Zha mai angle

Zha ka o duito menu

Zha kai e lista

Marturia le Jehovaske

Romanes Kalderash

Le lashe viasti kai aven katar o Del

 SICHARIMOS 4

Kon si o Jesus Kristo?

Kon si o Jesus Kristo?

1. Sar sas o traio le Jesusosko anda gor?

Sar sikadias o Jesus ke sas vushoro te pashon pasha leste? (MATE 11:29; LUK 18:15-17)

Mai anglal te arakhadiol o Jesus pe Phuv, beshelas ando cheri sar iek dujo (Iovano 8:23). Anda sa so kerdias o Jehova, les kerdias les pervo. Porme o Jesus zhutisardias les te kerel sa so si ando cheri ai pe Phuv. E Biblia phenel ke o Jehova iek zheno korkorho kerdias le Jesusos (Iovano 1:14). Vi prinzharas les sar “e Vorba”, ke lesko Dat tradias les te del duma pa Leste. Zhin Proverbs 8:22, 23, 30 ai Kolosiana 1:15, 16.

2. Sostar avilo o Jesus pe Phuv?

O Del tradias peske Shaves te arakhadiol pe Phuv sar iek glata iekha zhiduvaikake, kai sas shei bari ai busholas Maria. Anda godia, le Jesusos sas les iek dat dujosko (Luk 1:30-35). Vo avilo pe Phuv te sikavel amen trin dieli: 1) te sicharel o chachimos pa o Del, 2) te sicharel amen te keras e voia le Devleski sar kerdias vo, ai mai kana nakhas bedi phare, ai 3) te del pesko traio bi bezejalo te skepil amen. Zhin Mate 20:28.

3. Sostar trobul amen iek skepitori?

Iek skepitori shai pochinel te ankalavel varekas anda leski beda (Exodus 21:29, 30). Chi e martia chi o phurimos sas so kamelas o Del ando gor la lumiako le manushenge. Zhanas gado ke o Jehova phendias le Adamoske ke te na pachala lesko mui, sas te merel. Pala godia, te na kerdiasa bezej, shojar nas te merel (Genesis 2:16, 17; 5:5). Sar e Biblia phenel, e martia “aresli” ande sa e lumia katar o Adam. Vo andias o bezej sa le manushenge ai pala leski dosh savorhe meren. Pala godia savorhe trobusaras te avas skepime. Zhin Romanuria 5:12, 15.

 Atunchi, kon shai pochinel pala amende ai kon shai skepil amen katar e martia? Kana meras pochinas pala amare bezeja. Sar sam bezejale, chi iek manush nashtil te pochinel pala le bezeja avreske. Zhin Romanuria 3:23.

4. Sostar mulo o Jesus?

O Jesus nas bezejalo sar sam amen. Anda godia chi mulo pala peske bezeja, mulo te pochinel avrenge bezeja. Kana o Del tradias peske Shaves te merel pala amende, sikadias o baro kamlimos kai aliarel pala savorhende. O Jesus vi sikadias ke kamel amen defial zurales kana pachaias o mui peske Dadesko, ai dias pesko traio te ankalavel pa amende o bezej ai e martia. Zhin Iovano 3:16 ai Romanuria 5:18, 19.

5. So kerel o Jesus agies?

Kana sas pe Phuv, o Jesus sastiardias le nasualen, zhuvindisardias le mulen ai zhutisardias godolen kai nekezinas, gadia sikadias so si te kerel mai angle pala le manush kai si chachimasa le Devlesa (Mate 15:30, 31; Iovano 5:28). Kana o Jesus mulo o Del dias les pale o traio dujosko ando cheri (1 Petri 3:18). O Jesus beshlo kai e rig chachi peski Dadeski zhi kana Vo dias les e voia ai e putiaria te amperetsil e Phuv (Zhiduvuria 10:12, 13). Agies o Jesus amperetsil ando cheri, ai peske disipluria den duma pa godia lashi viasta pe sa e lumia. Zhin Luk 1:32, 33 ai Mate 24:14.

Sar o Del dias les godia voia ai putiaria, pa iek tsirha vriama, o Jesus sar Amperato si te kosel pa e lumia le manushen bi lashe ai sa o chino kai von anen. Sa godola kai pachanpe ando Jesus ai pachan lesko mui si te train veselime pe Phuv kana sa e lumia avela sa iek shukar than. Zhin Mate 5:5.