Sigui pa e contenido

Sigui pa e di dos menu

Testigonan di Jehova

Papiamento (Aruba)

Dicon Testigonan di Jehova No Ta Celebra Pasco di Nacemento?

Dicon Testigonan di Jehova No Ta Celebra Pasco di Nacemento?

Algun idea robes

Mito: Testigonan di Jehova no ta celebra Pasco pasobra nan no ta kere den Hesus.

Realidad: Nos ta cristian, y nos ta kere cu salbacion ta posibel solamente pa medio di Hesus.—Echonan 4:12.

Mito: Boso ta causa desunion den famia door di siña boso miembronan pa no celebra Pasco.

Realidad: Famia ta hopi importante pa nos y nos ta uza Bijbel pa fortalece bida di famia.

Mito: Boso no ta disfruta di e ambiente di generosidad, paz y harmonia cu ta reina durante temporada di Pasco.

Realidad: Nos ta haci esfuerso tur dia pa ta generoso y pa ta na paz cu tur hende. (Proverbionan 11:25; Romanonan 12:18) Na nos reunionnan y ora nos ta predica, nos ta sigui Hesus su instruccion: “Boso a ricibi pornada, duna pornada.” (Mateo 10:8) Ademas, nos ta predica cu e Reino di Dios ta e unico speransa pa paz riba Tera.—Mateo 10:7.

Dicon testigonan di Jehova no ta celebra Pasco di Nacemento?

  • Hesus a bisa nos pa recorda su morto, no su nacemento.—Lucas 22:19, 20.

  • Hesus su apostelnan y prome discipelnan no a celebra Pasco. Un enciclopedia catolico ta bisa cu “e fiesta aki a ser institui te na aña 243 despues di Cristo”, esey ta mas cu un siglo despues cu e ultimo apostel a muri.

  • No tin prueba cu Hesus a nace riba 25 di december; su fecha di nacemento no ta skirbi den Bijbel.

  • Nos ta kere cu Dios no ta aproba celebracion di Pasco pasobra su raiz ta bin di custumber- y ritonan pagano.—2 Corintionan 6:17.

Dicon aboso no ta celebra Pasco siendo cu tur hende ta celebr’e?

Hopi hende ta celebra Pasco aunke nan sa cu e tin raiz pagano y cu e no tin apoyo di Bijbel. Un persona asina por puntra su mes: Dicon un cristian tin cu tuma un posicion diferente for di tur otro hende?

Bijbel ta anima nos pa uza nos “capacidad di pensa” pa tuma nos mes decisionnan. (Romanonan 12:1, 2) E ta siña nos balora e berdad. (Juan 4:23, 24) Aunke cu nos ta interesa den loke hende ta pensa di nos, nos ta pega na principionan di Bijbel hasta si e ta algo cu mayoria di hende no ta di acuerdo cu ne.

Aunke nos ta scoge pa no celebra Pasco, nos ta respeta e derecho cu cada persona tin pa dicidi pa su mes kico e lo scoge. Nos no ta stroba otro hende cu si lo kier celebra Pasco.