Jump go content

Jump go the other things wey dey

Skip go table of contents

Jehovah Witness

Pidgin (West Africa)

God Get Good News For You!

 LESSON 14

Why God Get Organization for This Earth?

Why God Get Organization for This Earth?

1. Why God arrange Israel people before?

Abraham come get plenty pikin, God arrange them make they be one country and e give them laws. God call this country “Israel.” Na for there true worship start. (Psalm 147:19, 20) So people from other country fit gain from Israel.Read Genesis 22:18.

God choose Israel people as e witness. Their story show how people de gain when they follow the law wey God give e people. (Deuteronomy 4:6) So, na from this one country other people go fit know the true God.Read Isaiah 43:10, 12.

2. Why God arrange true Christians?

As time de go, Israel people no follow wetin God talk again. Jehovah leave them and e choose new people. Them de call this people Christians. (Matthew 21:43; 23:37, 38) Now, instead of Israel people, na true Christians de worship Jehovah as e witness.Read Acts 15:14, 17.

Jesus arrange e people and e give them work say make they go preach and help people make they come worship Jehovah. (Matthew 10:7, 11; 24:14; 28:19, 20) The work don serious now pass as e dey before because small time, this wicked world go end. So, for the first time since Jehovah make this earth, e don use true worship gather plenty people from all country. (Revelation 7:9, 10) God arrange true Christians make them de help each other. For all their meeting for the whole world, them de learn the same thing from Bible.Read Hebrews 10:24, 25.

 3. How Jehovah Witness for our time start?

Around 1870, one small group wey their name na Bible students start de see the truth inside Bible. They come understand say Jesus arrange Christians make them de preach, so they start de preach for different-different country. For 1931, they change their name to Jehovah Witness.Read Acts 1:8; 2:1, 4; 5:42.

4. How Jehovah Witness de arrange their work?

When the apostles dey this earth, Christians for different-different place de gain from the governing body. This governing body de see Jesus as the Head of the congregation. (Acts 16:4, 5) Na so e be today. Jehovah Witness them for the whole world de gain from Governing Body because they be mature elders. Na them de care for all the branch office of Jehovah Witness them. For this branch office, them de translate, and de print different-different books for Bible study for language wey e pass 750. And after, they go send this books give people. For the whole world Jehovah Witness congregation don pass 118,000 and na the Governing Body de direct and encourage all of them. For all the congregations, some men de work as elders. Na them de care for the people inside the congregation.Read 1 Peter 5:2, 3.

They arrange Jehovah Witness make them de preach the good news and help people make they fit worship Jehovah. We de preach from house to house like the apostles. (Acts 20:20) We still de study Bible with people wey they really want learn about God. But Jehovah Witness no be only group of people. We be one big family and our Papa Jehovah really love us. We be brothers and sisters, we really love each other. (2 Thessalonians 1:3) For the whole world, Jehovah Witness them dey happy pass any other people, because them de do wetin God want and de help other people to worship God.Read Psalm 33:12; Acts 20:35.