Diboka di thusitse batho ba qalang ho ithuta Bibele hore ba be le tumelo e matla. Bakreste ba sa tswa kolobetswa, ba ile ba bula matlo a bona hore ho tshwarelwe diboka ho ona. Bohle ba neng ba tla dibokeng, ba ne ba amohelwa mme seo se ne se etsa hore ba ratane le ho feta.

Ha baithuti ba bang ba Bibele ba se ba loketse ho kolobetswa, ho ne ho tshwarwa diboka tse kgethehileng ka lekunutu. Ka August 1973, barababo rona ba ile ba ba le seboka se jwalo ka thoko ho Sokhumi, pela lewatle la Black Sea. Batho ba 35 ba neng ba lokela ho  kolobetswa ha ba a ka ba kolobetswa. Ka ho panya ha leihlo, mapolesa a ile a sitisa seboka seo mme a tshwara bara le baradibabo rona, ho akarelletsa le Vladimir Gladyuk.

Hang ha Vladimir le barababo rona ba bang ba lokollwa, ba ile ba bitsa baithuti bao ba 35 hape. Kamora matsatsi a mabedi baithuti bao ba ile ba kolobetswa. Vladimir o re: “Re ne re tseba hore Jehova o re tsheheditse. Kamora kolobetso, re ile ra leboha Jehova haholo.”

Ho Hanyetswa ho Thusa hore Ditaba Tse Molemo di Bolelwe

Vladimir Gladyuk o ile a tshwarwa hape kamora matsatsi a mabedi. Vladimir Gladyuk, Itta Sudarenko le Natela Chargeishvili ba ile ba ahlolelwa dilemo tse mmalwa teronkong. Le hoja bahweletsi ba ile ba utlwa bohloko, ba ile ba tswelapele ka mosebetsi wa ho ruta Bibele, empa ba ne ba lokela ho etsa seo ka bohlale.

E le hore ba se ke ba tsosa dibata masene, ba ile ba ya ditoropong le metseng e ka thoko moo ba ke keng ba bonwa ke mapolesa. Ka lebaka leo, ba ile ba kgona ho bolela ditaba tse molemo dibakeng tse ngata.

Nakong eo, bahweletsi ba dulang ditoropong tse kgolo ba ne ba paka diterateng tse thotseng le diphakeng. Hangata ba ne ba kopana le batho ba tswang ditoropong le metseng e meng. Ha motho a ne a thahasella molaetsa, mohweletsi o ne a kopa aterese ya hae ebe ho etswa ditlhophiso tsa hore a tjhakelwe hape.

Babutsa Jejelava o ne a le hara batho ba neng ba ya dibakeng tse hole. O re: “Kaha ke ne ke e na le beng ka nna dibakeng tse fapaneng, ha ho motho ya neng a belaella  maeto a ka. Kamora dilemo tse ka bang pedi, ke ne ke se ke ithuta Bibele le batho ba fetang 20 motseng wa Zugdidi le ba bahlano toropong ya Chkhorotsku. Kaofela ha bona ba ile ba kolobetswa.”

Ho Hlokahala Dibuka Tsa Segeorgia

Ha nako e ntse e eya, ho ile ha hlaka hore ho ne ho hlokahala dibuka tse eketsehileng ka puo ya Segeorgia. Baithuti le batho ba thahasellang ba ne ba hloka Dibibele le dingolwa ka puo ya bona. *

Babutsa o hopola kamoo ho neng ho le thata kateng ho ithuta Bibele le motho ho se na dingolwa tsa Segeorgia. O re: “Ke ne ke e na le Bibele le dingolwa tse ding ka Serussia, kahoo ke ne ke lokela ho fetolela kgaolo eo re ntseng re e bala e le hore motho eo ke ithutang le yena a utlwisise.” O ne a sebelisa dikshinare ho fetolela dimakasine tsa rona ka Segeorgia. O ile a ba a fetolela Kospele ya Matheu kaofela!

Dipaki di ile tsa sebedisa motjhini o monyane wa mimeograph ho kopitsa dingolwa tsa Bibele malapeng a tsona

Batho ba thahasellang ho ithuta Bibele ba ile ba ananela haholo dimakasine tseo tse fetoletsweng ka puo eo ba e utlwang, hoo ba ileng ba ikopiletsa tsona. Kaha ho ne ho le thata ho fumana Bibele ka puo ya Segeorgia, baithuti ba bang ba Bibele ba ile ba qetella e le bakopitsi.

“Ke ile ka Qeta Letsatsi Lohle ke Kopitsa”

Bara le baradibabo rona le batho ba thabelang ho ithuta Bibele, ba ne ba kadimisana ka dingolwa tse neng di fetoletswe ka Segeorgia e le hore kaofela ba ka  rua molemo. E mong le e mong o ne a nka matsatsi kapa dibeke tse seng kae a bala sengolwa. Ha bara le baradibabo rona ba fumana Phetolelo ya Mangolo a Segerike ka Segeorgia, lelapa le leng le ile la ikopiletsa yona.

Ha Raul Karchava a le dilemo di 13, ntate wa hae o ile a mo kopa hore a kopitse Phetolelo ya Mangolo a Segerike. O re: “Ntate o ile a reka lebokose la dibuka hammoho le dipene le dipentshele, kaha o ne a batla hore ke thabele ho ngola. Le hoja ke ne ke utlwa eka mosebetsi oo o boima, ke ile ka o amohela. Ke ile ka qeta letsatsi lohle ke ntse ke kopitsa, ke emisa feela ha ke batla ho phomotsa matsoho.”

