Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  November 2015

 TOPICO PRINCIPAL

Kico Dios Ta Pensa di Guera?

Kico Dios Ta Pensa di Guera?

Con abo lo contesta e pregunta aki? Hopi hende ta pensa cu Dios ta aproba guera. Nan ta rasona asina ya cu Bijbel ta bisa cu Dios mes a manda algun di su sirbidornan den pasado bay guera. Pero tin hende ta pensa diferente pasobra nan sa cu Hesus a siña su discipelnan pa stima nan enemigonan. (Mateo 5:43, 44) Pues, nan ta rasona cu na dado momento Dios su punto di bista tocante guera a cambia y cu awe Dios no ta aproba guera mas.

Kico abo ta pensa? Bo ta kere cu Dios ta aproba guera? Y si esey ta e caso, na ken su banda Dios ta? E contesta riba e preguntanan aki por yuda bo analisa bo punto di bista tocante guera. Por ehempel, si bo sa cu Dios ta aproba guera y ta apoya bo banda den un conflicto, lo bo sinti bo bon pasobra bo tin sigur cu boso lo gana e guera. Pero awor, con lo bo sinti si bo haya sa cu Dios no ta apoya bo banda den e conflicto? Siguramente lo bo cambia di opinion di biaha.

Pero tin algo mas importante ainda. Ora bo haya sa kico Dios ta pensa di guera, esaki por cambia bo opinion tocante Dios. Si abo ta un di e miyones di hendenan cu a sufri hopi pa motibo di guera, sin duda lo bo kier haya sa e contesta riba e siguiente preguntanan: Bo ta kere cu Dios ta instiga guera y ta causa asina tanto sufrimento? Of acaso e no tin sintimento y no ta worry ora hende sufri?

Kisas lo bo keda sorprendi ora bo haya sa e contesta cu Bijbel ta duna. Dicon? Pasobra loke Bijbel ta bisa tocante e asunto ey ta completamente diferente for di loke mayoria di hende ta pensa. Ademas, Dios su manera di pensa tocante guera nunca a cambia. Laga nos analisa Dios su punto di bista tocante guera den antiguedad y den e prome siglo ora Hesus tabata riba Tera. Esaki lo yuda nos haya sa kico Dios ta pensa di guera den nos tempo y si guera lo caba algun dia.