Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 1 2017

 BIJBEL TA CAMBIA BIDA DI HENDE

Mi No Kier A Muri!

Mi No Kier A Muri!
  • NACI NA AÑA: 1964

  • PAIS NATAL: INGLATERA

  • SU PASADO: UN MAMA TEENAGER Y REBELDE

MI PASADO

Mi a nace na Paddington, un area na London, Inglatera, caminda tin hopi hende ta biba. Mi tabata biba cu mi mama y mi tres ruman muhernan mas grandi. Nos no tabata wak nos tata dje hopi ey pasobra tur ora e tabata burachi.

Tempo mi tabata mucha, mi mama a siña mi pa haci oracion tur anochi. Mi tabatin un Bijbel chikito cu tabata contene solamente e Salmonan, y mi tabata inventa wijs pa mi por a canta nan. Mi ta corda cu mi a yega di lesa un frase den un buki cu a keda den mi mente: “Un dia lo no tin mañan.” E palabranan ey a tene mi lanta henter anochi y pone mi pensa tocante futuro. Mi tabata pensa: Mester tin algo mas cu e bida aki so. Dicon mi ta akinan? Mi no kier a muri!

Mi a bira hopi curioso tocante cosnan cu tin di haber cu ocultismo. Mi a purba di papia cu e mortonan, mi tabata bay den santana cu mi amigonan di scol y nos tabata wak pelicula di horor. Nos tabata pensa cu e cosnan aki tabata spantoso y alabes excitante.

Pa tempo mi tabatin dies aña di edad, ya mi a cuminsa bira rebelde. Mi a cuminsa huma sigaria y a bira adicto lihe. Despues mi a cuminsa huma mariwana. Cu mi 11 aña mi a cuminsa bebe. Aunke mi no tabata gusta e smaak di alcohol, mi tabata gusta e efecto cu e tabatin riba mi. Tambe mi tabata gusta scucha musica y balia. Asina cu mi a haya un chens, mi tabata bay fiesta y night club. Anochi, mi tabata sali sin niun hende sa y bin bek net prome cu di dia habri. E siguiente dia mi tabata lanta cansa y hopi biaha mi tabata keda sin bay scol. Y ora mi tabata bay scol mes, mi tabata bebe ora di cambia klas.

Den mi ultimo aña di scol, mi a haya puntonan hopi abou. Ta e ora ey mi mama a ripara con malo mi tabata comporta mi, y el a keda desapunta y rabia. Nos a pleita, y mi a bay for di cas. Pa un tempo mi a keda cu mi mucha homber, Tony, kende tabata un rastafari. E tabata gusta cana haci malo, bende droga y tabata conoci como un mucha homber hopi violento. No a dura mucho cu mi a sali na estado y cu apenas 16 aña di edad mi a duna luz na nos yiu homber.

 BIJBEL A CAMBIA MI BIDA

E prome bes cu mi a topa cu testigonan di Jehova, mi tabata biba na un posada pa mamanan soltera cu nan yiunan. Autoridadnan local a duna mi un camber eynan. Tabatin dos ruman muher Testigo cu tabata bishita algun di e otro mamanan jong regularmente. Un dia mi a join nan combersacion cu e intencion di mustra e Testigonan cu nan tabata robes! Ma na un manera calmo y cla, nan a contesta mi preguntanan for di Bijbel. Nan tabata masha amabel y cariñoso cu mi, algo cu mi a gusta hopi. Pues mi a acepta un curso di Bijbel cerca nan.

No a dura mucho cu mi a siña algo for di Bijbel cu a cambia mi bida. For di tempo mi tabata mucha, mi tabatin miedo di muri. Pero den mi curso, mi a siña tocante Hesus su siñansa di resureccion. (Juan 5:28, 29) Tambe mi a siña cu Dios ta interesa den mi personalmente. (1 Pedro 5:7) Loke a conmove mi mas tanto tabata e palabranan di Jeremias 29:11, cu ta bisa: “‘Pasobra mi sa e plannan cu mi tin pa boso’, SEÑOR ta declara, ‘plannan pa paz y no pa calamidad, pa duna boso un futuro y un speransa.’” Mi a cuminsa kere den e speransa di bida eterno den Paradijs riba Tera.—Salmo 37:29.

Testigonan di Jehova a demostra berdadero amor na ami. For di e prome bes cu mi a asisti na un di nan reunionnan, e ambiente tabata caluroso y agradabel. Tur hende tabata masha amigabel! (Juan 13:34, 35) Esey tabata un diferencia grandi for di e manera cu hende na un iglesia local a trata mi. E Testigonan a duna mi un cordial bonbini a pesar di mi situacion. Nan a dedica tempo na mi, nan a duna mi atencion y hopi yudansa practico. Mi a sinti mi parti di un famia grandi cu ta mustra amor na otro.

Mi curso di Bijbel a yuda mi realisa cu mi mester a haci cambionan grandi den mi bida pa mi por a cumpli cu e normanan moral halto di Dios. No tabata facil pa mi stop di huma. Pero na mes momento, mi a ripara cu cierto canticanan tabata lanta mi deseo pa huma mariwana, y pesey mi a stop di scucha e canticanan ey. Como cu ya mi no tabata kier a bebe di mas, mi a stop di bay fiesta y clubnan caminda e tentacion tabata mas grandi. Tambe mi a busca amigo nobo cu por tabatin un bon influencia riba mi.—Proverbionan 13:20.

Mientrastanto, Tony tambe a ricibi un curso di Bijbel cerca e testigonan di Jehova. Segun cu e Testigonan tabata contesta su preguntanan for di Bijbel, e tambe a bira convenci cu el a haya e berdad. El a haci cambionan grandi den su bida: el a stop di asocia cu su amigonan violento, el a stop di comete crimen y huma mariwana. Pa nos por a haci Jehova contento, nos tur dos a mira e necesidad pa stop cu nos bida inmoral y crea mas bien un ambiente sano pa nos yiu homber. Na aña 1982, nos a casa.

“Mi no ta keda lanta henter anochi mas y preocupa tocante futuro of morto”

Mi ta corda con mi tabata busca articulonan den e revista Toren di Vigilancia y Spierta! * tocante storia di bida di hende cu a logra haci e cambionan cu ami tambe kier a haci. Nan ehempel a anima mi masha hopi mes y a fortalece mi pa mi sigui haci mi best y no entrega. Mi a sigui haci oracion na Jehova pa e no fada cu mi. Na juli 1982, ami cu Tony a batisa como testigo di Jehova.

E BENEFICIONAN

Mi amistad cu Jehova Dios a salba mi bida. Ademas, ami cu Tony a experencia con Jehova a sostene nos den tempo dificil. Nos a siña depende riba Dios durante temponan dificil, y semper nos a sinti cu el a yuda nos y sostene nos famia.—Salmo 55:22.

Mi ta contento cu mi por a yuda mi yiu homber y yiu muher conoce Jehova mescos cu ami conoc’e. Awor, mi ta contento tambe di mira mi nietonan lanta den e caminda di Dios.

Mi no ta keda lanta henter anochi mas y preocupa tocante futuro of morto. Tur siman, ami cu Tony ta hopi ocupa ta bishita diferente congregacion di testigonan di Jehova pa anima nos rumannan. Y hunto nos ta siña otro hende cu si nan pone fe den Hesus, nan tambe por haya bida pa semper.

^ par. 17 Tambe publica pa testigonan di Jehova.