Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2015

 IMITA NAN FE | TIMOTEO

“Mi Yiu Stima y Fiel den Señor”

“Mi Yiu Stima y Fiel den Señor”

TIMOTEO tabata biba na Listra, un stad chikito riba un sero den un vaye. E tabata cana duro tras di su compañeronan lagando su cas y su famia atras, y e tabata concentra riba loke ta sper’e den futuro. Nan a pasa banda di e cunucunan cu Timoteo tabata conoce manera su plant’i man. Timoteo a smile ora el a pensa riba su mama y su wela. E tabata sa cu nan ta orguyoso di dje, pero e tabata sa tambe cu nan tabata purba sconde nan tristeza. Kisas el a pensa cu e mester bira wak pa ultimo biaha y bisa ayo.

De bes en cuando, apostel Pablo a bira wak Timoteo y smile cu ne pa dun’e curashi. E tabata sa cu Timoteo ainda tabata un tiki timido, pero e tabata masha contento di wak e entusiasmo di e hoben aki. Timoteo tabatin rond di 20 aña y a stima y respeta Pablo profundamente. E tempo ey, Timoteo a cuminsa compaña e homber fiel y yen di energia aki pa bay luganan cu ta keda hopi leu for di su cas. Nan lo mester a cana na pia, subi barco y enfrenta varios peliger na caminda. Timoteo no tabata sa si e lo wak su famia atrobe.

Dicon Timoteo a scoge e bida ey? Tabata bale la pena pa haci tur e sacrificionan aki? Y kico anos por siña di Timoteo su fe?

“FOR DI CHIKITO”

Laga nos ban dos of tres aña bek den tempo. Listra, unda Timoteo probablemente a lanta, tabata un stad isola cu ta keda den un vaye bunita. Aunke cu hende tabata compronde e idioma Griego, nan tabata papia e idioma local, Licaonica. Un dia, algo a sosode cu a causa un conmocion den e stad keto aki. Dos misionero cristian, esta Pablo y Barnabas, a yega for di Iconio, un ciudad grandi cu ta keda cerca di Listra. Mientras cu nan tabata predica, Pablo a mira un homber cu no por a cana. E homber aki tabatin un fe fuerte, y pesey Pablo a haci un milager y a cur’e.—Echonan 14:5-10.

Hopi hende na Listra tabata kere den storia di diosnan cu a tuma curpa di hende y cu den pasado a bishita e region ey. Pa e motibo ey, nan a kere cu Pablo tabata Hermes y Barnabas tabata Zeus. Tabata hopi dificil pa e dos hombernan humilde aki convence e hendenan pa no ofrece sacrificio na nan.—Echonan 14:11-18.

Sinembargo, algun hende na Listra no a kere cu ta diosnan pagano di mitologia Griego a bishita nan. Nan tabata sa cu Pablo y Barnabas tabata dos homber cu a trece un bunita mensahe pa nan. Por ehempel, tanto Eunice, un muher Hudiu cu tabata casa cu un homber Griego, * como su mama Loida a scucha Pablo y Barnabas cu hopi atencion. Nan tabata feliz pasobra porfin nan a tende loke tur fiel hudiu kier a scucha: E Mesias priminti a bin, y el a cumpli cu hopi profecia cu tabata skirbi den Bijbel tocante dje.

Imagina bo ki efecto Pablo su bishita tabatin riba Timoteo. Bijbel ta bisa cu “for di chikito” Timoteo a siña stima e Santo Scritura. (2 Timoteo 3:15) Mescos cu su mama y su wela, e por a mira cu Pablo y Barnabas a papia e berdad tocante e Mesias. Corda  tambe riba e homber lam cu Pablo a cura milagrosamente. Probablemente, for di chikito Timoteo lo a wak e homber ey hopi biaha cant’i caminda. Pero pa prome biaha, Timoteo a wak e homber aki cana. No ta nada straño cu Eunice, Loida y Timoteo a bira cristian. Awendia, tanto mayornan como welonan por siña hopi for di Loida y Eunice. Aboso tambe por ta un excelente ehempel pa e hobennan.

