Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  December 2015

Hipocresia! Ki Dia Lo E Caba?

Hipocresia! Ki Dia Lo E Caba?

PANAYIOTA a lanta riba un isla cu ta keda den Lama Mediteraneo. For di tempo cu e tabata teenager, e tabata interesa den politica. Na dado momento, el a bira secretaria di un partido politico den e pueblito caminda e tabata biba. Hasta e tabata bay di cas pa cas pa recauda fondo pa e partido. Pero cu tempo, Panayiota a bira decepciona. Dicon? Pasobra maske e miembronan di e partido tabata yama otro colega, tabatin faboritismo y desacuerdo entre nan. Ademas, nan tabata jaloers riba otro y ambicioso.

Daniel a lanta den un famia hopi religioso na Irlanda. Pero e ta corda bon cla con hipocrita e pastoornan tabata. Nan tabata bisa Daniel cu si e peca, e ta bay kima den fierno, pero nan mes tabata bebe di mas, hunga wega di placa y horta placa di collect.

Jeffery a traha gran parti di su bida den marketing pa un compania maritimo cu tin oficina na Reino Uni y Merca. E ta corda cu na varios ocasion clientenan y competidornan a comete fraude ora nan tabata negosha cu funcionarionan di gobierno. Nan tabata asina hipocrita cu nan tabata dispuesto pa bisa cualkier cos pa cera un contract.

Lamentablemente, esaki no ta un excepcion. Awendia tin hipocresia casi tur caminda—den politica, religion y comercio. E palabra “hipocrita” ta bin for di un palabra Griego cu ta referi na un actor kende ta uza un mascarada. Cu tempo, e palabra aki a cambia di nificacion. Awor e ta referi na un hende cu ta pretende di ta algo cu e no ta p’e logra gaña otro hende y cumpli cu su proposito egoista.

Hende cu bira victima di hipocresia por sinti amargura, rabia y rencor. Den nan desesperacion, nan por puntra: “Ki dia hipocresia lo caba?” Wel, e Palabra di Dios ta sigura nos cu hipocresia lo caba pronto.

KICO DIOS Y HESUS TA PENSA DI HIPOCRESIA?

Segun Bijbel, e prome hipocrita ta un criatura invisibel. Ken e ta? Satanas, e Diabel. Na principio, el a uza un colebra pa sconde su identidad pa asina e gaña Eva y haci comosifuera cu e tin su bienestar na pecho. (Genesis 3:1-5) For di e tempo ey, hopi hende a pretende di ta algo cu nan no ta pa gaña otro hende y logra nan metanan egoista.

Ora e pueblo di Israel di antiguedad a cay den adoracion falso, Dios a spierta nan bes tras bes kico lo ta e consecuencianan si nan ador’e na un manera hipocrita. Mediante profeta Isaias, Jehova Dios a bisa: “E hendenan aki ta acerca mi cu nan boca y ta honra mi cu nan lipnan, ma nan curason  ta leu for di mi.” (Isaias 29:13) Ora e pueblo no kier a cambia, Dios a permiti otro nacionnan destrui e centro di adoracion di Israel, esta Jerusalem y su tempel. Na aña 607 prome cu Cristo, Dios a laga e ehercito di Babilonia destrui Jerusalem y su tempel. Y na aña 70 despues di Cristo, e ehercito Romano a destruye. Pues nos por mira claramente cu Dios no ta tolera hipocresia pa semper.

Di otro banda, Dios y Su Yiu, Hesus, ta balora hende sincero y honesto. Na comienso di Hesus su sirbishi riba Tera, un homber cu yama Natanael a acerc’e. Ora Hesus a mira Natanael, el a bisa: “Ata un Israelita den ken sigur no tin engaño.” (Juan 1:47) Natanael, kende tambe yama Bartolomeo, a bira un di e 12 apostelnan di Hesus.—Lucas 6:13-16.

Hesus a pasa tempo cu su siguidornan, y el a siña nan pensa manera Dios ta pensa. El a siña nan cu e sirbidornan di Dios no por ta hipocrita. Pesey Hesus a condena e hipocresia di e lidernan religioso di e tempo ey. Laga nos ban wak kico ta algun di e cosnan malo cu nan tabata haci.

Nan tabata play santo dilanti hende. Hesus a bisa su oyentenan: “Tene masha cuidou pa boso no practica boso obranan di husticia dilanti di hende djis pa nan mira boso, ... manera e hipocritanan ta haci.” Ademas, el a bisa nan pa ora nan haci obra di caridad, nan haci esey “den secreto”, of na un manera discreto. Nan mester a haci oracion den priva y no pa otro hende wak. E ora ey nan adoracion lo tabata sincero, y nan lo por a haya e aprobacion di Dios.—Mateo 6:1-6.

Cristian berdadero ta mustra “amor cu ta sali for di un curason limpi, di un bon consenshi y di fe sin hipocresia.”—1 TIMOTEO 1:5

Nan tabata gusta critica. Hesus a bisa: “Hipocrita! Saca e balki for di bo mes wowo prome; e ora ey lo bo mira cla con pa saca e splinter for di wowo di bo ruman.” (Mateo 7:5) Un hende cu ta wak fout di otro hende mientras e mes ta haciendo foutnan mas grandi ta pretende di ta algo cu e no ta. Y esey no ta corecto, pasobra nos “tur a peca y no por refleha e gloria di Dios.”—Romanonan 3:23.

