Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 3 2017

 TOPICO PRINCIPAL | E CUATER JINETENAN—KI EFECTO NAN CAREDA TIN RIBA BO?

E Cuater Coredonan di Cabay—Ken Nan Ta?

E Cuater Coredonan di Cabay—Ken Nan Ta?

E cuater coredonan di cabay por parce misterioso y spantoso, pero esey no mester ta e caso. Dicon no? Pasobra Bijbel y e sucesonan di historia moderno ta yuda nos identifica kico cada coredo di cabay ta representa. A pesar cu nan careda ta mustra cu lo tin calamidad riba Tera, e vision aki por nifica tambe bon noticia pa abo y bo famia. Con asina? Prome, laga nos identifica cada coredo di cabay.

E COREDO DI E CABAY BLANCO

E vision ta cuminsa asin’aki: “Mi a wak, y ata un cabay blanco; y esun sinta riba dje tabatin un boog; y Dios a dun’e un corona, y el a sali bay, venciendo su enemigonan y pa completa su victoria.”—Revelacion 6:2.

Ken ta e coredo di e cabay blanco? Pa identifica e coredo, nos mester wak den e mesun buki di Bijbel, Revelacion, cu mas despues ta identifica e coredo celestial aki como “Palabra di Dios.” (Revelacion 19:11-13) E titulo ey, esta, Palabra, ta referi na Hesucristo como cu e ta e vocero di Dios. (Juan 1:1, 14) Ademas, Bijbel ta yam’e “Rey di reynan y Señor di señornan” y ta describie como “Fiel y Berdadero.” (Revelacion 19:11, 16) Claramente anto, e tin autoridad pa ta un rey y guerero, y e no ta abusa di su poder ni e no ta uz’e na un manera corupto. Pero toch, algun pregunta ta lanta.

Ken ta duna Hesus autoridad pa e vence su enemigonan? (Revelacion 6:2) Profeta Daniel a haya un vision den cua ta compara e Mesias cu “un yiu di hende” cu ta haya “dominio [of, poder], gloria y un reino” for di “e Anciano di Dianan”, esta, Jehova Dios. * (Daniel 7:13, 14) Pues, ta Dios Todopoderoso a duna Hesus poder y e derecho pa goberna y ehecuta huicio. Pues e cabay blanco ta un simbolo apropia pa guera husto cu e Yiu di Dios ta bringa, pasobra hopi biaha e Scritura ta uza color blanco pa representa husticia.—Revelacion 3:4; 7:9, 13, 14.

Na ki tempo e coredo di cabay aki a cuminsa su careda? Tuma nota cu Hesus, e prome coredo, a cuminsa core ora el a haya su corona. (Revelacion 6:2) Na ki tempo Dios a corona Hesus como Rey den cielo? Esey no tabata ora el a bolbe bek na cielo despues di su morto, pasobra Bijbel ta bisa cu despues di esey, e mester a warda un periodo. (Hebreonan 10:12, 13) Hesus a splica su siguidornan con nan lo a reconoce fin di e periodo ey y e comienso di su reinado den cielo. El a bisa cu ora e cuminsa reina, condicion di mundo lo cambia drasticamente y bira hopi malo. Lo tin guera, scarsedad di cuminda y maleza. (Mateo 24:3, 7; Lucas 21:10, 11) Poco despues cu Prome Guera Mundial a cuminsa na 1914, a bira bisto cu humanidad a drenta den e periodo ey; un epoca dificil riba Tera cu Bijbel ta yama “e ultimo dianan.”—2 Timoteo 3:1-5.

Pero dicon condicion di mundo a bira mas malo en bes di mas mihor desde cu Hesus a ricibi su corona na 1914? Pasobra na e tempo ey, Hesus a cuminsa reina den cielo, pero no riba Tera. Tabatin un guera den cielo, y Hesus como Rey recien entronisa, cu Bijbel ta yama Miguel, a benta Satanas y su demoñonan riba Tera. (Revelacion 12:7-9, 12) Desde cu Satanas a ser tira abou, e ta furioso como cu e sa cu su dianan ta conta. Si, falta poco tempo pa Dios cumpli cu su proposito pa cu Satanas aki riba Tera. (Mateo 6:10) Awor, laga nos wak  con e otro tres coredonan di cabay ta confirma cu en berdad nos ta bibando durante e tempo dificil di “e ultimo dianan.” Diferente for di e prome coredo di cabay, kende claramente ta representa un persona specifico, e otro coredonan cu ta sigui ta representa mal condicionnan cu a plama rond mundo.

E COREDO DI E CABAY CORA

“Un otro cabay a sali, uno color di candela; y esun sinta riba dje a haya permit pa kita paz for di riba Tera pa e hendenan por mata otro; y el a ricibi un spada grandi.”—Revelacion 6:4.

E coredo di cabay aki ta representa guera. Ripara cu e ta kita paz, no for di djis algun nacion, sino for di henter mundo. Na 1914, pa prome biaha den historia, tabatin un guera mundial. Despues di e guera ey tabatin un segundo guera mundial, cu tabata mas pio ainda. Segun algun calculo, desde 1914 tabatin mas cu 100 miyon morto debi na guera y conflictonan arma. Y un gran cantidad di hende a keda gravemente herida.