CRISTIANNAN “TIN CU PASA HOPI TRIBULACION”

Esnan cu a bira cristian na Listra lo tabata hopi contento cu e speransa nobo cu nan a haya. Pero nan a siña tambe cu bida di un cristian lo no ta facil. E hudiunan fanatico di Iconio y Antiokia, cu tabata opone e cristiannan, a yega Listra y a cuminsa influencia e hendenan pa bay contra Pablo y Barnabas. Un poco despues, un multitud violento a bay tras di Pablo y a cuminsa piedr’e. El a haya un golpi tras di otro y a cay na suela. E multitud a lastr’e hib’e pafo di e stad pensando cu e tabata morto.—Echonan 14:19.

Pero kico a pasa despues? E discipelnan cu tabata na Listra a bay cerca Pablo y a rondon’e. Ki un gran alivio nan a sinti ora nan a mira cu Pablo a cuminsa move, a lanta para y cu curashi a bay bek Listra! E siguiente dia, Pablo y Barnabas a bay e stad Derbe pa nan sigui predica. Despues di haci discipel eynan tambe, nan a bay bek Listra yen di curashi maske nan tabata sa cu esey tabata hopi peligroso. Pero dicon nan a haci esey? Bijbel ta bisa cu “nan a fortalece e discipelnan eynan y a anima nan pa keda firme den fe.” Imagina bo con Timoteo, cu wowo hancho habri, tabata scucha Pablo y Barnabas. Nan a splica e cristiannan na Listra cu e speransa cu nan tabatin pa futuro ta asina bunita cu tur e sufrimento cu nan tabata pasando aden tabata bale la pena. Nan a bisa e cristiannan: “Nos tin cu pasa hopi tribulacion pa drenta e Reino di Dios.”—Echonan 14:20-22.

Timoteo a habri su curason pa loke Pablo a siña

Timoteo a wak cu Pablo a biba di acuerdo cu e palabranan ey, pasobra el a comparti e bon noticia cu otro hende a pesar di hopi persecucion. Pesey Timoteo tabata sa cu si e sigui Pablo su ehempel, e lo haya oposicion di e hendenan na Listra y kisas hasta di su tata. Pero Timoteo tabata determina pa no laga nada ni ningun hende strob’e di sirbi Dios. Den nos tempo, tin hopi hoben manera Timoteo. Nan ta wak bon ken nan ta scoge como amigo. Nan ta scoge esnan cu por tin un fe fuerte y esnan cu por anima nan y fortalece nan. Ademas, nan no ta laga ningun hende stroba nan di sirbi e Dios berdadero.

 E RUMANNAN “TABATA PAPIA BON DI TIMOTEO”

Manera nos a menciona caba, Pablo a bolbe Listra dos of tres aña despues. Imagina bo con contento Timoteo su famia a bira ora Pablo, hunto cu Silas, a bishita nan atrobe. Sin duda, Pablo tambe tabata hopi contento di mira nan. Y con a bay cu algun di e hendenan cu el a comparti e bon noticia cu nan? Wel, Loida y su yiu Eunice tabata cristiannan leal cu Pablo a admira pa nan “fe sin hipocresia.” (2 Timoteo 1:5) Y con a bay cu Timoteo?

Pablo a tende cu e hoben aki a madura hopi desde e ultimo biaha cu nan a wak otro. E rumannan “tabata papia bon di Timoteo”, no solamente na Listra sino tambe na Iconio, cu tabata keda rond di 32 kilometer noordoost di Listra. (Echonan 16:2) Con el a logra haya e bon reputacion ey?

