Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 1 2017

 IMITA NAN FE | ENOK

“El A Agrada Dios”

“El A Agrada Dios”

ENOK a biba largo: mas o menos 365 aña. Kisas esey ta dificil pa nos imagina ya cu el a biba cuater biaha mas largo cu loke un hende ta biba awendia. Pero, pa su epoca, e no tabata dje bieu ey. Den e tempo ey, mas cu 50 siglo pasa, hende tabata biba mucho mas largo cu awe. E prome homber, Adam, tabatin mas cu 600 aña ora Enok a nace, y despues Adam a biba pa 300 aña mas. Algun di Adam su descendientenan a biba hasta mas largo cu ne. Esey kiermen cu na edad di 365 aña, kisas ainda Enok tabata mustra basta bibito, manera un homber cu tabatin hopi aña mas pa bay. Pero esey no tabata e caso.

Aparentemente Enok tabata den peliger di morto. Imagina bo con e ta core bay sconde, sin por lubida e reaccion di e hendenan ora el a caba di papia cu nan tocante un mensahe di Dios. Nan tabata hostina y tabatin rabia riba dje. Nan a menosprecia su mensahe y tabata odia e Dios cu a mand’e. Nan no por a ataca e Dios di Enok, Jehova, pero nan por a ataca Enok si. Kisas Enok a puntra su mes si lo el a mira su famia atrobe. Acaso el a pensa riba su esposa y su yiu muhernan of riba su yiu homber Matusalen of riba su nieto Lamek? (Genesis 5:21-23, 25) Esaki tabata su fin?

Bijbel no ta bisa hopi di Enok. Tin solamente tres biaha cu Bijbel ta papia tocante dje. (Genesis 5:21-24; Hebreonan 11:5; Judas 14, 15) Sinembargo, e versiculonan ey ta duna nos suficiente detaye pa nos haya un idea ta ken e homber cu un fe fuerte aki tabata. Bo tin cu percura pa bo famia? Bo a yega di haya bo ta lucha pa defende loke bo sa cu ta corecto? Si ta asina, bo por siña hopi di Enok su fe.

ENOK A SIGUI CANA CU DIOS

Den tempo di Enok, mundo tabata hopi malo. Enok ta e di shete generacion den e liña di descendencia di Adam. Ta berdad cu hende tabata hopi mas cerca di perfeccion, algo cu Adam cu Eva tabatin un tempo y cu nan a perde. Esey ta splica dicon hende tabata biba asina largo. A pesar di esaki, nan condicion moral y spiritual tabata teribel. Tabatin hopi violencia. Esaki a cuminsa durante e di dos generacion, ora Cain a mata su ruman homber Abel. Ta parce cu un descendiente di Cain tabata masha orguyoso cu e tabata mas violento y vengativo cu Cain! Den e di tres generacion, a surgi un otro tipo di maldad: hende a cuminsa invoca e nomber di Jehova, pero no pa ador’e. Evidentemente, nan tabata blasfema e nomber sagrado di Dios y a uz’e na un manera sin respet.—Genesis 4:8, 23-26.

Aparentemente, e forma di religion falso aki tabata comun den tempo di Enok. Segun cu Enok tabata crece, e mester a haci un escogencia. Lo el a bira mescos cu e otro hendenan? Of lo el a busca e Dios berdadero, Jehova, kende a traha cielo y Tera? Enok lo a keda conmovi ora el a siña tocante Abel, kende a muri como un martir pasobra e tabata adora Jehova na un manera cu tabata agrada Jehova. Enok a dicidi pa haci mescos cu Abel.  Genesis 5:22 ta bisa: “Anto Enok a [“sigui”, NW] cana ... cu Dios.” E expresion remarcabel ey ta mustra cu aunke Enok a biba den un mundo malbado, e si tabata devoto na Dios. E ta e prome hende cu Bijbel ta describi di e manera ey.

