1. Why God make this earth?
Jehovah make this earth for people. Na we get-am. God no make Adam and Eve make they stay for heaven, because e don already make angels for heaven. (Job 38:4, 7) Instead, God put Adam for one fine place. That place na garden of Eden. (Genesis 2:15-17) Jehovah talk say Adam and all the pikin wey e go born go fit stay forever for this earth.
That time na only garden of Eden be paradise. God tell Adam and Eve say make they born pikin full the whole earth. E still talk say make Adam de care for everything for this earth. (Genesis 1:28) God no go ever destroy this earth. People go always de stay for inside.
2. Why this earth no be paradise now?
Adam and Eve no do wetin God tell them. Na e make Jehovah drive them comot for that garden. Na so paradise comot for their hand and nobody for this earth fit bring-am back. Bible talk say since that time na wicked people de control this world.
As God don first talk say make this earth be fine place and make people stay inside forever, e don change e mind? No! Anything wey God talk de happen and na e get power pass any other person. (Isaiah 45:18) E go make this earth paradise again and people go de stay inside.
3. How God go make this earth Paradise again?
God go make this earth Paradise again when Jesus don de rule this earth. Jesus and the angels go destroy wicked people. That one go happen for the war wey Bible call Armageddon. After, Jesus go lock Satan for 1,000 years. People wey they obey God no go die because Jesus go save them. They go enjoy life forever for Paradise.
4. Which time people no go suffer again?
Na which time people no go de suffer again? Jesus talk some things wey we go de see when the end don de near. The way things de happen now don really make life de hard for people. All this things wey we de see de show say the end don really near.
Jesus go rule this earth from heaven for 1,000 years. That time people no go de suffer again. (Isaiah 9:6, 7; 11:9) All the people wey love God, Jesus go still forgive their sin. Jehovah go use Jesus do all this better things for us, we no go de sick again, we no go de old again and we no go even de die again.
5. Which kind people go stay for Paradise?
Na only people wey them de obey God go stay for Paradise. (1 John 2:17) Jesus tell e disciples say make them teach people wetin they go do to make God happy. For this our time, Jehovah de teach plenty-plenty people wetin go help them stay for Paradise. (Zephaniah 2:3) For the place wey them de call Kingdom Hall, plenty people de gather to worship God. Na for there people de learn how they fit be better husband and wife. Papa and mama de learn how to train their pikin well. Every family de learn how the good news go make their life better.