Sigui pa e contenido

Sigui pa e di dos menu

Testigonan di Jehova

Papiamento (Aruba)

Dicon Testigonan di Jehova No Ta Acepta Transfusion di Sanger?

Dicon Testigonan di Jehova No Ta Acepta Transfusion di Sanger?

Algun idea robes

Mito: Testigonan di Jehova no ta kere cu dokternan por yuda nan, pesey nan no ta bay dokter.

Realidad: Nos ta desea di haya e mihor cuido medico posibel pa nos mes y pa nos famia. Ora nos tin problema di salud, nos ta bay cerca dokternan y ciruhanonan cu tin experencia den cuido medico sin sanger. Nos ta contento cu e avancenan cu nan a haci riba tereno medico. Ademas, awor hasta otro hende den comunidad por beneficia di e tecnicanan sin sanger cu nan a desaroya specialmente pa testigonan di Jehova. Actualmente den hopi pais, tur pashent por scoge pa evita risiconan di transfusion di sanger, manera malezanan transmiti door di sanger, reaccionnan di e sistema inmunologico y erornan humano.

Mito: Testigonan di Jehova ta kere cu un hende por cura di su maleza pa medio di fe (sanacion).

Realidad: Nos no ta practica sanacion.

Mito: Alternativa pa transfusion di sanger ta mucho caro.

Realidad: Tratamentonan medico sin transfusion di sanger ta mas economico. *

Mito: Hopi Testigo, hasta mucha, ta muri tur aña pasobra nan ta nenga di acepta transfusion di sanger.

Realidad: E acusacion ey ta totalmente sin base. Regularmente ciruhanonan ta haci proceduranan complica manera operacion di curason, cirugia ortopedico y transplante di organo sin transfusion di sanger. * Tanto hende grandi como mucha cu no tuma transfusion di sanger ta recupera mes lihe of mas lihe cu esnan cu si a tuma transfusion di sanger. * En todo caso, niun hende no por bisa sigur cu un pashent lo muri si e rechasa transfusion di sanger of lo biba si e acept’e.

Dicon testigonan di Jehova no ta acepta transfusion di sanger?

Esey no ta un asunto medico, sino religioso. Tanto e Testament Bieu como esun Nobo ta bisa nos bon cla pa abstene di sanger. (Genesis 9:4; Levitico 17:10; Deuteronomio 12:23; Echonan 15:28, 29) Ademas, pa Dios, sanger ta representa bida. (Levitico 17:14) Pesey, nos ta evita di tuma sanger no solamente pa obedece Dios sino tambe como muestra di respet p’e como e Dunador di bida.

Cambio di opinion

Ta posibel pa haci operacion complica cu exito sin sanger

Un tempo profesionalnan den mundo di medicina tabata considera hende cu no ta tuma sanger como extremista, of cu ta comete suicidio. Pero e pensamento aki a cambia durante añanan recien. Por ehempel, na aña 2004, un articulo publica den un revista medico a bisa: “hopi tecnica cu ta specialmente pa pashentnan cu ta testigo di Jehova lo bira tecnicanan basico cu nan lo bay uza den añanan cu ta bin.” * Un articulo den e revista Heart, Lung and Circulation a bisa na 2010: “‘Cirugia sin sanger’ no mester ta limita na t[estigonan di] J[ehova] so, pero e mester bira un tecnica cu ciruhanonan ta uza tur dia.”

Miles di dokter rond mundo ta uza tecnicanan pa conserva sanger pa haci operacionnan complica sin transfusion di sanger. E alternativanan aki pa transfusion di sanger ta ser uza hasta den paisnan den desaroyo y hopi hende cu no ta testigo di Jehova ta pidi p’e.

^ par. 8 Wak Transfusion and Apheresis Science, Volumen 33, Num. 3, pag. 349.

^ par. 10 Wak The Journal of Thoracic and Cardiovascular Surgery, Volumen 134, Num. 2, pag. 287-288; Texas Heart Institute Journal, Volumen 38, Num. 5, pag. 563; Basics of Blood Management, pag. 2 y Continuing Education in Anaesthesia, Critical Care & Pain, Volumen 4, Num. 2, pag. 39.

^ par. 10 Wak The Journal of Thoracic and Cardiovascular Surgery, Volumen 89, Num. 6, pag. 918 y Heart, Lung and Circulation, Volumen 19, pag. 658.

^ par. 14 Continuing Education in Anaesthesia, Critical Care & Pain, Volumen 4, Num. 2, pagina 39.