1. Which place Jesus dey before e come this earth?

Why people like to come near Jesus?MATTHEW 11:29; MARK 10:13-16.

Before they born Jesus for this earth, e don first stay for heaven as angel. (John 8:23) God first make Jesus, then Jesus work with God to make all other things. Jesus na the only person wey Jehovah use e own hand make. (John 1:14) Na Jesus de tell people wetin Jehovah talk, na e make them de call Jesus “the Word.”Read Proverbs 8:22, 23, 30; Colossians 1:15, 16.

2. Why Jesus come this earth?

God send Jesus from heaven to this earth. God transfer e life, come put-am inside one woman belle. The woman na Jew. E name na Mary and e never sleep with any man before. This one mean say no be any papa for this earth born Jesus. (Luke 1:30-35) Why Jesus come this earth? (1) E come teach people truth about God, (2) e come show how we fit de do wetin God want even when we de face problem, and (3) e come die because of our sin.Read Matthew 20:28.

3. Why we need person to free us from sin?

When they sell person as slave, e no go fit free e self until another person come pay e master so that e go free. When Adam sin, e sell all e pikin like slave. All of us get sin and we de die. The time wey God make Adam, e no get any sin, so Adam no suppose to die. God no make people make them de die. We sabi that one because God tell Adam say if e sin, e go die. So if Adam hear wetin God talk, e for still dey alive. (Genesis  2:16, 17; 5:5) Bible talk say we de die because Adam sin. That sin dey inside our blood because na Adam be our papa.Read Romans 5:12; 6:23.

Now, na which person fit pay so that we go free from sin and we no go de die? When person die, e don pay only for e own sin. Na only person wey e no get sin fit free us from sin.Read Psalm 49:7-9.

4. Why Jesus die?

Jesus no get sin. So why e die? E die for our sin. God show say e get strong love for us as e send Jesus make e come die for everybody. Even Jesus show say e really love people as e gree to die for us.Read John 3:16; Romans 5:18, 19.

5. Wetin Jesus de do now?

The time wey Jesus dey this earth, e cure sick people, e bring people back to life, and e help people when them de suffer. All this things show wetin e go do for people wey de obey God. (Matthew 15:30, 31; John 5:28) After Jesus die, God bring-am back to life as strong angel. (1 Peter 3:18) After that one, Jesus still wait until Jehovah come give-am power to rule this earth. (Hebrews 10:12, 13) Now Jesus dey for heaven, and e de rule as King. Christians for this our time de preach that good news for the whole world.Read Daniel 7:13, 14; Matthew 24:14.

Na small time remain, Jesus go destroy all wicked people and suffer go end. If you obey Jesus and you get faith, you go enjoy life for paradise forever.Read Psalm 37:9-11.