Nan tabatin mal intencion. Na un ocasion, e siguidornan di e fariseonan y e partidarionan di Herodes a acerca Hesus cu un pregunta tocante belasting. Prome nan a elogia Hesus, bisando: “Maestro, nos sa cu bo ta papia berdad y ta siña hende e caminda di Dios di acuerdo cu berdad.” Pero despues nan a purba di gar’e den trampa cu un pregunta: “Tin mag di paga belasting na Cesar, si of no?” Hesus a contesta nan: “Pakico boso ta purba di [gara] mi den trampa, hipocritanan?” E echo cu Hesus a yama nan hipocrita tabata na su luga, pasobra eigenlijk nan no tabata kier a haya contesta pa nan pregunta, mas bien, nan kier a gara “Hesus den trampa cu su mes palabranan.”—Mateo 22:15-22.

Ora e congregacion cristian a ser estableci na Pentecoste di aña 33, e cristiannan berdadero a traha duro pa stop di ta hipocrita y asina crea un ambiente liber di engaño. Por ehempel, Pedro, un di e 12 apostelnan, a anima su compañeronan cristian pa “obedece e berdad, loke [ta] resulta den amor sin hipocresia pa e rumannan.” (1 Pedro 1:22) Y apostel Pablo a encurasha su rumannan den fe pa nan mustra “amor cu ta sali for di un curason limpi, di un bon consenshi y di fe sin hipocresia.”—1 Timoteo 1:5.

E PALABRA DI DIOS TIN PODER

E siñansanan di Hesus y su apostelnan, cu nos ta haya den Bijbel, tin e mesun poder awe cu nan tabatin den e prome siglo. Esey ta precies loke apostel Pablo a bisa: “E palabra di Dios ta bibo y poderoso, y e ta mas skerpi cu cualkier spada cu ta corta tur dos banda, y e ta penetra asina profundo cu e ta separa alma for di spirito y joint for di tuti di weso, y e por saca pensamento y intencion di curason na cla.” (Hebreonan 4:12) Hopi hende cu a studia Bijbel y a haci esfuerso pa aplica loke nan a siña a stop di ta hipocrita, y nan a bira  hende honesto y sincero. Laga nos considera e experencia di e tres personanan cu nos a menciona na principio di e articulo aki.

“Mi a mira cu nan ta mustra berdadero amor y interes den hende.”—PANAYIOTA

Panayiota su bida a cambia ora el a acepta pa asisti na e reunionnan na Salon di Reino di testigonan di Jehova. Ora el a bay reunion, el a ripara cu ningun persona no tabata pretende di ta bon hende djis pa impresiona otronan. El a bisa: “Eynan mi a mira cu nan ta mustra berdadero amor y interes den hende, esey ta algo cu mi no a mira den tur e añanan cu mi tabata den politica.”

Panayiota a cuminsa studia Bijbel, el a haci cambio den su bida y a batisa como testigo di Jehova. Ya e tin 30 aña batisa. Awor e ta bisa: “Mi a haya berdadero proposito den bida, no tempo cu mi tabata bay di cas pa cas pa core campaña pa un partido politico sino ora mi a cuminsa predica tocante e Reino di Dios cu ta e unico gobierno cu por trece husticia.”

“Mi no tabata kier pa mi rumannan cristian pensa cu mi ta algo cu mi no ta.”—DANIEL

Daniel tambe a bira testigo di Jehova, y el a haya cierto responsabilidad den congregacion. Un par di aña despues, el a haci algo robes y su consenshi a cuminsa molesti’e. El a bisa: “Ora mi a corda riba e hipocresia cu mi a mira den iglesia, mi a sinti cu mi mester a entrega e privilegionan cu mi tabatin den congregacion. Mi no tabata kier pa mi rumannan cristian pensa cu mi ta algo cu mi no ta.”

Despues di tempo, Daniel a bolbe haya su privilegionan bek, y e tabatin e goso atrobe di por a sirbi e congregacion cu un consenshi limpi. Esey ta e clase di honestidad cu esnan cu ta sirbi Dios mester tin. Nan no ta hipocrita. Nan ta siña “saca e balki” for di nan mes wowo prome cu nan purba di “saca e splinter” for di e wowo di nan ruman.

“Mi no por a sigui gaña hende ... Tin varios texto di Bijbel cu a yuda mi cambia mi manera di pensa.”—JEFFERY

Y Jeffery, kende a traha pa un gran parti di su bida den e mundo di negoshi, a bisa: “Ora mi a haya mas conocemento di Bijbel, mi a realisa cu mi no por a sigui gaña hende djis pa mi logra cera un contract cu nan. Tin varios texto di Bijbel cu a yuda mi cambia mi manera di pensa. Un di nan ta Proverbionan 11:1 cu ta bisa: ‘Un balansa engañoso ta abominacion pa SEÑOR.’” Si, Jeffery no a imita e mal ehempel di esnan cu a haci Hesus e pregunta tocante belasting. El a siña pa ta honesto cu tur hende, tanto cu rumannan den e congregacion como cu hende cu no tin e mesun creencia cu ne.

E miyones di testigonan di Jehova rond mundo ta haci nan best pa aplica loke nan a siña for di Bijbel. Nan ta haci tur nan esfuerso pa “bisti e personalidad nobo cu a ser crea segun e boluntad di Dios den berdadero husticia y lealtad.” (Efesionan 4:24) Si bo kier haya sa ken testigonan di Jehova ta y kico nan ta kere, nos ta anima bo pa tuma contacto cu nan. Nan lo por yuda bo haya sa mas tocante e mundo nobo cu Dios a priminti. Den e mundo nobo ey “husticia lo biba” y lo no tin hipocresia mas.—2 Pedro 3:13.