“For di chikito” Timoteo su mama y su wela a siñ’e “e scrituranan santo” cu tin conseho practico pa hobennan. (2 Timoteo 3:15) Un di e consehonan ey ta, “corda tambe riba bo Creador den e dianan di bo hubentud.” (Eclesiastes 12:1) E palabranan aki a haya un nificacion mas profundo den bida di Timoteo despues cu el a bira cristian. El a compronde cu un di e mihor maneranan pa corda riba su Creador ta door di comparti e bon noticia tocante Dios su Yiu, Hesucristo. Gradualmente Timoteo a logra vence su timidez, y el a siña papia cu curashi tocante e bon noticia.

E hombernan cu tabata dirigi e congregacionnan a ripara Timoteo su progreso. Sin duda, nan a keda impresiona ora nan a wak con e tabata fortalece y anima tur hende rond di dje. Pero loke ta mas importante ainda ta cu Jehova Dios a wak e progreso spiritual di Timoteo. Jehova a profetisa algun cos tocante Timoteo den Bijbel. Probablemente loke a ser profetisa ta relaciona cu e tipo di trabou cu Timoteo tabata bay haci den e congregacionnan. Ora Pablo a bishita Listra, el a ripara cu Timoteo lo por yud’e bon durante su biahenan como misionero. E rumannan cristian na Listra tabata di acuerdo cu apostel Pablo, y pesey nan “a pone man riba” Timoteo. Kico esey ta nifica? Cu el a ser nombra pa cumpli cu un asignacion special pa sirbi Jehova Dios.—1 Timoteo 1:18; 4:14.

Nos por imagina con Timoteo a reacciona. Probablemente lo e no por a kere cu e rumannan tabatin asina tanto confianza den dje. Y kisas el a sinti cu e no merece e privilegio ey, toch e tabata dispuesto pa bay hunto cu Pablo. * Pero Timoteo su tata no tabata cristian. Con el a reacciona ora el a haya sa cu su yiu a haya e asignacion pa traha como misionero cristian? Podise su tata tabatin otro plannan na mente pa su yiu. Y kico Timoteo su mama y su wela a pensa di su decision? Sin duda, nan lo tabata orguyoso di dje, pero tambe nan lo tabata preocupa pa su bienestar.

Na comienso di e articulo aki, nos a describi e mainta cu Timoteo a cuminsa un etapa nobo den su bida hunto cu Pablo como un misionero cristian. Cada stap cu Timoteo a dal tabata un stap mas leu for di cas y un stap mas cerca di un mundo desconoci. Despues di a cana henter un dia, Pablo, Silas y Timoteo a yega Iconio. Eynan, Timoteo a observa con Silas y Pablo tabata informa e rumannan tocante e decisionnan mas reciente cu e apostelnan y e ancianonan na Jerusalem a tuma. Ademas, el a observa con nan tabata fortalece e fe di e rumannan na Iconio. (Echonan 16:4, 5) Pero esey tabata solamente e comienso.

Despues cu e misioneronan ey a bishita e congregacionnan na Galacia, nan a baha for di e careteranan Romano y a sigui cana cientos di kilometer door di e sabana di Frigia, prome nan a bay noord y despues west. Bou di guia di e spirito santo di Dios, nan a yega e stad Troas, subi un barco y nabega bay Macedonia. (Echonan 16:6-12) Pa e tempo ey, Pablo a ripara con valioso Timoteo tabata. Pesey el a laga Timoteo keda na Berea hunto cu Silas. (Echonan 17:14) Y el a hasta manda e hoben aki bay su so Tesalonica. Timoteo a sigui e bon ehempel cu el a haya, y el a fortalece e fe di e cristiannan eynan.—1 Tesalonicensenan 3:1-3.

 Mas despues, Pablo a bisa tocante Timoteo: “Mi no tin ningun otro hende cu un disposicion manera esun di dje, cu di berdad lo zorg pa e cosnan cu tin di haber cu boso.” (Filipensenan 2:20) Pues, e no a haya e bon reputacion ey pa casualidad. Con el a logra hay’e? Wel, el a traha duro, sirbi su rumannan humildemente y persevera bou di prueba. Esta un bon ehempel pa e hobennan den nos tempo! Nunca lubida cu abo ta dicidi ki reputacion bo kier tin. Si bo ta jong, bo tin un oportunidad unico pa traha un bon nomber pa bo mes. Bo por haci esey door di pone Jehova Dios na prome luga den bo bida y trata hende cu bondad y respet.

