompo Jehovah miaraky amy ty vahoakiny iha

19. Ino ty ho azonao laha manompo Jehovah iha?

19 Mety tsy hinama aminao sasy ty olo sisany, lafa miala amy fivavaha diso ao iha. Fe ho maro biby mandilatsy ty raha nafoinao ty ho azonao, lafa manompo Jehovah miaraky amy ty vahoakiny iha. Hahazo rahalahy noho anabavy kristiana maro iha, manahaky mpianatsy Jesosy voalohany rey. Nengàn-drozy ty raha hafa mba hanaraha azy. Ho tafilitsy amy fianakaviambe raiky tea anao vatany iha, tsy ia zay fa ty Kristiana an-tapitrisany amy tany toy iaby. Hanan-draha soa tamàny koa iha, tsy ino zay fa ty ho velo zisiky farany “amy tontolo ho avy iny ao.” (Vakio Marka 10:28-30.) Afarafara any, le mety handiniky ty raha ampianary ty Baiboly ty olo niala anao vokatsy ty finoanao, ka hanjary mpanompo Jehovah.

20. Hanao akory ty hoavin’olo manaraky ty fivavaha marina?

20 Mivola ty Baiboly fa tsy ho ela le hotampery Ndranahary tontolo raty toy, le hosoloany tontolo vaovao hipetraha ty fahamarina andesy ty Fanjakàny. (2 Petera 3:9, 13) Tontolo soa marè vatany zao! Fivavaha raiky avao amy zay ro hisy, tsy ino zay fa ty fivavaha marina. Mahihitsy vatany iha laha manao ze tokony hatao, mba hiaraha sandrany amy ty mpivavaky marina manomboky henanizao.

^ feh. 17 Henteo ty Fanazavà Fanampiny hoe “Ino ty Atao hoe ‘Babylona Bevata’?”, laha mila fanazavà maromaro mikasiky ty antony ivolana hoe ty fitambara ty fivavaha diso amy tany toy iaby ro atao hoe Babylona Bevata.