Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  December 2015

 NOS LECTORNAN TA PUNTRA ...

Tin Algo Malo cu e Custumbernan di Pasco?

Tin Algo Malo cu e Custumbernan di Pasco?

Pa hopi tempo caba, hende a mira Pasco como un fiesta cristian tradicional pa celebra e nacemento di Hesus. Pero kisas nos ta puntra nos mes ta con hende a conecta e tantisimo custumbernan di e fiesta ey cu e nacemento di Hesus.

Pa cuminsa, tin e mito di Santa Claus. Un compania di refresco di Merca tabatin masha exito ora nan a uza e homber cu paña cora, barba blanco y cara contento aki den un propaganda na aña 1931. Durante e decada di 1950, algun hende na Brazil a purba di reemplasa Santa Claus cu un figura nativo legendario cu yama “Vovo Indio” (Welo Indjan). Cu ki resultado? Santa Claus a haya hopi mas fama cu Welo Indjan, y segun profesor Carlos Fantinati, hasta “hopi mas cu niño Hesus y a bira e representante oficial di e fiesta di 25 di december.” Pero Santa Claus ta e unico cos malo di Pasco? Pa nos haya contesta riba e pregunta ey, ban bek den tempo di e prome cristiannan.

Encyclopedia Britannica ta bisa cu “durante e prome dos siglonan di cristianismo, hende tabata contra e idea di celebra nacemento di martirnan, hasta di Hesus.” Dicon? Pasobra e cristiannan a mira celebracion di hacimento di aña como un custumber pagano, algo cu nan mester a evita completamente. Ademas, Bijbel no ta menciona e fecha di nacemento di Hesus.

Den siglo 4 despues di Cristo, Iglesia Catolico Romano a institui e celebracion di Pasco a pesar cu e cristiannan di prome siglo tabata contra dje. E iglesia kier a haya mas influencia, y pesey el a kita un di e obstaculonan di mas grandi, esta, e popularidad di e religionnan pagano Romano y nan festival di e solsticio di winter. Penne Restad a bisa den Christmas in America cu cada aña, for di 17 di december te cu 1 di januari, “mayoria di e Romanonan tabata come di mas, bet placa, fiesta, core paranda, y nan tabata participa den otro fiestanan pa duna homenahe na nan diosnan.” Y riba 25 di december e Romanonan tabata celebra e nacemento di e Solo Invencibel. Ora e iglesia a manda pa celebra Pasco riba e dia ey, nan a convence hopi Romano pa celebra e nacemento di Hesus en bes di esun di solo. Gerry Bowler a bisa den su obra Santa Claus, a Biography cu e Romanonan “por a sigui disfruta di e custumbernan religioso cu tin di haber cu e fiestanan di winter.” Eigenlijk, nan “tabata celebra e fiesta nobo pero cu e mesun custumbernan di antes.”

Ta bisto anto cu e custumbernan di Pasco tin un origen pagano. Den Stephen Nissenbaum su buki The Battle for Christmas, e ta referi na Pasco como “nada mas ni nada menos cu un fiesta pagano den un bachi cristian nobo.” Pesey mes, Pasco ta un celebracion cu ta deshonra Dios y su Yiu, Hesucristo. Acaso esaki ta algo malo? Bijbel ta puntra: “Ki relacion husticia tin cu maldad? Of kico luz tin en comun cu scuridad?” (2 Corintionan 6:14) Pues, Pasco y su custumbernan ta mes malo cu un palo cu a crece schuin sin cu e “por wordo haci stret” mas.—Eclesiastes 1:15.