Zha mai angle

Zha ka o duito menu

Zha kai e lista

Marturia le Jehovaske

Romanes Kalderash

Le lashe viasti kai aven katar o Del

 SICHARIMOS 8

Sostar mekel o Del o bi lashimos ai o chino?

Sostar mekel o Del o bi lashimos ai o chino?

1. Sar avilo o bi lashimos ande lumia?

Ande sa kacha vriama kai o Del mekel te amperetsin le manush, dikhas ke von nashtin te lasharen chi iek beda

O bi lashimos avilo ande lumia kana o Satanas phendias o pervo jojaimos. Vo sas iek angelo lasho ai nas ande leste nasulimos, numa chi beshlo ando chachimos (Iovano 8:44). Vo meklias te bariol ande peste iek gindo chorho, te lel o luvudimos kai trobul te avel ferdi le Jehovaske, o Del kai kerdias sa. O Beng phendias iek jojaimos la Evake ai voi astardias te pachal lesko mui. O Adam kerdias sar peski zhuvli ai vi vo astardias te pachal o mui le Bengesko. Godo kai kerde andias o chino ai e martia ande lumia. Zhin Romanuria 5:19 ai 2 Korintiana 11:3.

Kana o Beng phendias la Evake te na pachal o mui le Devlesko, kotse astardias te vazdel iek bari buntuiala karing o Del. Gadia amisailo ka e Amperetsia e bari le Devleski. But zhene keren sar kerdias o Beng, zhantar pa o drom le Devlesko ke chi kamen te amperetsil len, anda godia, “sa e lumia si telai putiera le bengeski”. Zhin Iovano 14:30 ai 1 Iovano 5:19.

2. Sas vareso nasul ande sa so kerdias o Del?

Nas khanchi nasul. Le anglune manush ai le angeluria shai pachanas o mui le Devlesko ande sa so mangelas lendar (Deuteronomy 32:4, 5). O Del chi phandadias amare vas, vo mekel te alosaras so si vorta ai so nichi. Ai godo kerel te pachas lesko mui sostar kamas les. Zhin Iakov 1:13-15 ai 1 Iovano 5:3.

3. Sostar mekel o Del te avel chino pe amende?

O Del rhevdil pe iek vriama godolen manushen kai vazdenpe karing leski Amperetsia. Sostar? Te sikavel ke sar Vo chi zhutil len, le amperetsii nashtin te den vareso lasho le manushenge (Ecclesiastes 7:29; 8:9). Ande gadala 6.000  borsh kai nakhle, shai phenas chachimasa ke le amperaturia nashtisarde te ankalaven anda e lumia so nai vorta, o chorimos, o mundarimos ai le nasualimata. Zhin Jeremiah 10:23 ai Romanuria 9:17.

Numa te mekas te amperetsil amen o Del, si te dikhas amaro mishtimos (Isaiah 48:17, 18). Ande tsirha vriama, o Jehova si te ankalavel sa le amperetsii le manushenge. Ferdi si te train pe Phuv godola kai thonpe tela leski Amperetsia (Isaiah 11:9). Zhin Sicharimos (Apokalipsos) 11:15.

4. Inke o Del azhukerel, so shai keras amen?

O Satanas phendias ke le manush keren buchi le Devleske numa pala pesko mishtimos. Kames te sikaves ke godo si iek baro jojaimos? Tu shai keres godo! O Del inke azhukerel, ai godo mekel amen te sikavas te avela ke thas amen tela e Amperetsia le Devleski vai tela e amperetsia le manushengi. Shai sikavas so alosaras pala so keras amare traiosa. Zhin Sicharimos (Apokalipsos) 12:10 ai 2 Petri 3:9.

5. Sar thas amen pasha o Del sar amaro Amperato?

Le dieli kai alosaras ai kai keras, sikaven te avela ke kamas te amperetsil amen o Del vai nichi

Trobus te dikhas sar kamel o Del te luvudis les ai te keras so mothol e religion chachi kai kerel sa so motholpe ande Biblia (Iovano 4:23). O Jesus chi thodiaspe ande le amperetsii le manushenge ai chi ando mundarimos, te kerasa sar leste si te sikavas ke vurhitsis ai ke nai amenge drago e amperetsia le Bengeski. Zhin Iovano 17:14.

O Satanas lel peski putiaria te thol le manushen te keren dieli bi lashe ai marime. Kana nashas katar gadala dieli, shai avela ke amare niamuria vai uni zhene si te asan amendar ai si te keren amaro traio pharo (1 Petri 4:3, 4). Atunchi, trobus te las amen pala le zakonuria le Devleske ai te rodas te avas le manushentsa kai kamen les. Gadia sikavas ke o Beng jojadias kana phendias ke khonik chi pachal o mui le Devlesko kana si amen bedi. Zhin Proverbs 13:20 ai Sicharimos (Apokalipsos) 22:15.

Pala o kamlimos kai aliarel o Del pala amende, shai zhanas chachimasa ke si te ankalavel o chino ai o bi lashimos. Godola kai sikavena ke pachanpe ando Del ai thonpe tela leski Amperetsia, si te train o traio kai chi mai getol pe Phuv. Zhin Iovano 3:16.