Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 3 2017

E artefacto aki skirbi na spijkerschrift tin e nomber “Tattannu” na un di su bandanan

Un Prueba Mas

Un Prueba Mas

Tin prueba arkeologico cu ta apoya loke Bijbel ta bisa? Na 2014, un articulo den e revista Biblical Archaeology Review a puntra: “Cuanto hende menciona den e Scritura Hebreo a ser confirma pa arkeologia?” E contesta cu e revista a duna ta: “Por lo menos 50.” Pero un homber cu no a ser menciona den e lista ey ta Tatnai. Ken e tabata? Laga nos wak ki papel e tin den Bijbel.

Jerusalem tabata parti di e inmenso Imperio di Persia. E ciudad tabata keda west di Riu Eufrates, den e area cu e Personan tabata yama Otro Banda di e Riu. Despues cu e Personan a conkista Babilonia, nan a libra e Hudiunan cu tabata den cautiverio y a autorisa nan pa reconstrui e tempel di Jehova na Jerusalem. (Esdras 1:1-4) Sinembargo, enemigo di e Hudiunan tabata opone e proyecto y a uza esaki como un pretexto pa acusa e Hudiunan di a rebeldia contra Persia. (Esdras 4:4-16) Durante e reinado di Dario I (aña 522 pa 486 prome cu Cristo), un oficial Perso yama Tatnai a bay investiga e asunto. Bijbel ta yama e homber aki e “gobernador di e provincia na e otro banda di Riu Eufrates.”—Esdras 5:3-7.

Varios artefacto cu e nomber Tatnai skirbi na spijkerschrift a sobrevivi como parti di loke kisas tabata un archivo di famia. E artefacto cu ta conecta Tatnai cu miembro di e famia ey ta un documento firma cu ta contene un acuerdo pa paga bek un suma di placa fecha 502 prome cu Cristo, cu tabata e di 20 aña di e reinado di Dario I. Den esaki e ta menciona un testigo di e acuerdo cu tabata un sirbidor di “Tattannu, gobernador di e provincia na Otro Banda di e Riu”, e homber Tatnai cu e buki di Bijbel Esdras ta papia di dje.

Ki encargo Tatnai tabatin? Na aña 535 prome cu Cristo, Ciro e Grandi a reorganisa su teritorio den diferente provincia, y un di nan tabata yama Babilonia y Otro Banda di e Riu. Despues e provincia ey a ser parti na dos, y un di nan tabata simplemente yama Otro Banda di e Riu. Esaki tabata inclui Coele-Siria, Fenicia, Samaria y Juda; e stadnan aki tabata ser dirigi for di Damasco. Tatnai tabata goberna e regionnan aki mas o menos for di aña 520 pa 502 prome cu Cristo.

Despues cu Tatnai a biaha bay Jerusalem pa investiga e supuesto caso di rebelion, el a informa Dario cu e Hudiunan a bisa cu nan a haya autorisacion di Ciro pa reconstrui e tempel di Jehova. Evidencia den archivo di e cas real a sostene e declaracion aki. (Esdras 5:6, 7, 11-13; 6:1-3) Pues Tatnai a haya instruccion pa no interveni, y el a obedece.—Esdras 6:6, 7, 13.

Ta berdad cu “Tatnai gobernador di e provincia na Otro Banda di e Riu” no a logra nada di gran importancia den historia. Pero tuma nota cu e Scritura ta mencion’e y ta dun’e e titulo corecto. Esaki ta duna nos un prueba mas cu arkeologia bes tras bes ta confirma cu Bijbel su historia ta exacto.