Hanenty ty anatiny ao

Ho amy fizarà anatiny any

Ho amy loha hevitsy any

Vavolombelo Jehovah

Vezo

Ampianaro ty Ananao

 FIANARA 4

Nampifalifaly ty Babany noho Jehovah Ie

Nampifalifaly ty Babany noho Jehovah Ie

Ino ty raha nampitamany Jefta, Jehovah?

Tsy nimora tamy anakampela Jefta iny raha zay, fe nataony avao raha nampitamany babany iny

Hitanao va ajà ampela amy sary eo io?... Anakampela lahilahy mana anara Jefta zay ie. Tsy ambara ty Baiboly ty anarany, fe haintsika fa nampifalifaly babany noho Jehovah ie. Ndao hianarantsika ty mikasiky an-drozy moroanaky.

Olo soa Jefta sady nanoka fotoa maro mba hampianara ty anany mikasiky Jehovah. Lahilahy matanjaky koa ie sady mpitariky mahay. Nangataky azy hitariky an-drozy hialy amy ty fahavalon-drozy ty Israelita.

Nivavaky tamy Ndranahary Jefta mba handresy. Nampitamà ie hoe laha mandresy, le hameany ho ahy Jehovah ze olo miboaky voalohany baka an-tranony ao mba hitsena azy. Hipetraky noho hiasa  amy tranolay masy ao zisiky farany olo io. Pilasy natao hanompoa a Ndranahary tranolay masy zao. Nandresy vatany Jefta! Hainao va hoe ia ty niboaky voalohany baka an-trano Jefta ao lafa noly ie?...

Eka, anakampelany iny! Ie raiky avao ty anaky Jefta, fe halefany lavitsy ie henanizao. Nalahelo marè Jefta fe, fa nampitamà hanao raha zay ie. Nivola anakampelany iny hoe: ‘Fa nampitamà Jehovah iha baba, le tanteraho raha zay.’

Nandeha amy anakampela Jefta iny any ty namany, santao

Nalahelo koa anakampela Jefta iny. Tsy afaky nanambaly noho niteraky ie tamy tranolay ao. Fe ta hanatanteraky ty raha nampitamany babany ie sady ta hampifalifaly Jehovah. Vatan-draha taminy mandilatsy ty fanambalea noho ty fanana anaky raha zay. Niala tan-trano ao ie, le nipetraky tan-tranolay tao zisiky farany.

Araky ty hevitsinao, nampifalifaly Jehovah noho babany va ty raha nataony?... Eka! Laha manoriky safà noho tea Jehovah iha, le hanahaky anakampela Jefta io. Hanao raha mampifalifaly Jehovah noho ty baba amy neninao koa iha.

VAKIO AMY BAIBOLINAO

  • Deoteronomia 6:4-6

  • Mpitsara 11:30-40

  • 1 Korintianina 7:37, 38