E mesun texto di Bijbel ey ta bisa cu Enok a sigui cana cu Jehova despues cu su yiu Matusalen a nace. Cu mas o menos 65 aña di edad, Enok tabata un tata di famia. E tabatin un esposa, kende su nomber no ta ser menciona den Bijbel, y Bijbel no ta bisa tampoco cuanto “yiu homber y yiu muher” e tabatin. Si un tata kier cana cu Dios segun cu e ta lanta su yiunan y percura pa su famia, e mester haci esey na un manera cu Dios kier. Enok a compronde cu Jehova a verwacht pa e keda fiel na su esposa. (Genesis 2:24) Y siguramente el a haci esfuerso pa siña su yiunan tocante Jehova Dios. Cu ki resultado?

Bijbel no ta duna hopi detaye di esaki. E no ta bisa nada di e fe di su yiu Matusalen, kende Bijbel ta menciona como e homber cu a biba mas largo, y cu a fayece e aña cu e Diluvio a bin. Bijbel ta bisa si cu Matusalen tabata tata di Lamek, y Lamek a biba pa mas cu un siglo den mesun tempo cu su welo Enok. Lamek tabatin un fe fuerte y Jehova a inspira Lamek pa profetisa tocante su yiu homber, Noe, y e profecia ey a cumpli despues di e Diluvio. Noe, mescos cu su bisawelo Enok, tabata un homber cu a cana cu Dios. Noe no a yega di topa Enok. Pero Enok a laga un gran herencia spiritual atras. Noe por a siña di e herencia spiritual ey for di su mes tata, Lamek, of di su welo Matusalen of hasta di Jared, Enok su tata, kende a muri ora Noe tabatin 366 aña.—Genesis 5:25-29; 6:9; 9:1.

Pensa riba e diferencia entre Enok y Adam. Aunke Adam tabata un homber perfecto, el a peca contra Jehova y a laga un herencia di miseria y rebelion pa su descendientenan. Enok di su parti, aunke e tabata imperfecto, a cana cu Dios y a laga un herencia di fe pa su descendientenan. Adam a fayece ora Enok tabatin 308 aña. Acaso e famia di Adam a tene rouw pa nan antepasado egoista? Esey nos no sa. Loke si nos sa ta cu Enok a sigui “cana cu Dios.”—Genesis 5:24.

Si bo tin cu percura pa un famia, wak kico bo por siña for di e fe di Enok. Ta importante pa bo percura pa bo famia su necesidadnan fisico, pero ta aun mas importante pa percura pa e necesidadnan spiritual di bo famia. (1 Timoteo 5:8) Bo ta satisface e necesidad aki no solamente cu loke bo ta bisa, pero tambe cu loke bo ta haci. Si bo scoge pa cana cu Dios manera Enok a haci y laga Dios su normanan guia bo den bida, bo tambe lo duna bo famia un gran herencia spiritual, esta, un bon ehempel pa nan imita.

ENOK “A PROFETISA TOCANTE NAN”

Kisas Enok, como un homber di fe, lo a sintie su so den un mundo sin fe. Pero Jehova a tuma nota di dje? Sigur cu si. Un dia, Jehova a comunica cu e fiel sirbidor di dje aki. El a duna Enok un mensahe p’e entrega na e hendenan di su tempo. Asina Dios a haci Enok un profeta, y e ta e prome profeta kende su mensahe ta skirbi den Bijbel. Nos sa di esaki pasobra Judas, e mitar ruman homber di  Hesus, bou di inspiracion a skirbi Enok su palabranan profetico hopi siglo despues. *

Kico tabata e profecia di Enok? E ta lo siguiente: “Wak! Jehova a bin cu su multitud di angel santo, pa ehecuta huicio contra tur, y pa declara tur e malbadonan culpabel pa motibo di tur nan echonan malbado cu nan a comete y pa motibo di tur e cosnan ofensivo cu pecadornan malbado a papia contra dje.” (Judas 14, 15) E prome cos cu lo bo a ripara ta cu Enok a haci comosifuera Dios a cumpli cu e profecia aki caba. Esey tabata un manera di papia cu despues hopi profeta a sigui ora nan tabata profetisa. E idea ta lo siguiente: E profeta ta papia di algo cu e ta asina sigur cu lo sosode cu e ta describie den un manera comosifuera esey a sosode caba.—Isaias 46:10.