Te con leu guera a yega den nos tempo? Pa prome biaha den historia di humanidad, ta parce cu hende por caba cu bida di tur hende. Hasta e asina yama organisacionnan cu ta mantene paz, manera Nacionnan Uni, no a logra stop e careda di e cabay cora.

E COREDO DI E CABAY PRETO

“Mi a wak, y ata un cabay preto; y esun sinta riba dje tabatin un balansa den su man. Y mi a tende algo cu a zona manera un stem meymey di e cuater criaturanan spiritual bisa: ‘Un kilo di trigo pa un denario, y tres kilo di puspas pa un denario; y no daña e zeta di oleifi ni e biña.’”—Revelacion 6:5, 6.

E coredo di cabay aki ta representa hamber. E texto ta describi un scarsedad di cuminda asina grandi cu un kilo di trigo lo costa un denario, esta, salario pa un dia completo di trabou den e prome siglo. (Mateo 20:2) Anto, tres kilo di puspas, un grano cu nan a considera inferior cu trigo, a costa mes hopi. Esey lo no ta suficiente pa un famia grandi come. Hende mester a hasta cremencha cuminda di tur dia, representa pa zeta di oleifi y biña, cu tabata alimentonan basico di e cultura ey den pasado.

Desde 1914, nos por a ripara cu e coredo di e cabay preto ta coriendo. Durante siglo 20, mas o menos 70 miyon hende a muri debi na hamber. Segun un rapport, “805 miyon hende, mas o menos un di cada nuebe hende di e poblacion di mundo, a sufri di desnutricion cronico entre 2012 y 2014.” Y segun un otro rapport, “tur aña, hamber ta mata mas tanto hende cu AIDS, malaria y tuberculosis hunto.” A pesar di hopi esfuerso sincero cu hende ta haci pa yuda hende cu ta sufri di hamber, e coredo di e cabay preto ta sigui core.

E COREDO DI E CABAY BLEEK

“Mi a wak, y ata un cabay bleek; y esun sinta riba dje tabatin e nomber Morto. Y Graf tabata sigui djis su tras. Y a duna nan autoridad pa mata un cuart di Tera cu un spada largo, cu scarsedad di cuminda, cu maleza mortal y pa medio di bestia salbahe.”—Revelacion 6:8.

E di cuater coredo di cabay ta representa morto pa motibo di epidemia y otro cosnan. Poco despues di 1914, e grip Spaño a mata miyones di hende. Posiblemente, 500 miyon hende a ser infecta, mas o menos un di cada tres hende cu tabata na bida e tempo ey.

Pero e grip Spaño tabata djis e comienso. Expertonan ta pensa cu cientos di miyones di hende a muri di cendepaga durante siglo 20. Y te dia di awe, miyones di hende ta muri pa motibo di AIDS, tuberculosis y malaria, a pesar di tur e avancenan riba tereno di medicina.

 Cada bes e resultado ta mescos: morto, sea debi na guera, hamber of epidemia. Anto sin escrupulo, Graf ta acumula su victimanan, sin ofrece ningun speransa.

UN MIHOR TEMPO TA NA CAMINDA

E problemanan aki lo caba pronto. Corda esaki: Na 1914, Hesus “a sali bay, venciendo” ora el a benta Satanas riba Tera, pero Hesus no a completa su victoria ainda. (Revelacion 6:2; 12:9, 12) Aki poco tempo, durante Armagedon, Hesus lo caba cu e influencia di Satanas y lo destrui hende cu ta apoya Diabel. (Revelacion 20:1-3) Hesus no solamente lo para e careda di e otro tres coredonan di cabay pero tambe lo e elimina e efectonan di nan careda destructivo. Con asina? Ban wak kico Bijbel ta priminti.

Lo no tin guera mas, y paz lo reina. Jehova lo “haci gueranan stop te na e fin di Tera; e ta kibra boog y ta corta lansa na dos.” (Salmo 46:9) Y hende cu ta stima paz “lo deleita nan mes den paz abundante.”—Salmo 37:11.

Lo no tin hamber mas, y lo tin cuminda na abundancia. Bijbel ta bisa: “Lo tin abundancia di maishi den e Tera, riba cabes di e seronan.”—Salmo 72:16.

Pronto Hesus lo elimina e efectonan di e otro tres coredonan di cabay

Lo no tin epidemia ni morto mas, y tur hende lo ta bon di salud y nan lo tin bida eterno. Dios lo “seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas.”—Revelacion 21:4.

Ora Hesus tabata riba Tera, el a duna un idea con e condicionnan lo ta den futuro bou di su gobernacion. El a promove paz, milagrosamente el a duna miles di hende di come, el a cura hende cu tabata malo y a hasta resucita hende morto.—Mateo 12:15; 14:19-21; 26:52; Juan 11:43, 44.

Gustosamente testigonan di Jehova lo kier mustra bo den bo mes Bijbel con bo por ta prepara pa e dia cu e careda di e coredonan di cabay ey lo caba. Lo bo acepta e invitacion aki?

^ par. 7 Bijbel ta bisa cu Dios su nomber ta Jehova.