Dikopi tse ngotsweng ka letsoho tsa Tora ya ho Lebela le Ho Hlahlobisisa Mangolo Kamehla ka puo ya Segeorgia

 Ba lelapa la bo Raul ba ile ba thaba haholo ha ba utlwa hore barababorona ba dumetse ho ba kadima Bibele ka dibeke tse ding hape tse seng kae, e le hore a ka qetella mosebetsi wa hae o thata. Raul o ile a nka dikgwedi tse pedi feela ho kopitsa Mangolo a Segerike a 27!

Ho sa tsotellehe boiteko bo matla bo ileng ba etswa ke bakopitsi bao, ho ne ho ntse ho hlokahala dingolwa tse eketsehileng kaha palo ya baithuti ba Bibele e ne e ntse e eketseha. E le ho finyella tlhoko eo, bara le baradibabo rona ba ile ba iteta sebete mme ba kopiletsa dingolwa tsa Bibele mahaeng a bona le ho di tsamaisa.

 Mosebetsi wa ho ho ruta Bibele Georgia bophirimela, o ile wa ata haholo. Empa maemo a ne a le jwang Georgia bochabela? Na ho ne ho ena le motho ya dulang motsemoholo wa Tbilisi ya neng a ka thusa batho ba batlang ho ithuta Bibele jwaloka Vaso Kveniashvili?

Nnete e Fihla Motsemoholo

Ka bo1970, ba boholong mmusong wa Soviet ba ile ba leka ho nyahamisa Dipaki ka ho di leleka matlong a tsona. Seo se ile sa etsahalla Oleksii le Lydia Kurdas e leng banyalani ba bang ba Ukraine ba neng ba se ba dula Tbilisi. Ba ile ba qeta dilemo tse ngata tjhankaneng ka lebaka la ho emela tumelo ya bona.

Larisa Kessaeva (Gudadze) dilemong tsa bo 1970

Lelapa la ha Kurdas le ile la ithuta Bibele le Zaur le Eteri Kessaev e leng banyalani ba neng ba rata bodumedi haholo. Larisa, e leng moradi wa bona ya neng a le dilemo tse 15 ka nako eo, o re bolella se ileng sa etsahala ha ba qala ho kopana le Oleksii le Lydia mme o re: “Re ne re batla ho ba bontsha hore Kereke ya Orthodox ke yona feela ya nnete. Kamora ho qeta nako e ngata re ngangisana, re ile ra fellwa ke dintlha, empa Oleksii le Lydia bona ba tswela pele ho re phetlela Mangolo.”

Larisa o boetse o re: “Ha re ne re ya kerekeng, ke ne ke atisa ho bala Melao e Leshome, e neng e ngotswe dipakeng tsa ditshwantsho tse pedi tse neng di le leboteng. Empa bosiung boo, Oleksii o ile a re balla Exoda 20:4, 5 mme ke ile ka makatswa ke seo ke ileng ka se utlwa. Ha kea ka ka bo hlotha bosiung boo kaha ke ne ke ipotsa hore: ‘Na re hlile re tlola molao wa Modimo ka ho rapela ditshwantsho?’”

 Larisa o ne a batla ho tseba karabo ya potso ena, kahoo o ile a mathela kerekeng esale hoseng haholo yaba o bala molao o leboteng o reng: “O se ke wa iketsetsa setshwantsho se betlilweng . . . O se ke wa di inamela.” O ile a utlwisisa se bolelwang ke molao ona wa bohlokwa ka lekgetlo la pele bophelong ba hae. Larisa le batswadi ba hae ba ile ba kolobetswa mme ke ba bang ba Dipaki tsa pele tsa Tbilisi.

Qetellong o Ile a Fumana Toka

Vaso Kveniashvili o ile a kopana le Dipaki Tsa Jehova hape Tbilisi, kamora dilemo tse ka bang 20 a ithutile Bibele. O ne a thabile haholo kaha e ne e se e le nako e telele a emetse ho kopana le Dipaki.

Vaso Kveniashvili ebile Paki ya Jehova kamora dilemo tse 24

Qalong Dipaki tsa sebakeng seo di ne di sa batle ho amohela Vaso kaha o ne a e na le botumo bo bobe motseng oo. Ba bang ba ne ba nahana hore mohlomong o  sebetsa le Mmuso wa Soviet hore a behe Dipaki leihlo. Ke ka lebaka leo Dipaki di ileng tsa mo hanela ho ya dibokeng ka dilemo tse ka bang nne.

Hamorao ho ile ha hlaka hore Vaso e ne e se motho ya mobe, kahoo o ile a qala ho ya dibokeng a ba a kolobetswa. Qetellong Vaso o ile a atamela haufi le Modimo wa toka eo e neng e le kgale a mo batla ho tloha botjheng. (Esa. 30:18) O ile a sebeletsa Jehova ka botshepehi ho fihlela a hlokahala ka 2014.

Ka 1990, mosebetsi wa boboledi o ne o se o finyelletse dikarolo tse ngata tsa bophirimela le bochabela ba Georgia. Bahweletsi ba ka bang 900, ba ne ba se ba kganna dithuto tsa Bibele tse 942. Ena e ne le qalo feela ya keketseho e neng e tla latela!

^ par. 12 Bibele e ne e sokoleha nakong eo, le hoja ho ne ho e na le dikarolo tse itseng tsa yona tse neng di fetoletswe ka Segeorgia dilemong tsa bo500.—Sheba Lebokose le reng “Bibele ya Segeorgia.”