Cu curashi Enok a proclama e mensahe di Dios den un mundo malbado

Con Enok lo a sinti ora el a predica e mensahe aki na tur hende cu a scucha? Tuma nota con fuerte e spiertamento tabata: Varios biaha Enok a uza e palabra “malbado” pa denuncia e hendenan, nan accionnan y nan manera di haci cos. Pues e profecia a spierta henter humanidad cu e mundo cu nan a forma despues cu Dios a saca Adam cu Eva for di Eden tabata completamente corupto. Jehova lo a bay destrui e mundo ey ora e bin cu su “multitud di angel santo”, esta, legion di angel poderoso cla prepara pa bataya. Cu curashi Enok a proclama e spiertamento divino aki, anto el a haci esaki su so. Figura bo! Kisas, cu admiracion, e hoben Lamek lo a wak e curashi di su welo. Si ta asina, nos por compronde ta dicon.

Ora nos pensa riba Enok su fe, nos por puntra nos mes si nos ta mira e mundo aki manera Dios ta mir’e. E huicio cu Enok a proclama cu curashi ta conta pa e mundo den nos tempo tambe. Na harmonia cu Enok su spiertamento, Jehova a manda e Diluvio pa destrui e mundo malbado di Noe su tempo. Pero e destruccion ey a pone un patronchi pa un destruccion mas grandi cu mester bin ainda. (Mateo 24:38, 39; 2 Pedro 2:4-6) Awe, mescos cu den e tempo aya, Dios ta cla para cu su multitud di angel santo pa trece un huicio husto contra e mundo malbado aki. Cada un di nos mester tuma Enok su spiertamento na pecho y avisa otro hende. Kisas nos famia y amigonan no ta apoya nos y tin biaha nos lo por sinti nos nos so. Pero Jehova nunca a bandona Enok, ni lo e no bandona su fiel sirbidornan awe.

“ENOK A SER TRANSFERI PA E NO MIRA MORTO”

Con Enok a fayece? Mescos cu Bijbel no ta bisa hopi di su bida, asina tambe e no ta bisa hopi di su morto tampoco. E buki di Genesis simplemente ta bisa: “Enok a cana cu Dios, y e no tabat’ey mas, pasobra Dios a tum’e.” (Genesis 5:24) Den ki sentido Dios a tuma Enok? Despues apostel Pablo a splica: “Pa medio di fe Enok a ser transferi pa e no mira morto, y no a hay’e ningun caminda pasobra Dios a transferie; pero prome cu esey, el a ricibi testimonio di Dios cu el a agrada Dios.” (Hebreonan 11:5) Kico Pablo tabata kiermen cu e frase “Enok a ser transferi pa e no mira morto”? Algun traduccion di Bijbel ta bisa cu Dios a tuma Enok den cielo. Pero esey no por ta. Bijbel ta mustra cu Hesucristo tabata e prome persona cu Dios a resucita pa bay cielo.—Juan 3:13.

Den ki sentido anto Enok a ser “transferi” pa e no “mira morto”? Casi sigur Jehova a transferi Enok na un manera suave di bida pa morto, librand’e  for di dolor di morto. Pero prome cu esey, Enok a ricibi e “testimonio di Dios cu el a agrada Dios.” Con asina? Un poco prome cu Enok su morto, Dios lo a lag’e mira den un vision con Tera lo bira un paradijs. Cu e vision ey cu a indica cu e tabatin Jehova su aprobacion, Enok a bay sosega. Ora apostel Pablo a skirbi di Enok y otro hende homber y muher fiel, el a bisa: “Tur e hendenan aki a muri cu fe.” (Hebreonan 11:13) Despues, podise Enok su enemigonan a busca su curpa pero nan “no a hay’e ningun caminda”, pasobra kisas Jehova a deshaci di dje pa evita cu hende lo a falta respet pa Enok of uza su curpa pa promove adoracion falso. *