“HACI TUR BO ESFUERSO PA BINI ... CERCA MI”

Na un edad jong, Timoteo a dedica su bida na Dios su sirbishi

Timoteo a pasa mas o menos 14 aña largo ta traha cu su amigo, apostel Pablo. El a pasa den hopi momentonan alegre hunto cu Pablo, pero tambe den hopi peliger. (2 Corintionan 11:24-27) Na un ocasion, Timoteo a hasta bay cera pa motibo di su fe. (Hebreonan 13:23) Mescos cu Pablo, el a stima su rumannan cristian hopi y el a preocupa pa nan. Pesey Pablo a skirbie: “Mi [ta] corda riba bo lagrimanan.” (2 Timoteo 1:4) Mescos cu Pablo, Timoteo a “yora cu esnan cu ta yora.” Pues, el a pone su mes den nan sapato pa e por a encurasha y consola nan. (Romanonan 12:15) Laga cada un di nos sigui su ehempel!

No ta un sorpresa cu a traves di tempo Timoteo a bira un excelente superintendente cristian. Pesey Pablo a duna Timoteo e responsabilidad di bishita e congregacionnan pa e fortalece y anima e rumannan. Ademas, Pablo a dun’e e responsabilidad pa nombra hombernan cu ta cualifica pa sirbi como anciano y sirbidor ministerial den congregacion.—1 Timoteo 5:22.

Pablo a stima Timoteo mescos cu un tata, pesey el a dun’e guia y conseho. Por ehempel, Pablo a anima Timoteo pa balora e privilegio special cu el a haya pa sirbi Dios y pa e sigui progresa. (1 Timoteo 4:15, 16) Tambe el a anim’e pa e no laga su hubentud, of kisas algun defecto cu e tabatin, strob’e di haci loke ta corecto. (1 Timoteo 1:3; 4:6, 7, 11, 12) Pablo hasta a conseh’e kico pa haci tocante cierto problema di salud cu e tabatin, probablemente problema cu stoma.—1 Timoteo 5:23.

Pablo tabata sa cu su dianan tabata conta y cu probablemente e lo ser ehecuta. Pesey el a dicidi di skirbi un ultimo carta pa Timoteo. El a suplic’e: “Haci tur bo esfuerso pa bini pronto cerca mi.” (2 Timoteo 4:9) Pablo a stima Timoteo masha hopi mes; el a yam’e “mi yiu stima y fiel den Señor.” (1 Corintionan 4:17) Sin duda e tabata kier pa su amigo ta cerca dje den e ultimo dianan di su bida. Ta bon pa cada un di nos puntra nos mes: Hende ta acerca mi ora nan ta pasando den dificultad? Ami ta un fuente di consuelo?

Y kico di Timoteo, el a logra wak Pablo prome cu el a muri? Nos no sa esey. Pero loke si nos sa ta cu Timoteo semper a haci tur su esfuerso pa duna Pablo y otronan consuelo y animacion. Timoteo a demostra cu e ta digno di su nomber cu ta nifica: Esun cu ta honra Dios. Y el a laga un excelente ehempel di fe pa nos tur imita.

^ par. 9 Wak “Bo Tabata Sa?” den e edicion aki.

^ par. 20 Timoteo hasta tabata dispuesto pa cumpli cu Pablo su peticion pa circuncida maske no tabata necesario pa un cristian haci esey. Pero dicon Pablo a pidi Timoteo p’e circuncida? Wel, e mester a predica na e hudiunan, y circuncision tabata algo hopi importante pa nan. Pero como cu Timoteo su tata tabata Griego, Timoteo no tabata circuncida. Pues, pa e hudiunan no rechasa Timoteo, Pablo tabata kier p’e circuncida.—Echonan 16:3.