1. Na only one true religion dey?
Na only one religion Jesus teach e followers, and na the true religion. E be like road wey person fit follow if e want live forever. Jesus talk say: ‘People wey them de pass’ that road no plenty. (Matthew 7:14) If we want worship God for the way e want-am, we must follow the thing wey e talk for Bible. All the people wey them de worship God the way e want, get one faith.
2. Wetin Jesus talk about lie-lie Christians?
Jesus talk say lie-lie prophet them go come de teach wetin no dey inside Bible. They go pretend like say they be true Christians. Their church de claim say they be Christian. But you fit know the kind people wey they really be. How you fit know them? Na only true religion de get correct Christian wey them get better character and them de live better life.
3. How you fit know true Christians?
This five points go help you know true Christians:
True Christians de respect Bible as the Word of God. Them de try to obey wetin Bible talk. True religion de teach wetin dey inside Bible, but lie-lie religion de teach wetin no dey inside Bible. (Matthew 15:7-9) True Christians no de preach one thing and de do another thing.
—Read John 17:17; 2 Timothy 3:16, 17.
True Christians de respect the name of God, and that name na Jehovah. Jesus show say e respect the name of God as e talk about the name. E help people make they know God and e teach them to pray say make the name of God dey holy. (Matthew 6:9) For the place wey you dey, na which religion de talk about the name of God?
—Read John 17:26; Romans 10:13, 14.
True Christians de preach about the Kingdom of God. God send Jesus make e come preach the good news about the Kingdom. Na only the Kingdom of God fit end all the problem wey people de face. Jesus no stop to talk about-am till e die. (Luke 4:43; 8:1; 23:42, 43) Jesus talk say e followers go talk about the Kingdom. If person come preach to you about the Kingdom of God, which religion you go think say the person dey?
—Read Matthew 24:14.
True Christians no de do wetin people for this world like. You fit know them as they no de join politics and they no de fight for position. (John 17:16; 18:36) And they no de live the kind life wey people for this world de live.
—Read James 4:4.
True Christians really love theirself. Bible de teach them how they go respect people from different-different culture. Lie-lie religion de support war, but true religion no de support war. (Micah 4:1-3) Instead, true Christians de use their time and wetin they get, help other people.
—Read John 13:34, 35; 1 John 4:20.
4. Wetin go help you know true religion?
Which religion de teach wetin dey inside Bible, de respect the name of God, and de tell people about the Kingdom of God? Which people love theirself and no de fight war? Wetin you think?