Zha mai angle

Zha ka o duito menu

Zha kai e lista

Marturia le Jehovaske

Romanes Kalderash

Le lashe viasti kai aven katar o Del

 SICHARIMOS 5

So kamel te kerel o Del la Phuviasa?

So kamel te kerel o Del la Phuviasa?

1. Soske kerdias o Del e Phuv?

O Jehova kerdias e Phuv te trais sa le manush pe late. Kana kerdias le pervuria manushen le Adamos ai la Eva, chi kerdias len te train ando cheri, ke ando cheri o Del gata kerdias angelon te train kotse (Job 38:4, 7). O Jehova thodias ka o pervo mursh ando shukar sado kai busholas Eden (Genesis 2:15-17). Vo dias leske ai la familiake kai sas te avel les iek podarka: te shai train o traio kai chi mai getol pe Phuv. Zhin Le Apostolengo 17:26; 1 Iovano 2:17.

O sado kai busholas Eden ferdi sas pe iek kotororho la Phuviako. O Adam ai e Eva sas te pheren e phuv peske shaventsa ai gadia sas te bariaren o sado pe sa e phuv (Genesis 1:28). E Phuv shojar chi si te mekel te avel o kher le manushengo ai khonik nashtil te parhavel la ai te rimol la. Zhin Mate 5:5.

2. Sostar nai agies sa e Phuv iek paraiso?

O Adan ai e Eva chi pachaie o mui le Devlesko ai vo ankaladias len avri anda o Eden. Anda godia, godo shukar sado jasailo ai khonik nashtisardias te vazdel les pale. E Biblia phenel ke e Phuv sas dini ande le vas katar le zhene bi lashe (2 Timote 3:13). Zhin Genesis 3:23, 24.

Apo so? Chi mai si te kerel o Del godo so kamelas la lumiake? Ei, si te kerel godo, ke leste si sa e putiaria ai shai kerel sa so vo kamel (Isaiah 45:18). Ande le giesa kai avena o Del si te kerel te avel o traio le manushengo sar Vo kamelas de mai anglal. Zhin Romanuria 8:21.

3. Sar si te avel pale sa e Phuv iek paraiso?

O Jesus, o Amperato ande Amperetsia le Devleski si te kerel te avel sa e Phuv iek shukar than. Vo ai peske angeluria si te mundaren le dushmanon le Devleske ando Armagedon. Atunchi o Jesus si te phandavel le Benges pe 1.000 borsh, godoles angelos bi lasho kai phendias le Adamos ai la Eva te na pachan  o mui le Devlesko. O Jesus si te skepil godolen manushen kai si chachimasa le Devlesa, ke vo si te lel sama lendar. Vo si te ingerel len te train veselime o traio kai chi mai getol kana sa e Phuv avela iek shukar paraiso. Zhin Sicharimos (Apokalipsos) 20:1-3 ai 21:3, 4.

4. Kana chi mai avela o chino?

Kana si te khosel o Del pa e lumia sa o chino? O Jesus dias duma pa iek semno te das po gor kana si te aresel godia vriama. Sa so kerdiol agies pe phuv shai kerel te jasavon sa le manush pa late. Ai godo sikavel amenge ke trais ande vriama kai o Del fuga si te vuzharel e phuv katar o chorhimos la lumiako. Zhin Mate 24:3, 7-14, 21, 22.

Ande le 1.000 borsh kai si te ampertsil o Jesus e Phuv anda o cheri, si te khosel anda amaro traio sa o chino kai nakhas agies (Isaiah 9:6, 7; 11:9). Chi mai avela numa Amperato vi si te avel Baro Rashai ke si te vuzharel le bezeja le manushenge kai kamen le Devles, sar kerelas o baro rashai mai anglal. Gadia o Del, peske Shavesa o Jesus, si te kerel te na mai avel le nasualimata o phurimos ai e martia. Zhin Isaiah 33:24 ai 1 Korintiana 15:26.

5. Kon si te train ando Paraiso?

Ande amari Khangeri si te prinzhares manushen ke kamen le Devles ai ke kamen te sichon te keren leski voia

Le manush kai pachan o mui le Devlesko si te train ando Paraiso (1 Iovano 2:17). O Jesus tradias ka peske disipluria te roden le manushen kai sas len iek ilo miloso ai kovlo, te sicharen len sar te aven vorta angla le iakha le Devleske. Agies o Jehova sicharel millonuria manushen te shai train ando Paraiso (Zephaniah 2:3). Le zhene kai zhan ande khangeri katar le Marturia le Jehovaske sichon te aven lashe dada, rhom ai rhomnia. Le famili luvudin le Devles savorhe chidine te shai sichon te train mai mishto kana ashunen le lashe viasti le Devleske. Zhin Sicharimos (Apokalipsos)15:4.