Cu e texto di Bijbel ey na mente, laga nos purba imagina ta con Enok su bida lo a yega na un fin. Imagina e siguiente scenario y corda cu esaki ta djis un posibilidad. Enok tabata huy pa su enemigonan y tabata morto cansa. Su enemigonan tabata su tras y nan tabata furioso debi na su mensahe di huicio. Enok a haya un luga di sconde y a sosega pa un rato, pero e tabata sa cu lo e no por a scapa for di nan pa mucho tempo mas. Su morto violento lo tabata cerca. Ora e tabata sosega, el a haci oracion na su Dios. Pero despues un sintimento di trankilidad a bin riba dje. Un vision cla, cu tabata parce manera ta e mes tabata eynan, a mand’e leu.

Kisas Enok tabata bay sufri un morto violento ora Jehova a tum’e

Imagina bo kico el a mira su dilanti: un mundo totalmente diferente for di esun cu e tabata conoce. E mundo tabata mes bunita cu e Hofi di Eden, pero no tabatin kerubin ta tene warda pa tene hende afo. Tur hende tabata bon di salud y yen di vigor, manera den nan hubentud. Paz tabata reina entre nan. No tabatin ningun lastro di e odio y persecucion religioso cu Enok tabata conoce bon. Y danki na e vision aki, Enok tabatin e confianza cu Jehova tabata stim’e y tabata contento cu ne. E tabata sa sigur cu e ta pertenece na e luga aki cu el a mira, y cu esey lo a bira su hogar. Enok a cuminsa sintie mas y mas trankil, el a cera su wowo y a pega un soño profundo.

Y eynan el a keda te dia di awe; drumi den e soño di morto, preserva den e memoria di Jehova Dios cu tin un capacidad sin limite. Manera Hesus a priminti despues, e dia lo yega cu tur esnan cu ta den Dios su memoria lo tende e bos di Cristo y sali for di graf. Nan lo habri nan wowo y mira un mundo nobo cu lo ta bunita y pacifico.—Juan 5:28, 29.

Abo lo kier ta eynan? Imagina con contento lo bo ta ora bo topa Enok. Pensa riba tur e cosnan fascinante cu bo por siña di dje! Lo e por conta nos si loke nos a imagina di su ultimo momentonan di bida tabata kisas loke el a pasa aden. Pero tin algo cu nos mester siña for di aworaki di dje. Despues cu Pablo a papia di Enok, el a bisa: “Sin fe ta imposibel pa agrada Dios.” (Hebreonan 11:6) Esta un bon motibo pa nos imita e curashi y fe di Enok!

^ par. 14 Algun experto riba tereno di Bijbel ta bisa cu Judas a cita un buki apocrifo cu yama Buki di Enok, pero e buki aki ta yen di mito y su origen no ta conoci; anto hende ta kere cu ta Enok a skirbie. E buki aki ta menciona e profecia di Enok corectamente, pero kisas su autor a haya e informacion ey for di un fuente antiguo, sea un documento skirbi of via tradicion oral, cu awor no ta disponibel pa nos. Kisas Judas a uza e mesun fuente antiguo ey of Hesus por a siñ’e tocante Enok como cu el a mira Enok su bida for di cielo.

^ par. 20 Di igual manera, Dios a deshaci di e curpa di Moises y esun di Hesus pa evita cu hende lo a haci mal uzo di nan.—Deuteronomio 34:5, 6; Lucas 24:3-6; Judas 9.

Mas Informacion

E TOREN DI VIGILANCIA

Ta Posibel pa Nos Agrada Dios?

Nos por haya e contesta door di analisa e bida di Job, Lot y David, kendenan a comete erornan serio.