Zha mai angle

Zha ka o duito menu

Zha kai e lista

Marturia le Jehovaske

Romanes Kalderash

Le lashe viasti kai aven katar o Del

 SICHARIMOS 10

Sar te zhanas savo si o pachamos chacho?

Sar te zhanas savo si o pachamos chacho?

1. Si ferdi iek pachamos chacho?

“Arakhen tume katar le profeturia kai nai chache.” (MATE 7:15)

O Jesus sikadias ka peske disipluria numa iek religion, e religion chachi. Ai phendias ke si sar iek drom kai ningerel len ka o traio kai chi mai getol, numa jantsi manush sas te arakhen les (Mate 7:14). E Biblia phenel ke o luvudimos ke si drago le Devleske sikavelpe ande peski Vorba. Godola kai luvudin les sar vo mangel, phangle le ande iek pachamos. Zhin Iovano 4:23, 24; 14:6, ai Efisiana 4:4, 5.

2. So phendias o Jesus pa le jojamne kristianuria?

“Won mothon ke zhanen le Devles; numa lengo traio sikavel ke chi zhanen les.” (TITOS 1:16)

O Jesus profetizardias ke sas te avel jojamne profeturia ke sas te meliaren leski religion. Gadala manush phenen ke von ai lenge khangeria si kristianuria, ai phenen ke si len o chachimos, numa atsaven le manushen. Atunchi, sar shai arakhes e religion chachi? Trobus te les sama so keren le manush kai thon ande pengo traio godo so sicharen, godola si le chache kristianuria kai si ande religion chachi. Zhin Mate 24:24 ai Iovano 13:35.

3. Kon kerel so mothol o pachamos chacho?

Si but dieli kai keren le manush kai si ando pachamos chacho, akana aida dikhas numa 5:

  • Presnain e Biblia sar e Vorba le Devleski. Thon sa peski zor te lenpe pala o zakono la Bibliako ai chi lenpe pala o sicharimos le manushengo (Mate 15:7-9). Na  numa godo, thon ande pengo traio godo so sikaven le manushenge. Zhin Iovano 17:17 ai 2 Timote 3:16, 17.

  • Presnain o anau le Devlesko, Jehova. O Jesus kerdias gadia kana sikadias o anau peske dadesko. Dias duma le manushentsa pa o Jehova ai sikadias len te mangen ando rhugimos te avel suntsome lesko anau (Mate 6:9). Kotse kai tu beshes, savi religion kerel te prinzharen o anau le Devlesko? Zhin Iovano 17:26 ai Romanuria 10:13, 14.

  • Den duma pa e Amperetsia le Devleski. O Jesus avilo pe Phuv te del duma pa le lashe viasti katar e Amperetsia le Devleski. Ferdi godia Amperetsia shai del vareso lasho sa le manushenge. Ai dias duma pa late zhi kai o gies kai mulo (Luk 4:43; 8:1; 23:42, 43). Ai vi phendias ke peske disipluria sas te den duma pa godia Amperetsia. Te aresel varekon agies zhi tute ai te del duma tusa pa e Amperetsia le Devleski, anda savi religion gindis ke si? Zhin Mate 24:14.

  • Von nai andai lumia chorhi. Le disipluria le Jesusoske chi thonpe ande amperetsia le manushengi ai chi ande le bauria la lumiake (Iovano 17:16; 18:36). Ai chi astardion ande lende le dieli bi lashe kai keren nasul. Zhin Iakov 4:4.

  • Le kristianuria sikaven kamlimos chacho avren zhenenge. E Vorba le Devleski sikadias te avel respekto karing sa le zhene avena katar avena, anda aver them, vitsa vai shib. Le religionuria jojamne butivar thon partia le mundarimaske, numa le chache kristianuria chi keren godo (Micah [Miqueas] 4:1-3). Ai chi te azhukeren vareso palpale, den sa so si len te den zor ai te zhutin le manushen ai den anda peski vriama te aven lentsa. Zhin Iovano 13:34, 35 ai 1 Iovano 4:20.

4. Shai des po gor savi si e religion chachi?

Savi religion sikavel ferdi so motholpe ande Biblia, presnail o anau le Devlesko ai phenel ke e Amperetsia le Devleski si o azhukerimos chacho sa le manushenge? Savi religion kerel te kamenpe sa le manush kai si ande late? Anda savi religion si le manush kai chi thon partia ka o mundarimos? So gindis tu? Zhin 1 Iovano 3:10-12.